ពលរដ្ឋនៅ​ភ្នំពេញជាង ១លាន ៦​ សែន​នាក់ បាន​ចាក់​វ៉ាក់សាំង​រួចទាំងពីរ​ដូស

ភ្នំពេញ៖ រដ្ឋបាលរាជធានី បានបញ្ជាក់ថា រហូតមកដល់ពេលនេះ ដំណើរការចាក់វ៉ាក់សាំងការពារជំងឺកូវីដ១៩ ជូនប្រជាពលរដ្ឋដែលមានអាយុចាប់ពី១៨ឆ្នាំឡើងទៅ ក្នុងរាជធានីភ្នំពេញ បានចំនួន ១,៦៣៣,២៦២នាក់ (សរុបទាំងពីរលើក) គិតត្រឹមថ្ងៃទី២៤ ខែឧសភា ឆ្នាំ២០២១។

ដើម្បីបង្កើត​ភាព​ស៊ាំ​កាត់បន្ថយ​អត្រា​ឆ្លង​លើ​ប្រជាពលរដ្ឋ​ រដ្ឋបាលរាជធានីភ្នំពេញបើកយុទ្ធនាការ​សម្រក​ចាក់​វ៉ាក់សាំង​ក្នុង​ខណ្ឌទាំង ១៤ ដើម្បីជំរុញការចាក់វ៉ាក់សាំងជូនដល់ប្រជាពលរដ្ឋដែលមានអាយុ១៨ឆ្នាំឡើងទៅ ក្នុងរាជធានីភ្នំពេញ ឲ្យបានគ្រប់ៗគ្នា យ៉ាងយូរបំផុតក្នុងអំឡុងខែមិថុនា ឆ្នាំ២០២១ ស្របតាមការកំណត់របស់រាជរដ្ឋាភិបាល។

ជាមួយ​គ្នា​ ក្រសួ​ងការងារ​និង​បណ្តុះបណ្តាល​វិជ្ជាជីវៈ ក៏​បាន​អំពាវនាវដល់ម្ចាស់រោងចក្រ សហគ្រាស ឬក្រុមហ៊ុនឯកជនទាំងអស់ ត្រូវអនុញ្ញាតឲ្យបុគ្គលិករបស់ខ្លួន ទៅទទួលយកវ៉ាក់សាំងបង្ការជំងឺកូវីដ១៩ តាមការអញ្ជើញរបស់អាជ្ញាធរមូលដ្ឋាន៕

អត្ថបទ៖ ស្រីរ័ត្ន