ព័ត៌មានជាតិ
ប្រមុខរដ្ឋាភិបាល ស្តីបន្ទោសមន្ត្រីសុខាភិបាលរឿងផ្អឹបទុកសម្ភារៈធ្វើតេស្តរហ័សកូវីដ-១៩
មានប្រសាសន៏តាមសារពិសេសនាព្រឹកថ្ងៃទី០១ ខែកក្កដា ឆ្នាំ២០២១នេះប្រមុខរដ្ឋាភិបាលសម្តេចតេជោ ហ៊ុន សែន បានស្តីបន្ទោសឲ្យមន្រ្តីសុខាភិបាលទាក់ទងផ្អឹបទុកសម្ភារៈធ្វើតេស្តរហ័ស ដើម្បីរកជំងឺកូវីដ-១៩ ដោយសម្តេចបានបញ្ជាក់ថា សម្តេចឲ្យទិញសម្ភារៈនេះមក មិនមែនឲ្យទិញមកដេកអោបទេ ធ្វើបែបនេះ មិនខុសពីបញ្ជូនទ័ពឡើងច្បាំង ហើយខ្វះអាវុធនោះទេ។
សម្ដេចតេជោ ហ៊ុន សែន បានលើកពីវិធានការទីពីរ គឺការធ្វើតេស្តរហ័ស ហើយក៏ត្រូវតែនិយាយអំពីការធ្វើតេស្តនេះឲ្យច្រើនបន្តិចផងដែរ។ សម្ដេចបានលើកយកការទទួលខុសត្រូវចំពោះប្រជាជន ដោយមិនទុកឱ្យផ្នែកសុខាភិបាលជាប់ជាមួយ នឹងសតិអារម្មណ៍អភិរក្សនិយម គ្មានការប្រែប្រួលនោះទេ។
សម្ដេចបញ្ជាក់ថា “ការធ្វើតេស្តរហ័សត្រូវតែផ្ដល់មធ្យោបាយនៃការធ្វើតេស្តរហ័សនេះ។ ដូច្នេះគ្រប់ច្រកព្រំដែនទាំងអស់ត្រូវមានប្រដាប់ ដើម្បីធ្វើតេស្តរហ័ស។ ក្រៅពីការធ្វើតេស្តរហ័ស បើមានករណីសង្ស័យត្រូវធ្វើតេសដោយម៉ាស៊ីនធំ។ ក្រសួងសុខាភិបាលត្រូវទទួលខុសត្រូវឱ្យច្បាស់លាស់។ អត់មានគេឡើងមកម្ដងសុំ២០០០ ឲ្យគេ១០០០ អត់និយាយគ្នាបានទេអាកន្លែងហ្នឹង។… ខ្ញុំទូរសព្ទទៅលោកជំទាវ យក់ សម្បត្តិ ខ្ញុំបានប្រាប់ថា ខ្ញុំបានឲ្យទិញយកមក មិនមែនឱ្យដេកឱបទេ ខ្ញុំទូរស័ព្ទទៅតាមខេត្ត ខេត្តប៉ុន្មានថ្ងូរឱ្យរហឺស។ សុំ៣០០០ ឱ្យ១០០០ សុំ២០០០ ឱ្យ១០០០។ ពីរតនគិរីឡើងមកបានត្រឹម១០០០។ ក្រសួងឱ្យហើយ តែអាអ្នកថែឃ្លាំងនោះ វាយ៉ាប់ទៅទៀត។ បានខ្ញុំបញ្ជា មួយខេត្តយ៉ាងហោចណាស់ឱ្យ១០០០០”។
បើតាមសម្ដេចតេជោ ហ៊ុន សែន សម្ភារៈធ្វើតេស្តរហ័សនៅក្នុងឃ្លាំងមកដល់ពេលនេះមានចំនួន១១៤៤៤៥០ ហើយនៅសល់១លានទៀត នឹងដឹកមកដល់នាប៉ុន្មានថ្ងៃខាងមុខនេះ ហើយមាន៣សែនទៀត នៅក្នុងស្តុកពីយុទ្ធសាស្ត្រផ្ទាល់របស់សម្ដេច។ សម្តេចថា “ខ្ញុំបានប្រាប់ទៅលោកជំទាវ យក់ សម្បត្តិ ខ្ញុំថាធ្វើរបៀបនេះវាអត់ខុសពីការដែលបញ្ជូនកងទ័ព មេទ័ពទៅច្បាំង ហើយខ្វះគ្រាប់ ខ្វះអាវុធនោះទេ”។
