ព័ត៌មានជាតិ

សារមន្ទីរ3D បង្ហាញពីអរិយធម៌អង្គរនឹងបើកដំណើរការនាពេលឆាប់ៗខាងមុខនៅខេត្តសៀមរាប

បានផុស

៦ នាទី មុន

នៅ

ថ្ងៃសៅរ៍ ១៨ កក្កដា ២០២៦

ដោយ

នាយិកាប្រតិបត្តិរបស់ក្រុមហ៊ុន Legendary Entertainment and Culture Group លោកស្រី Anne Zhao បានជម្រាបជូននាយករដ្ឋមន្ត្រីកម្ពុជាពីគម្រោងបើកជាផ្លូវការនូវសារមន្ទីរ Immersive Angkor ដែលជាសារមន្ទីរប្រើបច្ចេកវិទ្យាទំនើបដំបូងគេបង្អស់នៅកម្ពុជានាំអ្នកទស្សនាទៅក្នុងពិភព 3D នៃអរិយធម៌អង្គរ ដែលនឹងអាចបើកដំណើរការជាផ្លូវការនៅចុងឆ្នាំ២០២៦ ឬដើមឆ្នាំ២០២៧ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី Anne Zhao បានបញ្ជាក់ក្នុងជំនួបជាមួយសម្ដេចធិបតី ហ៊ុន ម៉ាណែត កាលពីថ្ងៃទី១៦ ខែកក្កដា នាទីក្រុងសៀងហៃថា Immersive Angkor នៅខេត្តសៀមរាបនឹងក្លាយជាគម្រោងទាក់ទាញទេសចរដ៏លេចធ្លោមួយនៅកម្ពុជា ក៏ដូចជាការផ្សព្វផ្សាយអរិយធម៌របស់កម្ពុជាទៅកាន់ពិភពលោកផងដែរ។

ក្នុងជំនួបនោះសម្ដេចធិបតី ហ៊ុន ម៉ាណែត បានវាយតម្លៃខ្ពស់ចំពោះការមកបណ្ដាក់ទុននៅខេត្តសៀមរាបរបស់ក្រុមហ៊ុន Legendary Entertainment and Culture ក៏ដូចជាការរួមចំណែកជួយផ្សព្វផ្សាយទេសចរណ៍ និងអរិយធម៌កម្ពុជាទៅកាន់ពិភពលោក។ សម្ដេចបានបង្ហាញការគាំទ្រដោយថាកន្លងមកសម្ដេចបានប្រគល់ភារកិច្ចទៅឱ្យក្រសួងទេសចរណ៍ និងក្រសួងវប្បធម៌ ក្នុងការបង្កើតសកម្មភាពចម្រុះបន្ថែមនៃទេសចរណ៍មកកម្ពុជាឱ្យកាន់តែច្រើនឡើង។

សារមន្ទីរ Immersive Angkor គឺជាសារមន្ទីរដែលបង្កើតរូបភាពនិមិត្តដែលមានមុំ៣៦០ដឺក្រេ និងទម្រង់ 3D ផ្សេងទៀតដែលផ្ដល់រូបភាពថ្មីដល់អ្នកទស្សនាសារមន្ទីរ។ កាលពីឆ្នាំ២០២១ ដោយមានកិច្ចសហការជាមួយអាជ្ញាធរជាតិអប្សរា ក្រុមហ៊ុននេះបានប្រើប្រាស់ Drone សម្រាប់ស្កេនកម្រិតធំ និងបច្ចេកវិទ្យាដែលផ្ដល់រូបភាពច្បាស់កម្រិតខ្ពស់ថតស្កេនលើប្រាសាទអង្គរ ទាំងមូល ដែលពីដំបូងគ្រោងបើកដំណើរការនៅឆ្នាំ២០២២ តែត្រូវបានពន្យារពេលដល់បច្ចុប្បន្នដោយសារបញ្ហានៃការរីករាលដាលនៃជំងឺកូវីដ១៩៕