សម្ដេច ទៀ បាញ់៖ ដំណក់ប្រេងដំបូង គឺជាប្រវត្តិសាស្ត្រថ្មី ក្នុងសម័យតេជោសន្តិភាព

សម្ដេចពិជ័យសេនា ទៀ បាញ់ មានប្រសាសន៍នៅថ្ងៃទី ០៩ ខែ មិថុនា ឆ្នាំ២០២១នេះថា ដំណក់ប្រេងលើកដំបូង គឺជាប្រវត្តិសាស្ត្រថ្មីមួយ នៅក្នុងសម័យតេជោសន្តិភាព ដែលកម្ពុជាទទួលបាន មានភស្តុតាងនិងពេលវេលាពិតប្រាកដអំពីការរុករកឃើញដំណក់ប្រេង។

សម្ដេច ទៀ បាញ់ មានប្រសាសន៍ នៅក្នុងសន្និសីទសារព័ត៌មាន ក្រោយពីពិធីប្រគល់ និងទទួលតំណក់ប្រេងលើកដំបូង នាវិមានសន្តិភាពនាព្រឹក ថ្ងៃទី០៩ ខែមិថុនា។ សម្ដេចបញ្ជាក់ថា ក្រៅពីសមិទ្ធិផលនេះ មានជាច្រើនរាប់មិនអស់ ដែលកម្ពុជាទទួលបាននៅក្នុងសម័យតេជោសន្តិភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពាក់ព័ន្ធនឹងក្រុមហ៊ុនរុករកប្រេង សម្ដេចទៀ បាញ់មិនបានឆ្លើយតបនោះទេ ប៉ុន្តែសម្ដេចគ្រាន់តែជឿជាក់ថា គ្រប់ការងារទាំងអស់ ជូនកាលវាមិនអាចប្រព្រឹត្តទៅដោយរលូននោះទេ អាចមានបញ្ហានេះបញ្ហានោះ តែរាជរដ្ឋាភិបាល នឹងមានវិធានការដោះស្រាយតាមការជាក់ស្ដែង។

ចំពោះការលើកឡើងពីជនអគតិមួយចំនួន ដែលលើកឡើងពីបណ្ដាសានៅពេលរកឃើញដំណក់ប្រេងនោះ សម្ដេចពិជ័យសេនាទាបានបានអះអាងថា វាជារឿងធម្មតារបស់ពួកគេទៅហើយ ពីព្រោះវាមិនមែនត្រឹមតែរឿងប្រេងនោះទេ មានរឿងជាច្រើនទៀត ដែលពួកគេបានលើកឡើងផ្ទុយពីការពិត ដើម្បីរារាំងដល់ការអភិវឌ្ឍ ក៏ដូចជាការរីកចម្រើនរបស់ប្រទេសកម្ពុជា ហើយគេមានគម្រោងគ្រប់ពេលវេលាទាំងអស់ឱ្យតែអ្វីដែលអាចបំភ្លេចបំផ្លាញការរីកចម្រើនរបស់ប្រទេសកម្ពុជា។

បើតាមសម្ដេចពិជ័យសេនា ទៀ បាញ់ ករណីនេះស្ទើរតែក្លាយទៅជារឿងធម្មតារបស់ពួកគេទៅហើយ តែយើងឯនេះវិញ ពេលដែលយើងមានសុខសន្តិភាព មានស្ថេរភាព គឺមានគុណតម្លៃខ្លាំងណាស់ មិនអាចកាត់ថ្លៃបានទេ។ ដោយឡែកអ្វីដែលកំពុងលេចធ្លោឡើងបន្ថែមទៀតនៅពេលនេះ វារឹតតែធ្វើឱ្យយើងសាទរបន្ថែមទៀត៕ អត្ថបទ៖ កោះកែវ