រោងចក្រដែលមានកម្មករយ៉ាងតិច៨០%ចាក់វ៉ាក់សាំងគ្រប់ដូសមិនតម្រូវឱ្យបែងចែកវេនការងារឡើយ ក្រោយបញ្ចប់ការបិទខ្ទប់

ក្រោយបញ្ចប់ការបិទខ្ទប់រាជធានីភ្នំពេញ និងក្រុងតាខ្មៅនៅថ្ងៃទី៥ ខែឧសភា ឆ្នាំ២០២១ ក្រសួងការងារ និងបណ្ដុះបណ្ដាលវិជ្ជាជីវៈបានដាក់ចេញនូវវិធានការសំខាន់ៗចំនួន១៤ចំណុចសម្រាប់រោងចក្រសហគ្រាសអនុវត្ត នៅពេលបើកដំណើរការសកម្មភាពអាជីវកម្មឡើងវិញ ដើម្បីធានាទប់ស្កាត់ការឆ្លងរាលដាលនៃជំងឺកូវីដ១៩នៅក្នុងប្រទេសកម្ពុជា។

ក្នុងចំណោមវិធានការសំខាន់ៗទាំងអស់នោះរួមមាន ការបែងចែកកម្មករនិយោជិតចំនួន៥០ភាគរយនៃកម្មករនិយោជិតសរុបឱ្យធ្វើការឆ្លាស់វេនគ្នារៀងរាល់ពីរសប្ដាហ៍ម្ដង។ ដោយឡែក លក្ខខណ្ឌនៃការបែងចែកវេនការងាររៀងរាល់២ សប្ដាហ៍ម្ដង ត្រូវបានលើកលែងចំពោះរោងចក្រ ដែលមានកម្មករនិយោជិតយ៉ាងតិច៨០%នៃចំនួនកម្មករនិយោជិតសរុបបានទទួលវ៉ាក់សាំងការងារជំងឺកូវីដ១៩គ្រប់ដូស ឫប្រភេទរោងចក្រដែលមានវិធានការសុខភាព និងសុវត្ថិភាពការងារតឹងរឹងក្នុងការការពារកម្មករនិយោជិតពីការកើត ឫឆ្លងជំងឺកូវីដ១៩ និងទទួលបានការអនុញ្ញាតពីអធិការការងារ។

ក្រៅពីនេះ វិធានការសំខាន់ៗផ្សេងទៀតមានដូចជា ការផ្ដល់ប្រាក់ឈ្នួលចំនួន៥០%នៃប្រាក់ឈ្នួលអប្បបរមា ដោយរក្សាទុកនូវអត្ថប្រយោជន៍ប្រចាំខែ និងអត្ថប្រយោជន៍ផ្សេងៗដែលនិយោជិតធ្លាប់ទទួលបានជាដើម។

អត្ថបទ៖ វ៉ាត វិន