ប្រកាស​​បិទ​ផ្សា​រលើ​ក្រុង​កំពង់ឆ្នាំង​ ក្រោយមានផ្ទុះជំងឺ​កូវីដ-១៩

រដ្ឋបាល​ខេត្តកំពង់ឆ្នាំង​បាន​សម្រេច​បិទ​ជា​បណ្តោះអាសន្ន​ផ្សា​រលើដែលស្ថិតនៅក្នុងភូមិ​ត្រពាំង​បី​ សង្កាត់​ផ្សារឆ្នាំង​ ក្រុង​កំពង់ឆ្នាំង​ ខេត្តកំពង់ឆ្នាំងចាប់ពី​ថ្ងៃ​ទី​១០​ ខែកក្កដា​ ឆ្នាំ​២០២១​នេះ​ទៅ ក្រោយមានផ្ទុះជំងឺកូវីដ-១៩ ។

លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានឱ្យដឹងនៅក្នុងសេចក្តីជួនដំណឹងចុះថ្ងៃទី១០កក្កដានេះថា « ត្រូវបានបិទជាបណ្ដោះអាសន្នផ្សាលើក្រុងកំពង់ឆ្នាំងចាប់ពីថ្ងៃទី១០ខែកក្កដាឆ្នាំ ២០២១នេះតទៅ រហូតដល់មានការសម្រេចជាថ្មី ហើយការបិទជាបណ្ដោះអាសន្នទីតាំងខាងលើនេះ ដើម្បីទប់ស្កាត់ការរាលដាលនៃជំងឺកូវីដ១៩ក្នុងព្រឹត្តិការណ៍​សហគមន៍២០កុម្ភៈ បន្ទាប់ពីបានរកឃើញអ្នកវិជ្ជមានធ្លាប់បានចេញចូលទីតាំងខាងលើ»។

លោក អភិបាលខេត្តបាន បន្តថា ក្នុងអំឡុងពេលបិទជាបណ្ដោះអាសន្ននេះ រដ្ឋបាលខេត្តបានដាក់ចេញវិធានការមួយចំនួនដូចជាបិទទីតាំងផ្សារលើទាំងមូល ផ្អាកសកម្មភាពលក់ដូរនិងការចេញចូលទីតាំងនេះតម្រូវឱ្យអាជីវករផ្សារទាំងអស់ធ្វើចត្តាឡីស័កនៅតាមលំនៅដ្ឋាន និងទីសំណាក់រៀងៗខ្លួនឱ្យបានហ្មត់ចត់ តាមការណែនាំរបស់ក្រសួងសុខាភិបាល និងស្រាវជ្រាវរកអ្នកពាក់ព័ន្ធផ្ទាល់ឬប្រយោលដើម្បីធ្វើចត្តាគីស័កនិងយកសំណាក។

លោក អភិបាលខេត្តបានបន្តទៀតថា ចំពោះបងប្អូនប្រជាពលរដ្ឋដែលធ្លាប់ចេញចូលនិងអ្នកមានការពាក់ព័ន្ធផ្ទាល់ឬប្រយោលនៅទីតាំងខាងលើត្រូវតាមដានសុខភាពរបស់ខ្លួនជាប្រចាំនិងសូមប្រញាប់ទំនាក់ទំនងមកក្រុមការងារមន្ទីរពេទ្យខេត្តកំពង់ឆ្នាំងឬមណ្ឌលសុខភាពដែលនៅជិតបំផុតដើម្បីយកសំណាកធ្វើតេស្តជាបន្ទាន់ចាប់ថ្ងៃទី១០ខែកក្កដាឆ្នាំ២០២១នេះតទៅរៀងរាល់ម៉ោងធ្វើការនិងត្រូវធ្វើចត្តាឡីស័កស្របតាមការណែនាំរបស់ក្រសួងសុខាភិបាល៕

អត្ថបទ៖ សំអឿន