ចាប់ខ្លួនបុរសម្នាក់​តាំងខ្លួនជាជំនួយការចៅក្រម​បោកយកប្រាក់ពលរដ្ឋខ្ទង់ម៉ឺនដុល្លារ

សមត្ថកិច្ចកងរាជអាវុធហត្ថ​ ក្រុង​ប៉ោយប៉ែត នៅថ្ងៃទី ៩ ខែមិថុនានេះ បានធ្វើការឃាត់​ខ្លួន​បុរស​ម្នាក់ ដែលតាំងខ្លួនជាជំនួយការចៅក្រម ហើយបោក​ប្រាស់យក​ប្រាក់ពី​ប្រជាពលរដ្ឋច្រើននាក់ខ្ទង់ម៉ឺនដុល្លារ។

ការឃាត់ខ្លួន បាន​ធ្វើ​ឡើង​តាម​ពាក្យ​បណ្ដឹងជនរងគ្រោះ ៣ នាក់ ឈ្មោះ ស៊ុ ម៉ាលី ភេទស្រី អាយុ២៦ឆ្នាំ ឈ្មោះ វុទ្ធីវណ្ណថា ភេទប្រុស អាយុ ២៩ ឆ្នាំ និង សួន ស៊ីម៉ាប់ អាយុ ៤១ឆ្នាំ។

​​បុរសជនសង្ស័យ មានឈ្មោះ នី ឆេងឡេង អាយុ ២៤ ឆ្នាំ រស់នៅភូមិក្បាលស្ពាន១ សង្កាត់​ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ បានតាំងខ្លួនជា​ជំនួយ​ការ​ចៅក្រម នៅ​សាលា​ដំបូងខេត្ត ហើយដើរឃោសនារត់ការឯកសារផ្សេងៗ ជាថ្នូរនឹងការ​យកលុយថ្លៃសេវា​ពីពលរដ្ឋ​ខ្ទង់ម៉ឺនដុល្លារ។ ជនសង្ស័យក្រោយពីឃាត់ខ្លួនហើយបានបញ្ជូនមកទីបញ្ជាការកងរាជអាវុធហត្ថខេត្តដើម្បីសួរចម្លើយបន្ត។

លោកវរសេនីយ៍ឯក ម៉ែន ភិរម្យ មេបញ្ជាការរងទទួលការងារយុត្តិធម៌ បានបញ្ជាក់ឱ្យដឹងថា​ “បុរស​ជន​សង្ស័យ​បានឆ្លើយ​សារភាពថា នៅថ្ងៃទី៣ ខែមេសា ឆ្នាំ២០២១ រូបគេបានមកធ្វើការ​ផ្នែកជំនួយ​ការ​ចៅក្រមនៅសានលាដំបូងខេត្តបន្ទាយមានជ័យ រហូតដល់ថ្ងៃទី៨ ខែ​ឧសភា ឆ្នាំ២០២១ រូបគេបានបោកយកប្រាក់អ្នកនៅក្នុងក្រុងប៉ោយប៉ែតបានជាបន្តបន្ទាប់ ដោយរូប​គេអះ​អាងថា ខ្លួនជាក្រឡាបញ្ជី និងជាជំនួយការផ្ទាល់របស់លោកចៅក្រម អាំង ចិន្ដា ពេល​នោះ​មាន​មនុស្សជាច្រើនជឿជាក់លើរូបគេ ហើយបានពឹងពាក់ខ្លួនឱ្យជួយរត់ការប្លង់ដី ដោយ​ឱ្យ​ប្រាក់​ចំនួន ​២ ៨០០ដុល្លារ អ្នកខ្លះឱ្យរត់ការធ្វើស្លាកលេខរថយន្ត និងដោះស្រាយម៉ូតូ រូបគេយក​ប្រាក់​ ១ ៣០០​ ដុល្លា និងអ្នកខ្លះទៀតឱ្យរត់ការរឿងលែងលះប្ដី ប្រពន្ធ រូបគេយកប្រាក់បានចំនួន ១ ២៥០​ដុល្លារ លុយ​ទាំងនោះ​មិន​បាន​លទ្ធផល​អ្វីមកវិញព្រោះខ្លួនយកទៅចាយអស់”។

ក្រោយពីបានបញ្ចប់ការស៊ើបអង្កេតសមត្ថកិច្ចរកឃើញថា ជនសង្ស័យឈ្មោះ នី ឆេងឡេង ពិត​ជា​បាន​ប្រព្រឹត្ត​បទល្មើស ឆបោក ពិតប្រាកដមែន ហើយសមត្ថកិច្ចកំពុងកសាងសំណុំរឿងបញ្ជូនទៅតុលាការចាត់ការតាមច្បាប់៕ អត្ថបទ៖ វ៉ាន់ ណាង