ស្ថានីយថ្លឹងយានយន្ត ខេត្តព្រះវិហារចាប់ផ្តើមសាងសង់ ដែលនឹងអាចឱ្យផ្លូវប្រើប្រាស់បានយូរអង្វែង

ព្រះវិហារ៖ គម្រាងសាងសង់ស្ថានីយថ្លឹងយានយន្ត (ស្ថានីយ៍អូរពោធិ៍-ខេត្តព្រះវិហារ) លើផ្លូវជាតិលេខ៦២ គីឡូម៉ែត្រ៥២+០០០ ភូមិអូរពោធិ៍ ឃុំរមណី ស្រុករវៀង ខេត្តព្រះវិហារ នៅពេលនេះបានចាប់ផ្ដើមសាងសង់ជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីសាងសង់ស្ថានីយថ្លឹងយានយន្តនេះបានរួចរាល់ ផ្លូវមួយចំនួននៅក្នុងខេត្តព្រះវិហារនឹងប្រើប្រាស់បានយូរអង្វែង ដោយសារតែមិនមានរថយន្តដឹកលើសទម្ងន់បំផ្លិចបំផ្លាញផ្លូវទៀត។
លោក សំ លាងទ្រី ប្រធានមន្ទីរសាធារណការនិងដឹកជញ្ជូនខេត្តព្រះវិហារបានឱ្យដឹងថា ថ្ងៃនេះក្រុមការងារនៃមន្ទីរសាធារណការ និងដឹកជញ្ជូនខេត្តព្រះវិហារ បន្តកាយបកដីគ្មានគុណភាព ត្រង់កន្លែងផ្លូវឡានរត់ និងកន្លែងជាប់ពាក់ព័ន្ធដ៏ទៃទៀត លើគម្រាងសាងសង់ស្ថានីយថ្លឹងយានយន្ត (ស្ថានីយ៍អូរពោធិ៍-ខេត្តព្រះវិហារ) លើផ្លូវជាតិលេខ៦២នេះ។

លោក សំ លាងទ្រី បានសំណូមពរពុកម៉ែបងប្អូនដែលជាអ្នកបើកបរតាមដងផ្លូវទាំងអស់ សូមចូលរួមគោរពច្បាប់ចរាចរណ៍ផ្លូវគោកទាំងអស់គ្នា ពោលគឺមិនត្រូវបើកបរលើសល្បឿន ផ្ទុកលើសកំណត់ មិនត្រូវបើកបរវ៉ាជែងទាំងប្រថុយប្រថាន មិនត្រូវបើកបរក្នុងស្ថានភាពស្រវឹង មិនត្រូវដឹកលើកទម្ងន់កំណត់ ឫដឹកសំពីងសំពោង ពិសេសត្រូវពាក់ខ្សែរក្រវ៉ាត់ការពារខ្លួនជានិច្ចមុនពេលបើកបរ និងសូមចូលរួមប្រយុទ្ធប្រឆាំងជំងឺកូវីដ-១៩ ដោយត្រូវអនុវត្តឱ្យបានទៀងទាត់តាមការណែនាំរបស់ក្រសួងសុខាភិបាល និងអនុវត្តវិធានការរាជរដ្ឋាភិបាល ៣កុំនិង៣ការពារ ដើម្បីការពារខ្លួនយើង ក្រុមគ្រួសារ និងសហគមន៍យើងពីការឆ្លងរាលដាលជំងឺកូវីដ-១៩៕

អត្ថបទ៖ ស្រីរ័ត្ន