ត្រៀមនាំអំណោយសប្បុរសជនយកទៅប្រើប្រាស់ សកម្មភាពមនុស្សធម៌ ជួយដល់ពលរដ្ឋ ជួបការលំបាកដោយសារកូវីដ

លោកជំទាវកិត្តិសង្គហបណ្ឌិត ម៉ែន សំអន ឧបនាយករដ្ឋមន្រ្តី រដ្ឋមន្រ្តីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ចបានថ្លែងថា អំណោយរបស់សប្បុរសជនដែលបានជួយឧបត្ថម្ភជាហូរហែរកន្លងមកថ្មីៗនេះនឹងត្រៀមនាំយកទៅប្រើប្រាស់ សកម្មភាពមនុស្សធម៌ ជួយដល់ពលរដ្ឋដែលជួបការលំបាកលើបញ្ហាជីវភាពដោយសារជម្ងឺរាតត្បាតកូវីដ ១៩ នៅតាមមូលដ្ឋានខេត្តស្វាយរៀងបន្តទៀត។

លោកជំទាវកិត្តិសង្គហបណ្ឌិត ម៉ែន សំអន ថ្លែងបែបនេះខណៈអញ្ជើញទទួលអង្ករចំនួន ១០តោន និងមី២០កេសធំ ពីលោក Kevin Hsu អគ្គនាយក ក្រុមហ៊ុន LIXIN GROUP នៅទីស្តីការក្រសួងនាល្ងាចម្សិលមុិញ។

ក្នុងនាមរាជរដ្ឋាភិបាលកម្ពុជា និងក្នុងនាមលោកជំទាវកិត្តិសង្គហបណ្ឌិតផ្ទាល់ ក៏បានថ្លែងអំណរគុណយ៉ាងជ្រាលជ្រៅ ជូនចំពោះ លោក Kevin Hsu អគ្គនាយក ក្រុមហ៊ុន LIXIN GROUP ជាវិស័យឯកជន ដែលបានចូលរួមយ៉ាងសកម្មជាមួយរាជរដ្ឋាភិបាល។ ស្បៀងអាហារនេះពិតជាមានសារៈសំខាន់បំផុតសម្រាប់បរិភោគប្រចាំថ្ងៃក្នុងពេលចូលរួមក្នុងយុទ្ធនាការប្រឆាំងនឹងជំងឺរាត្បាតកូវីដ១៩ នៅមូលដ្ឋានខេត្តស្វាយរៀង។ លោកជំទាវកិត្តិសង្គហបណ្ឌិតបានបន្តទៀតថា អំណោយសប្បុរសធម៌នេះ នឹងយកទៅប្រើប្រាស់ សកម្មភាពមនុស្សធម៌ ជួយដល់ប្រជាពលរដ្ឋដែលជួបការលំបាកដោយគ្រោះធម្មជាតិ និងគ្រោះមហន្តរាយផ្សេងៗផងដែរ ។

លោកជំទាវកិត្តិសង្គហបណ្ឌិត ក៏បានជូនពរឲ្យក្រុមហ៊ុនក៍ដូចសប្បុរសជននានាដែលបានជួយឧបត្ថម្ភមកក្រសួងទំនាក់ទំនងជាហូរហែរមកនេះ សូមទទួលបានការគាំទ្រកាន់តែច្រើន ពីអតិថិជននិងជោគជ័យក្នុងការងារមុខជំនួននៅកម្ពុជា ហើយក៏សូមឲ្យក្រុមហ៊ុមបន្តជួយដល់រាជរដ្ឋាភិបាលបន្ថែមទៀតលើការងារមនុស្សធម៌ដ៍ថ្លៃថ្លានេះ ៕

អត្ថបទ៖វិមាន