ខេត្តចំនួន២២ទៀតអនុញ្ញាតឱ្យព្យាបាលអ្នកជំងឺកូវីដ-១៩កម្រិតស្រាល នៅតាមផ្ទះ

ភ្នំពេញ៖ ក្រសួងសុខាភិបាលបានអនុញ្ញាតឱ្យខេត្តចំនួន ២២ទៀត ត្រៀមរៀបចំការអនុវត្តការព្យាបាលអ្នកជំងឺកូវីដ-១៩កម្រិតស្រាល នៅតាមផ្ទះ បន្ទាប់ពីរាជធានីភ្នំពេញ ខេត្តកណ្តាល និងខេត្តបន្ទាយមានជ័យបាន និងកំពុងរៀបចំ និងដាក់ដំណើរការរួចរាល់។

ក្រសួងសុខាភិបាល​ នៅថ្ងៃទី៣០ ខែកក្កដា ឆ្នាំ២០២១នេះ បានចេញប្រកាស ស្តីពី ការដាក់ឱ្យប្រើនីតិវិធីប្រតិបត្តិស្ដង់ដារសម្រាប់គ្រប់គ្រង ថែទាំ និងព្យាបាលអ្នកជំងឺកូវីដ-១៩ នៅតាមផ្ទះ ដោយអនុញ្ញាតិ ខេត្តចំនួន២២ទៀតត្រូវបានដាក់ គ្រប់គ្រងថែទាំ និងព្យាបាលអ្នកជំងឺ​កូវីដ-១៩ កម្រិតស្រាល និងគ្មានរោគសញ្ញានៅតាមផ្ទះ។ ខេត្តទាំងនោះរួមមាន ខេត្តបាត់ដំបង ប៉ៃលិន ពោធិ៍សាត់ កំពង់ឆ្នាំង កោះកុង ព្រះសីហនុ កំពត កែប តាកែវ កំពង់ស្ពឺ សៀមរាប ឧត្តរមានជ័យ ព្រះវិហារ កំពង់ធំ កំពង់ចាម ត្បូងឃ្មុំ ក្រចេះ ស្ទឹងត្រែង រតនគីរី មណ្ឌលគីរី ព្រៃវែង និងស្វាយរៀង។

ក្រសួងបានណែនាំដល់អភិបាលនៃគណៈអភិបាលខេត្តត្រូវពិនិត្យ និងរៀបចំលក្ខណៈសម្បត្តិ និងពេលវេលាសមស្រប ដើម្បីដាក់ឱ្យដំណើរការព្យាបាលអ្នកជំងឺកូវីដ-១៩ ស្រាល និងគ្មានរោគសញ្ញានៅផ្ទះក្នុងភូមិសាស្ត្រខេត្តនីមួយៗ៕

អត្ថបទ៖ សំអឿន