សម្ដេច ស ខេង ជំរុញមន្រ្តីពន្លឿនការដោះស្រាយជូនពលរដ្ឋសល់ជាង៤៣០ករណី

ភ្នំពេញ៖ សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃបានជំរុញឱ្យមន្រ្តីពាក់ព័ន្ធទាំងអស់ត្រូវបង្កើនការដោះស្រាយ មតិយោបល់ ឬសំណូមពររបស់ប្រជាពលរដ្ឋដែលបានស្នើមកក្នុងទំព័រហ្វេសប៊ុកផ្លូវការរបស់សម្តេចឱ្យបានលឿន និងទាន់ពេលវេលា ខណៈនៅសល់ចំនួន ៤៣៨ករណីទៀតនៅមិនទាន់បានដោះស្រាយនៅឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមនាយឧត្តមសេនីយ៍ ជា សុគន្ធា ប្រធានក្រុមការងារតាមដានការដោះស្រាយមតិយោបល់ ឬសំណូមពររបស់មហាជន ក្នុងគេហទំព័រហ្វេសប៊ុករបស់ សម្ដេចក្រឡាហោម ស ខេង បានឱ្យដឹងថា នៅក្នុងខែមេសា ឆ្នាំ២០២១ កន្លងទៅនេះ ក្រុមការងារ បានបញ្ជូន មតិយោបល់ ឬសំណូមពររបស់មហាជន ទៅបណ្ដាអង្គភាពពាក់ព័ន្ធ ដើម្បីធ្វើការដោះស្រាយចំនួន ៥៤ករណីបន្ថែមទៀត ក្នុងនោះបានដោះស្រាយ និងឆ្លើយតប ចំនួន២០ ករណី និងកំពុងដោះស្រាយចំនួន ៤៣៨ករណី។

សម្ដេចក្រឡាហោម ស ខេង បានលើកឡើងតាមរយៈទំព័រហ្វេប៊ុករបស់សម្តេច ដោយបានស្នើដល់មន្ត្រីនៃអង្គភាពចំណុះក្រសួងមហាផ្ទៃ ព្រមទាំងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិត្រូវបន្តសកម្មភាពនេះបន្ថែមទៅមុខទៀតដើម្បីដោះស្រាយបញ្ហានានារបស់ប្រជាពលរដ្ឋដែលកំពុងជួបប្រទះនាពេលបច្ចុប្បន្ន។

សម្ដេចក្រឡាហោម បានថ្លែងអំណរគុណដល់បងប្អូនប្រជាពលរដ្ឋទាំងអស់ដែលបានលើកជាមតិយោបល់ និងសំណូមពរ តាមរយៈទំព័រហ្វេសប៊ុករបស់សម្ដេច និងបានទទួលយកនូវដំណោះស្រាយរបស់សមត្ថកិច្ច ដែលនេះបានបង្ហាញពីការចូលរួមរបស់ប្រជាពលរដ្ឋ ដើម្បីអភិវឌ្ឍសង្គមជាតិឱ្យកាន់តែមានភាពរីកចម្រើន។

លើសពីនេះសម្ដេចក្រឡាហោមបានសម្ដែងនូវការកោតសរសើរ និងវាយតម្លៃខ្ពស់ចំពោះកិច្ចសហការប្រកបដោយការទទួលខុសត្រូវខ្ពស់របស់ថ្នាក់ដឹកនាំ និងមន្ត្រីនៃអង្គភាពចំណុះក្រសួងមហាផ្ទៃ ព្រមទាំងស្ថាប័នពាក់ព័ន្ធទាំងថ្នាក់ជាតិ និងថ្នាក់ក្រោមជាតិ ក្នុងការឆ្លើយតបចំពោះមតិយោបល់ កង្វល់ និងសំណូមពរនានារបស់មហាជន ជាមួយក្រុមការងារទំព័រហ្វេសប៊ុករបស់សម្តេចដើម្បីសម្រួលដល់ជីវភាពរស់នៅរបស់ប្រជាពលរដ្ឋនៅក្នុងមូលដ្ឋាន និងឈានទៅអភិវឌ្ឍសង្គមជាតិឱ្យកាន់តែមានភាពរីកចម្រើមបន្ថែមទៀត៕

អត្ថបទ៖ សំអឿន