ចេញ​អូប័រ​សង្គ្រោះស្ត្រីមានផ្ទៃ​ពោះ​​​រអិលដួលសន្លប់ ទាំងភ្លៀងខ្យល់ រលកខ្លាំង

ស្ត្រីមានផ្ទៃពោះវ័យ ២៥ ឆ្នាំ រស់នៅលើកោះរ៉ុងសន្លឹម ខេត្តព្រះសីហនុ បានជួបឧប្បត្តិហេតុវិលមុខរអិលដួល ហើយត្រូវការជំនួយសង្គ្រោះបន្ទាន់នៅមន្ទីរពេទ្យ ស្របពេលដែលអាកាសធាតុមានភ្លៀង ខ្យល់ និងរលកធំៗ។

ស្ត្រីរងគ្រោះឈ្មោះ សែត ចន្ថា អាយុ ២៥ ឆ្នាំ ជាប្រជាពលរដ្ឋ រស់នៅនៅភូមិកោះរ៉ុងសន្លឹម សង្កាត់កោះរ៉ុងសន្លឹម ក្រុងកោះរ៉ុង។

លោកឧកញ៉ា ទៀ វិចិត្រ សមាជិក​ក្រុម​ការ​ងារ​យុវជន​គណបក្ស​ប្រជាជនកម្ពុជា ខេត្ត​ព្រះសីហនុ បានឱ្យដឹងថា ស្ត្រីរងគ្រោះវិលមុខហើយរអិលដួលសន្លប់ ហើយត្រូវការជំនួយសង្គ្រោះបន្ទាន់ ដូច្នេះក្រុមការងារ​សង្គ្រោះរបស់លោក បានចេញដំណើរភ្លាមៗ ដឹកបញ្ជូនមកមន្ទីរពេទ្យបើ ទោះបីមានភ្លៀងខ្លាំង មានខ្យល់កន្រ្ទាក់ កម្ពស់រលកធំៗ ក៏ដោយការជួយសង្គ្រោះជីវិតមនុស្សគឺត្រូវតែធ្វើឲ្យលឿនបំផុត។

ស្រ្តីរងគ្រោះត្រូវបានដឹកតាមអូប័រពេទ្យល្បឿនលឿនមកដល់ដីគោកក្រុងព្រះសីហនុ ហើយដឹកបន្តតាមរថយន្តសង្គ្រោះក្រុមហ៊ុនGTVC របស់លោកឧកញ៉ាផ្ទាល់ យកទៅសង្រ្គោះនៅមន្ទីពេទ្យបង្អែកខេត្តព្រះ​សីហនុនៅល្ងាចថ្ងៃដដែល។ឥឡូវប្អូនស្រីបានបញ្ជូនមកដល់មន្ទីរពេទ្យបង្អែកខេត្តព្រះសីហនុដោយសុវត្ថិភាពហើយ។

លោកឧកញ៉ា ទៀ វិចិត្រ ឱ្យដឹងបន្ថែមថា បច្ចុប្បន្នដើម្បីងាយស្រួលក្នុងការជួយ សង្គ្រោះ ពលរដ្ឋដែល ត្រូវការសង្គ្រោះបន្ទាន់ក្រៅពីអូប័រពេទ្យល្បឿនលឿនលោកឧកញ៉ាក៏បានទិញរថយន្តសង្គ្រោះថ្មីនិងទំនើបសេរីឆ្នាំ២០២១ មួយគ្រឿងទៀត មកបម្រើការងារជួយសង្រ្គោះប្រជាពលរដ្ឋផងដែរ៕ ដោយៈ កោះពស់