ស្ថានីយជញ្ជីងអចល័តថ្មី នឹងត្រូវបង្កើតនៅផ្លូវជាតិលេខ៧៦ ខេត្តមណ្ឌលគិរី

ក្នុងគោលបំណងកាត់បន្ថយការខូចខាតផ្លូវជាតិ និងគ្រោះថ្នាក់ចរាចរណ៍ដែលបណ្តាលមកពីការដឹកជញ្ជូនលើសទម្ងន់កម្រិតកំណត់ ក្រសួងសាធារណការ និងដឹកជញ្ជូន នឹងសាងសង់ស្ថានីយជញ្ជីងអចល័តថ្មីមួយនៅបណ្តោយផ្លូវជាតិ​លេខ៧៦ នៃទឹកដីខេត្តមណ្ឌលគិរី ។

លោក សេង ឈួន រដ្ឋលេខាធិការក្រសួងសាធារណៈការ និងដឹកជញ្ជូន និងជាប្រធានគណកម្មាធិការសម្របសម្រួលអចិន្ត្រៃយ៍ នៃគណកម្មាធិការដឹកនាំការត្រួតពិនិត្យយានយន្តដឹកជញ្ជូនលើសទម្ងន់កម្រិតកំណត់ បានដឹកនាំគណៈ​ប្រតិភូក្រសួង អាជ្ញាធរខេត្ត និងមន្រ្តីពាក់ព័ន្ធ បានចុះពិនិត្យទីតាំងសម្រាប់សាងសង់ស្ថានីយជញ្ជីងអចល័តថ្មីមួយ នៅបណ្តោយផ្លូវជាតិលេខ៧៦ ស្ថិតក្នុងចំណុចគីឡូម៉ែត្រលេខ១៦៥ ក្នុងភូមិពូតាង ឃុំពូជ្រៃ ស្រុកពេជ្រដា ខេត្តមណ្ឌលគិរី កាលពីថ្ងៃពុធ ៧កើត ខែបឋមាសាឍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី១៦ ខែមិថុនា ឆ្នាំ២០២១ ។

ការសាងសង់ស្ថានីយជញ្ជីងអចល័តថ្មីនេះ នឹងជួយត្រួតពិនិត្យយានយន្តដឹកទំនិញលើផ្លូវជាតិលេខ៧៦ ដើម្បីកាត់បន្ថយការខូចខាតផ្លូវជាតិ និងគ្រោះថ្នាក់ចរាចរណ៍ដែលបណ្តាលមកពីការដឹកជញ្ជូនលើសទម្ងន់កម្រិតកំណត់ដោយច្បាប់ ៕

អត្ថបទ ៖ រ៉ាវុទ្ធ