ព័ត៌មានជាតិ

ចាប់មុខសញ្ញាជួញដូរថ្នាំញៀន ប៉ះចំមុខសញ្ញាដែលមានដីកាឲ្យនាំខ្លួនរបស់តុលាការ

បានផុស

៥ years មុន

នៅ

ថ្ងៃអាទិត្យ ២២ សីហា ២០២១

ដោយ

ជនសង្ស័យម្នាក់ដែលតុលាការទើបចេញដីកាឲ្យសមត្ថកិច្ចស្វែងរកដើម្បីនាំខ្លួន ត្រូវបានកម្លាំងអធិការក្រុងឃាត់ខ្លួនបានទាំងយប់ ខណៈសង្ស័យថាជាមុខសញ្ញាជួញដូរថ្នាំញៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រតិបត្តិការដែលដឹកនាំបញ្ជាដោយលោកវរសេនីយ៍ឯក ពេជ្រ សារ៉ែន អធិការនគរបាលក្រុងបាត់ដំបង បានធ្វើឡើង កាលពីថ្ងៃទី២១ ខែសីហា ឆ្នាំ២០២១ វេលាម៉ោង៨ និង២០នាទីយប់ នៅចំណុចក្រុមទី៤ ភូមិរំចេក២ សង្កាត់រតនៈ ក្រុងបាត់ដំបង ខេត្តបាត់ដំបង។

នៅក្នុងកិច្ចប្រតិបត្តិការដែលកម្លាំងជំនាញផ្នែកប្រឆាំងគ្រឿងញៀន កំពុងចុះល្បាតក្នុងភូមិសាស្ត្រខាងលើ គឺបង្ក្រាបបានករណី រក្សាទុកដោយខុសច្បាប់នូវសារធាតុញៀន ០១ ករណី ក្នុងបទល្មើសជាក់ស្តែង ព្រមទាំងបានឃាត់ខ្លួនជនសង្ស័យ ចំនួន០១នាក់ ឈ្មោះ លឹម រ៉ូស្សា ហៅ យ៉ាកូ ភេទប្រុស អាយុ៣៥ឆ្នាំ មានទីលំនៅភូមិរំចេក១ សង្កាត់រតនៈ ក្រុងបាត់ដំបង ខេត្តបាត់ដំបង។ វត្ថុតាងដែលដកហូតបានរួមមាន ថ្នាំញៀនប្រភេទម៉ាទឹកកក ចំនួន០២ ថង់ ទម្ងន់ ១៥,៤៧ក្រាម ទូរសព្ទដៃចំនួន០១ គ្រឿង ម៉ូតូ ០១គ្រឿង ម៉ាកហុងដាអ៊ែប្លេត ពណ៌ក្រហមលាយខ្មៅ ពាក់ស្លាកលេខបាត់ដំបង 1M-2888 ។

គួរបញ្ជាក់ថា ជនសង្ស័យខាងលើ មានដីកាបង្គាប់ឲ្យនាំខ្លួនលេខ ២៨៧៤ ត.ព្រ ចុះថ្ងៃទី ០២ ខែមិថុនា ឆ្នាំ២០២១ របស់លោក អ៊ី សុវណ្ណ ចៅក្រមស៊ើបសួរ សាលាដំបូងខេត្តបាត់ដំបង ផងដែរ បច្ចុប្បន្នជនសង្ស័យរួមទាំងវត្ថុតាង ត្រូវបានកម្លាំងជំនាញរៀបចំឯកសារដើម្បីបញ្ជូនតាមនីតិវិធីហើយ៕

អត្ថបទ៖ សោ និយមរ័ត្ន

Related Topics:ខេត្តបាត់ដំបង