ក្រសួងធនធានទឹក និងឧតុនិយមច្រានចោលការផ្សព្វ​ផ្សា​យរបស់ជនអនាមិក ជុំវិញស្ថានភាពអាកាសធាតុនៅកម្ពុជា

ក្រសួងធនធានទឹក និងឧតុនិយម នៅថ្ងៃទី ១០ ខែឧសភានេះ បានប្រកាសច្រានចោលការផ្សព្វផ្សាយរបស់ជនអនាមិកមួយចំនួន ដែលបានបង្កើតផេកហ្វេសប៊ុកឈ្មោះ Cambodia Weather Service ដែលបានបង្ហោះព័ត៌មានមួយចំនួន ជុំវិញអាកាសធាតុ ដែលមិនត្រឹមត្រូវ នាំឱ្យមានការយល់ច្រឡំពីប្រជាពលរដ្ឋ និងមហាជន។

ក្រសួងធនធានទឹក បញ្ជាក់ថា សម្រាប់ស្ថានភាពអាកាសធាតុទូទៅ ក៏ដូចជាស្ថានភាពទឹកជំនន់ទន្លេមេគង្គ ក្រសួងធន ធានទឹក និងឧតុនិយម តែមួយគត់ដែលជាស្ថាប័នរដ្ឋរបស់រាជរដ្ឋាភិបាល តែងតែចេញផ្សាយ តាមសេចក្តីជូនដំណឹង ឬសេចក្តីប្រកាសព័ត៌មាន និងបង្ហោះតាមផេកផ្លូវការរបស់ក្រសួងដែលមានឈ្មោះថា “ក្រសួងធនធានទឹក និងឧតុនិយម\Ministry of Water Resource and Meteorology”។

ក្រសួងធនធានទឹក បញ្ជាក់ថា រាល់ផេកទាំងឡាយ ឬគណនីហ្វេសប៊ុកណាមួយដែលបានបង្ហោះ និងធ្វើករផ្សព្វផ្សាយពីស្ថានភាពអាកាសធាតុនៅក្នុងប្រទេសកម្ពុជា មិនមែនជាពិតនោះឡើយ ហើយសូមឱ្យសាធារណជនកុំមានការភ័ន្តច្រឡំ។

ក្រសួងធនធានទឹកលើកឡើងថា “តាមរយៈការផ្សព្វផ្សាយព័ត៌មានអាកាសធាតុ ដែលមិនមែនជាស្ថាប័នទទួលខុសត្រូវ របស់រាជរដ្ឋាភិបាល ក្រសួងធនធានទឹក និងឧតុនិយម សូមច្រានចោលទាំងស្រុង និងមិនទទួលខុសត្រូវនោះឡើយ និងចាត់ទុកថាជាចេតនាមួយរបស់ជនអនាមិកទាំងនោះ នាំឱ្យមានការយល់ខុស និងបង្កជាចលនា លើស្ថានភាពជាក់ស្តែងនៅក្នុងប្រទេសកម្ពុជា”។

ក្រសួងធនធានទឹកព្រមានថា នឹងចាត់វិធានការផ្លូវច្បាប់ ចំពោះបុគ្គលទាំងឡាយណា ដែលនៅតែបន្តការបង្ហោះផ្សព្វផ្សា​យព័ត៌មាន ស្តីពីស្ថានភាពអាកាសធាតុមិនពិតនេះ ក្នុងបំណងទុច្ចរិតណាមួយ ដើម្បីទាក់ទាញចំណាប់អារម្មណ៍ ឬដើម្បីបំភាន់មតិសាធារណជន៕ អត្ថបទ៖ ឡេង ដេត