រដ្ឋបាលរាជធានីភ្នំពេញ ចាក់បេតុងផ្លូវមួយខ្សែប្រវែង១០០០ម៉ែត្រ ឆ្លងកាត់តំបន់មួយចំនួន សម្រេចបាន៧៥ភាគរយ

ផ្លូវបេតុងមួយខ្សែប្រវែង ១០០០ម៉ែត្រ ត្រូវបានអាជ្ញាធររាជធានី ស្ថាបនាចាក់ឡើងវិញ ដើម្បីសម្រួលជូនពលរដ្ឋ បានសម្រេច ៧៥ភាគរយហើយ។

គិតត្រឹមថ្ងៃទី៣០ ខែមិថុនា ឆ្នាំ២០២៦  រដ្ឋបាលរាជធានីភ្នំពេញ ដែលមានមន្ទីរសាធារណការ និងដឹកជញ្ជូនរាជធានីភ្នំពេញ បានធ្វើការចាក់បេតុងឡើងវិញឆ្អឹងដែក១២លី កម្រាស់២តឹក និងការដាក់លូមូល អង្គត់ផ្ចិត១,៥ម៉ែត្រទឹកហូ ចំនួន ១ខ្សែ ប្រវែងជាង១០០០ម៉ែត្រ លើកំណាត់ផ្លូវលេខ៣៦ ជាប់ជាមួយផ្លូវលេខ៩៩ ដល់កែងជាមួយតំបន់ស្ពានអាកាស ប្ញស្សីកែវ ទំនាក់ទំនងទឹកហូរបានលឿនមកប្រឡាយអូវែង តភ្ជាប់មកស្ថានីយ៍បូមគីឡូម៉ែត្រលេខ៩ថ្មី នៅក្នុងខណ្ឌប្ញស្សីកែវ។

លោក បុន ត្រា ប្រជាពលរដ្ឋបានអោយដឹងថា ពួកគាត់ត្រេកអរ និងរំភើប ដោយបានឃើញផ្លូវបេតុងដ៏រឹងមាំមួយខ្សែនេះ ត្រូវបានស្ថាបនាជិតរួចរាល់ ។  ព្រោះកន្លងមក ផ្លូវនេះមានការលំបាកខ្លាំងក្នុងការធ្វើដំណើរ ជាពិសេសនៅរដូវវស្សា ។ ប៉ុន្តែពេលនេះ ក្រោមការដឹកនាំ និងការគិតគូរហ្មត់ចត់ពីសំណាក់អាជ្ញាធរ លំបាកទាំងឡាយត្រូវបានដោះស្រាយ។

ជាមួយគ្នានោះអាជ្ញាធរបានបញ្ជាក់ថា គម្រោងផែនការហេដ្ឋារចនាសម្ព័ន្ឋ ប្រព័ន្ឋលូ និងប្រព័ន្ឋរំដោះទឹកសម្រាប់បញ្ចៀសការជន់លិចក្នុងភូមិសាស្ត្ររាជធានីភ្នំពេញ (សម្រេចបាន៧៥%ហើយ) ។ គម្រោងនេះ នឹងពង្វាងទឹកពី តំបន់ផ្លូវជាតិលេខ៥ ជ្រោយចង្វារ និងតំបន់សាលាសង្កាត់ប្ញស្សីកែវ ជាពិសេសនឹងកាត់បន្ថយទឹកលិចដោយទឹកភ្លៀងនៅភូមិសាស្ត្រសហគមន៍តូចៗ ផ្លូវលេខ៣៦ និងផ្លូវលេខ៩៩ ជាប់ផ្លូវជាតិលេខ៥ ខណ្ឌប្ញស្សីកែវ ៕ អត្ថបទ ៖ រដ្ឋា