អភិបាលខេត្តស្វាយរៀង ចុះពិនិត្យការរៀបចំ ហេដ្ឋារចនាសម្ព័ន្ធ ច្រាំងទន្លេវ៉ៃគោ និងការពង្រីកផ្លូវលេខ ៣១៤

(ស្វាយរៀង)៖ បើទោះជាស្ថានភាពជំងឺកូវីដ-១៩ មិនទាន់មានភាពធូរស្រាលក៏ដោយ ក៏ផែនការអភិវឌ្ឍខេត្តរបស់ស្វាយរៀង នៅតែបន្តបោះជំហានទៅមុខជានិច្ច។ ជាក់ស្តែងនៅថ្ងៃទី២ ខែសីហា ឆ្នាំ២០២១ លោក ម៉ែន វិបុល អភិបាលខេត្តស្វាយរៀង បានចុះពិនិត្យការរៀបចំហេដ្ឋារចនាសម្ព័ន្ធ ច្រាំងទន្លេវ៉ៃគោ ផ្នែកខាង​លិច ប្រវែង៨១៥ម៉ែត្រ ស្ថិតក្នុងក្រុងស្វាយរៀង ដើម្បីរៀបចំក្រាលការ៉ូឡា សួនច្បារ កន្លែងបំពាក់សម្ភារៈហាត់ប្រាណទីសាធារណៈ ទីតាំងវេទិការអ៊ុទូក និងការរៀបចំភ្លើងបំភ្លឺលម្អនាពេលរាត្រីជាដើម។ ក្នុងការចុះត្រួតពិនិត្យនេះ ក៏មានការចូលរួមពីលោកអភិ​បាលរងខេត្ត លោកនាយកទីចាត់ការហិរញ្ញវត្ថុសាលាខេត្ត លោកប្រធានមន្ទីរសាធារណការ និងដឹកជញ្ជូនខេត្ត រួមទាំងជំនាញពាក់ព័ន្ធមួយចំនួនទៀត។

បន្ទាប់មកទៀតលោកអភិបាលខេត្ត បានបន្តពិនិត្យការជួសជុលពង្រីក ផ្លូវលេខ៣១៤ មានប្រវែង៣,៥៨០​ម៉ែត្រ ទទឹង១១ម៉ែត្រ ចាប់ពីខាងលិចស្ពានតាហោ រហូតដល់ចំណុចសួនច្បារច្រមុះជ្រូក ផ្លូវជាតិលេខ១ សង្កាត់​សង្ឃ័រ ក្រុងស្វាយរៀង ដើម្បីឲ្យមានភាពធំទូលាយ សម្រួលដល់ការធ្វើចរាចរណ៍ របស់ប្រជាពលរដ្ឋ។

សូមជម្រាបថា លោក ម៉ែន វិបុល អភិបាលខេត្តស្វាយរៀង បានយកចិត្តទុកដាក់ កសាងនូវសមិទ្ធផលធំៗជាច្រើននៅក្នុងខេត្ត ដែលបានចូលរួមចំណែកក្នុងការអភិវឌ្ឍ ជាមួយរាជរដ្ឋាភិបាលកម្ពុជា ដែលមានសម្តេច​តេជោ ហ៊ុន សែន ជាប្រមុខដឹកនាំដ៏ឈ្លាសវ៉ៃ នាំមកនូវសន្តិភាព និងការអភិវឌ្ឍលើគ្រប់វិស័យ។

ជាក់ស្តែងច្រាំទន្លេវ៉ៃគោ បាននឹងកំពុងបោះជំហាន ស្ថាបនាទៅមុខពេលនេះ គឺបានចូលរួមយ៉ាងសំខាន់ លើ​ការលើកកម្ពស់សោភ័ណ្ឌភាព ក្នុងខេត្តឲ្យកាន់តែមានភាពស្រស់បំព្រង។ មិនត្រឹមតែប៉ុណ្ណោះ បានចូលរួមចំណែក ក្នុងការលើកកម្ពស់វិស័យទេសចរណ៍ សុខមាលភាពសង្គម ដូចជា៖ ផ្ដល់នូវទីតាំងសមស្របសម្រា​ប់ ការទស្សនាការប្រណាំងទូក ជាទីកម្សាន្តលំហែអារម្មណ៍ និងហាត់កីឡា របស់ប្រជាពលរដ្ឋជាដើម៕ (ដោយ)៖ ភក្ដី