មកដល់ពេលនេះ ក្រុមអ្នកជំនួញ បានជួយទិញផ្លែមៀន ពីប្រជាកសិករ ចំនួន២០តោនហើយ

ក្រុមអ្នកជំនួញនៅក្នុង «ក្លឹបសេដ្ឋធុរជន» បានជួយទិញផ្លែមៀនពីប្រជាកសិករ នៅស្រុកភ្នំព្រឹក នៃខេត្តបាត់ដំបង បាន​ចំនួន២០តោនហើយ ដែលពីដំបូងយុទ្ធនាការទិញ គឺមានត្រឹមតែ១០តោនប៉ុណ្ណោះ។​ ប៉ុន្តែដោយសារ មានអ្នក​ជួយ​ទិញបន្តច្រើន ទើបក្រុមអ្នកជំនួញ «ក្លឹបសេដ្ឋធុរជន» បានបន្តជួយទិញមៀនភ្នំព្រឹក រហូតដល់២០​តោនយ៉ាង​ដូច្នេះ​។ នេះបើតាមលោក ឌិន សុមេធារឹទ្ធ ប្រធានសមាគមសណ្ឋាគារកម្ពុជា និងជាប្រធាន «ក្លឹបសេដ្ឋធុរជន» ដែល​​បាន​ថ្លែងប្រាប់អ្នកសារព័ត៌មានកម្ពុជាថ្មី នៅរសៀលថ្ងៃទី១៤ ខែសីហា ឆ្នាំ២០២១នេះ។

លោក ឌិន សុមេធារឹទ្ធ បានឲ្យដឹងបន្តថា គិតត្រឹមពេលនេះ ក្រុមរបស់លោក បានទិញផ្លែមៀនពីប្រជាកសិករ នៅស្រុ​ក​​ភ្នំព្រឹក បានជាង២០តោនហើយ។ ចំពោះការទិញនេះ មិនមែន​ចង់​បាន​ផលចំណេញ ពីពួកគាត់ឡើយ តែជា​ការ​ជួយ​​ពួកគាត់ ក្នុងគ្រាលំបាកនេះប៉ុណ្ណោះ។ ក្នុងនោះដែរ ប្រសិនបើមានតម្រូវការបន្តទៀត ក្រុមរបស់លោក នឹងជួយទិញបន្តទៀតដែរ។  

អ្នកជំនួញល្បីឈ្មោះរូបនេះ បានថ្លែងយ៉ាងដូច្នេះថា «អញ្ចឹងហើយ ចង់និយាយយកមក ឥឡូវហ្នឹង២០តោនជាង គេទិញអស់ហើយ សុទ្ធតែជាអ្នកស្គាល់ៗ ហើយមានអ្នកទិញ១តោន កន្លះតោន ទិញប៉ុន្មានរយគីឡូ ១០ ២០គីឡូក៏​មានអញ្ចឹងណា៎ ៥គីឡូក៏មានអញ្ចឹងទៅ អញ្ចឹងសរុបទៅវាបាន២០ជាងតោន មែនទែនដំបូងខ្ញុំទទួលតែ១០តោនទេ ប៉ុន្តែដល់ពេលផ្អើល ដំបូងថាទិញធម្មតាៗទេ ដល់តែពេលម្នាក់ៗចេះតែជួយផ្សព្វផ្សាយទៅ វាក៏កើតទៅជារឿងធំ»។

លោក ឌិន សុមេធារឹទ្ធ បានប្រាប់ឲ្យដឹងបន្តថា ពីដំបូងឡើយ ក្រុមរបស់លោកគ្រោង ជួយទិញតែ១០តោន ឬស្មើ​នឹង​១​​ម៉ឺន​ដុល្លារប៉ុណ្ណោះ តែពេលឥឡូវឡើងដល់ទៅជាង២០តោន ឬស្មើជាង២ម៉ឺនដុល្លារហើយ។ លោក ថា ប្រសិ​ន​បើមានគេជួយទិញទៀត ក្រុមរបស់លោក នឹងបន្តជួយទិញពីប្រជាកសិករបន្តទៀតដែរ។

សូមជម្រាបថា ដោយសារបញ្ហាការរីករាលដាល នៃជំងឺកូវីដ-១៩ ប្រទេសថៃ បានបិទមិនឲ្យនាំចូលផ្លែមៀន ទៅកាន់​ប្រទេសគេ ហើយទើបធ្វើឲ្យប្រជាកសិករ ដែលជាអ្នកដាំមៀនជួបបញ្ហាលំបាក ក្នុងការលក់ចេញ ស្របពេលរដូវ​ប្រមូលផល​ បានចាប់ផ្ដើម។  

គួររំលឹកដែរថា ក្រសួងកសិកម្ម រុក្ខាប្រមាញ់ និងនេសាទ បានអំពាវនាវដល់ អ្នកនាំចេញផ្លែមៀនប៉ៃលិន គួរបង្វែរទិសដៅពីប្រទេសថៃ ទៅប្រទេសវៀតណាមវិញ ពីព្រោះក្រសួងមានការឯកភាពគ្នា លើលក្ខខណ្ឌតម្រូវភូតគាមអនាម័យ ជាមួយវៀតណាមរួចហើយ។

យោងតាមសេចក្តីជូនដំណឹង របស់ក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗនេះ បានឲ្យដឹងថា មូលហេតុដែលធ្វើឲ្យ មានបញ្ហាប្រឈមមិនទាន់ អាចធ្វើការនាំចេញផ្លែមៀនប៉ៃលិន ទៅកាន់ទីផ្សារក្រៅប្រទេសបាន ដោយ​សារបញ្ហារីករាលដាល នៃជំងឺកូវីដ-១៩ និងរបាំងភូតគាមអនាម័យ ជាពិសេសប្រទេសថៃ កំពុងបិទមិនឲ្យនាំចូលមៀនប៉ៃលិន តាមច្រកព្រំដែន ខណៈផ្លែមៀនប៉ៃលិន កំពុងចាប់ផ្តើមប្រមូលផល៕ (ដោយ)៖ ឃួន សុភ័ក្រ