ជាមួយគ្នានោះសម្ដេចបានស្នើឲ្យយកចិត្តទុកដាក់ឲ្យច្បាស់លាស់លើបញ្ហានេះ កុំឲ្យកន្លែងធ្វើតេស្តនៅព្រំដែន ប្រដាប់ធ្វើតេស្តនៅក្នុងឃ្លាំងស្តុក។ សម្តេចបញ្ជាក់ដែរថា “ខ្ញុំសូមនិយាយឲ្យច្បាស់ថ្ងៃនេះជាមួយគ្នា ពេលវេលានេះ មិនមែនជាពេលវេលាស្ដីបន្ទោសទេ ប៉ុន្តែជាពេលវេលានៃការកែតម្រូវ។ សម្ភារៈមានទុកក្នុងឃ្លាំងទុកធ្វើអី ? តាំងពីអាំងទីវ៉ាទ័រ តាំងពីប្រដាប់នេះប្រដាប់នោះ ខ្ញុំស្រែកម្ដងចេញបានម្ដង ស្រែកពីរដង ចេញបានពីរដង ខ្ញុំស្រែកបីដង ចេញបានបីដង…។ លុយវាមិនខ្វះទេ រដ្ឋាភិបាល ហ៊ុន សែន មិនទាន់ដល់ថ្នាក់រលំដោយសារកូវីដនោះទេ ប៉ុន្តែអ្វីដែលបានកើតឡើងហើយ ខ្ញុំត្រូវតែធ្វើការកែតម្រូវ”។
សូមបញ្ជាក់ថា មួយរយៈចុងក្រោយនេះ ដោយសាតែមានការរីករាលដាលនៃជំងឺកូវីដ១៩ បំប្លែងខ្លួនថ្មី រាជរដ្ឋាភិបាលបានសម្រេចឲ្យបណ្តាខេត្តនៅតាមព្រំដែន ត្រូវធ្វើតេស្ត ក៏ដូចជាធ្វើចត្តាឡីស័កនៅតាមព្រំដែន ដោយមិនឲ្យដឹកមនុស្សចូលក្នុងប្រទេសនោះទេ ដែលបញ្ហានេះបានតម្រូវឲ្យអាជ្ញាធរខេត្តនៅជាប់ព្រំ មានតម្រូវការសម្ភារៈធ្វើតេស្តរហ័សនេះកើនឡើង៕ កោះកែវ
-
ព័ត៌មានជាតិ៣ ថ្ងៃ ago
អ្នកឧកញ៉ា គួច ម៉េងលី÷ បើមិននាំខ្លួនមេខ្លោងក្រុមហ៊ុន CIC Plc មកផ្ដន្ទាទោសទេ ពលរដ្ឋនឹងលែងជឿប្រព័ន្ធយុត្តិធម៌កម្ពុជា
-
ព័ត៌មានជាតិ២០ ម៉ោង ago
ទ្រព្យសកម្មរបស់ក្រុមហ៊ុន CIC Plc ប្រមាណ ៩០% នៃចំនួនទឹកប្រាក់សរុប ត្រូវបានប្រមូលមកវិញ
-
ព័ត៌មានអន្ដរជាតិ៦ ថ្ងៃ ago
Breaking News! បណ្ដាញសង្គម Facebook មានបញ្ហានៅទូទាំងពិភពលោកជាថ្មី
-
កីឡា៦ ថ្ងៃ ago
ជើងឯកម៉ុងហ្គោលី Erdene អរគុណបុរសធ្លាប់ដឹកដៃ ឈឿង ល្វៃ ធ្វើឲ្យក្តីស្រមៃក្លាយជាការពិត
-
ជីវិតកម្សាន្ដ៥ ថ្ងៃ ago
ខេមរៈ សិរីមន្ត ៖ «ទោះខ្ញុំមិនមែនជាអ្នកធំ តែសុំធ្វើកិច្ចការធំខ្លះជូនជាតិតាមវិជ្ជាជីវៈសិល្បៈ បង្ហាញទៅពិភពលោក»
-
សន្តិសុខសង្គម២ ថ្ងៃ ago
សមត្ថកិច្ចស្រុកស្វាយលើ ឃាត់ខ្លួនប្តីប្រពន្ធ ១គូសង្ស័យរួមគំនិតសម្លាប់កូនខ្លួនឯង អាយុទើបតែ ២២ខែ
-
ព័ត៌មានជាតិ១ ថ្ងៃ ago
ដីជាង ៤៣ ហិកតា នៅភូមិសាស្ត្រភ្នំ ១៥០០ ត្រៀមដាំស្ដារព្រៃឈើឡើងវិញ
-
សន្តិសុខសង្គម១ ថ្ងៃ ago
បឋម៖ អគ្គិភ័យកំពុងឆេះផ្ទះពលរដ្ឋក្នុងបុរីពិភពថ្មីកំបូល