ព័ត៌មានជាតិ

កម្លាំងសមត្ថកិច្ចចុះអប់រំអ្នកលក់ដូរនិងរឹតបន្តឹងបម្រាមគោចរ

បានផុស

៥ years មុន

នៅ

ថ្ងៃព្រហស្បតិ៍ ១៩ សីហា ២០២១

ដោយ

ដោយអនុវត្តតាមសេចក្តីសម្រេចរបស់រដ្ឋបាលខេត្ត នៅថ្ងៃទី១៩ ខែសីហានេះ កម្លាំងអាវុធហត្ថខេត្ត សហការជាមួយកម្លាំងនគរបាលខេត្ត ចុះអប់រំណែនាំអ្នកលក់ដូរ និងរឹតបន្តឹងបម្រាមគោចរក្នុងក្រុងស្ទឹងត្រែង និងនៅតាមព្រំប្រទល់ ក្រុង ស្រុកចំនួន៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ែន គង់ អ្នកនាំពាក្យសាលាខេត្ត បានបញ្ជាក់ថា ក្នុងពេលបិទខ្ទប់បណ្ដោះអាសន្នរយៈពេល០៧ថ្ងៃ ចាប់ពីយប់ថ្ងៃទី១៧ ខែសីហា វេលាម៉ោង២៣:៥៩នាទី ប្រជាពលរដ្ឋជាអ្នកលក់ដូរ គឺត្រូវចូលរួមគោរពតាមបម្រាមគោចរ និងបិទអាជីវកម្មលក់ដូរជាបណ្ដោះអាសន្ន ជាពិសេសហាមជួបជុំផឹកស៊ី ល្មើសនឹងបម្រាមគោចរ។

លោកបានបញ្ជាក់បន្ថែមទៀតថា ក្នុងអំឡុងពេលនៃការដាក់ចេញវិធានការរដ្ឋបាល ត្រូវបានអនុវត្តបម្រាមគោចរ ដោយផ្អាកជាបណ្ដោះអាសន្ន មិនឱ្យចេញពីផ្ទះរាល់ការធ្វើចរាចរណ៍ និងរាល់សកម្មភាពការងារ មុខរបរ ឬអាជីវកម្ម លើកលែងតែករណីចាំបាច់មានដូចជា ដឹកជញ្ជូនគ្រឿងបរិក្ខាវិទ្យាសាស្ត្រ កត្តាសុខភាពបន្ទាន់ អ្នកជំងឺចេញពីមន្ទីរពេទ្យ -ផ្ដល់វត្ថុសំណាកធ្វើតេស្ដរកជំងឺកូវីដ-១៩ ទៅទទួលវ៉ាក់សាំង-ដឹកចំណីអាហារជូនអតិថិជននិងទៅមណ្ឌលចត្តាឡីស័ក ជាដើម ដោយមានការសម្របសម្រួល របស់អាជ្ញាធរមានសមត្ថកិច្ច។

លោកបន្តថា ការបិទខ្ទប់នេះ ក្នុងគោលបំណងដើម្បីទប់ស្កាត់ និងកាត់ផ្ដាច់ការឆ្លងរាលដាលនូវមេរោគបំប្លែងខ្លួនថ្មី ប្រភេទដែលតា (Delta) នៅក្នុងសហគមន៍តែប៉ុណ្ណោះ។

សូមបញ្ជាក់ថា ក្នុងពេលបិទខ្ទប់ នៅថ្ងៃទី១៨ ខែសីហា ម្សិលមិញនេះ ក៏មានអ្នកល្មើស នឹងបម្រាមគោចរប្រមូលផ្ដុំគ្នាលេងល្បែង(ឆ្នោត ឡូតូ5D6ខ្ទុង)ដោយគ្មានច្បាលិខិតអនុញ្ញាតត្រូវបានសមត្ថកិច្ចឃាត់ខ្លួនចំនួន១២នាក់បញ្ជូនទៅកាន់តុលាការផងដែរ៕

អត្ថបទ ៖ ងិនលីម