ត្រឹមមួយថ្ងៃម្សិលមិញ ខេត្តព្រៃវែងមានអ្នកស្លាប់ដោយជំងឺកូវីដចំនួន៣អង្គ\នាក់

ខេត្តព្រៃវែងជាខេត្តមួយដែលមានករណីឆ្លងជំងឺកូវីដច្រើនក្នុងចំណោមខេត្តដ៏ទៃទៀត​ និងមានអ្នក​ស្លាប់ជាបន្តបន្ទាប់ផងដែរ។

យោងតាមរបាយករណ៍របស់រដ្ឋបាលខេត្តបានបង្ហាញថា នៅថ្ងៃទី២១ ខែមិថុនា ឆ្នាំ២០២១ ម្សិល​មិញ​នេះ ខេត្តព្រៃវែងមានអ្នកស្លាប់ដោយជំងឺកូវីដ-១៩ ចំនួន៣ អង្គ\នាក់ ដែលជាចំនួនមិនធ្លាប់មាន​ពីមុនមក។

អ្នកស្លាប់ដោយជំងឺកូវីដ-១៩ នៅថ្ងៃទី២១ ខែមិថុនា ម្សិលមិញនេះមានព្រះសង្ឃមួយអង្គ ព្រះនាម​គន់ ហ៊ាង គង់នៅ​វត្ត​ពោធិ៍​ស្នាយ ភូមិ​គ្រួស ឃុំ​ឃ្នេ​ស ស្រុក​មេសាង ខេត្តព្រៃវែង បាន​សុ​គត​នៅ​វេលាម៉ោង៨និង០០នាទីព្រឹក ​ថ្ងៃទី​២១ ខែមិថុនា ឆ្នាំ​២០២១ ​ក្នុង​ជន្មាយុ​២៣​ព្រះវស្សា។ ចំណែក​ជនរង​គ្រោះពីរនាក់ទៀតជាប្រជាពលរដ្ឋរស់នៅស្រុកព្រះស្ដេច និងស្រុកស្វាយអន្ទរ នៃខេត្ត​ព្រៃវែង។

តាមការសន្និដ្ឋានរបស់ក្រុមគ្រូពេទ្យបានបញ្ជាក់ថា ជនរងគ្រោះទាំង៣នាក់ ស្លាប់វិបត្តិផ្លូវដង្ហើម​ធ្ងន់​ធ្ងរ និងរលាកសួតទាំងសងខាង ដោយជំងឺកូវីដ-១៩។

សូមបញ្ជាក់ថា គិតត្រឹមថ្ងៃទី២១ ខែមិថុនា ឆ្នាំ២០២១ នេះ ខេត្តព្រៃវែងមានអ្នកឆ្លងជំងឺកូវីដ-១៩ សរុបចំនួន​១,២២៣​នាក់ ព្យាបាលជាសះស្បើយចំនួន៧៥១នាក់ កំពុងសម្រាកព្យាបាល៤៥៥នាក់ និងស្លាប់១៧នាក់៕

អត្ថបទ ៖ សុខុម

​