ព័ត៌មានជាតិ

តម្រូវការផលនេសាទ នៅកម្ពុជា កំពុងកើនឡើងខ្លាំង

បានផុស

៥ years មុន

នៅ

ថ្ងៃព្រហស្បតិ៍ ២៦ វិច្ឆិកា ២០២០

ដោយ

លោក អេង ជាសាន ប្រតិភូរាជរដ្ឋាភិបាលទទួលបន្ទុករដ្ឋបាលជលផល បានថ្លែងឲ្យដឹងថា ការងារវារីវប្បកម្មសម្រាប់ឆ្នាំ ២០២០ មានការកើនប្រមាណជា ៣០ភាគរយ ដែលអាចផ្គត់ផ្គង់តម្រូវការហូបចុកក្នុងស្រុកបានគ្រប់គ្រាន់ ប៉ុន្តែកម្ពុជា នៅតែមានតម្រូវការក្នុងការនាំចូលផលនេសាទសមុទ្រពីក្រៅប្រទេសប្រមាណ ជា ១៥,០០០តោន ក្នុង១ឆ្នាំៗ ដោយហេតុថា ផលនេសាទដូចជាមឹកយក្ស បង្កងយក្ស ក្តាមយក្ស ត្រីសាមុន និងត្រី ធូណា ជាដើម មិនមាននៅកម្ពុជានោះទេ។

លោក អេង ជាសាន បានឲ្យដឹងបែបនេះ នៅក្នុងនៅក្នុងសន្និសីទសារព័ត៌មានស្ដីពី «កិច្ចអន្តរាគមន៍ឆ្លើយតបនឹងការស្ដារឡើងវិញបន្ទាប់ពីគ្រោះអន្តរាយទឹកជំនន់ក្នុងផលិតកម្មកសិកម្ម» ដែលរៀបចំឡើងដោយអង្គ ភាពអ្នកនាំពាក្យរាជរដ្ឋាភិបាលនាព្រឹកថ្ងៃទី ២៦ខែវិច្ឆិកានេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អេង ជាសានបានមានប្រសាសន៍ថា រាជរដ្ឋាភិបាល និងក្រសួងកសិកម្មរុក្ខាប្រមាញ់ និងនេសាទ បានយកចិត្តទុកដាក់ខ្លាំងទៅលើការងារវារីវប្បកម្ម ដែលក្នុងរយៈ ពេល ៥ ឆ្នាំចុងក្រោយនេះ ការងារវារីវប្បកម្មនៅកម្ពុជា មានកំណើនជាមធ្យមប្រមាណ ២០ភាគរយ ក្នុងមួយឆ្នាំ។ ដោយឡែកឆ្នាំ ២០២០ នេះដោយមានការយកចិត្ត ទុកដាក់ជំរុញខ្លាំងពីប្រមុខរាជរដ្ឋាភិបាលផង ការងារវារីវប្បកម្ម មានកំណើនរហូតដល់៣០ភាគរយ ស្មើនិងទិន្នផល ៤០០ពាន់តោន ។

លោក អេង ជាសាន បានបន្តថា កន្លងមកប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានសម្រេចផ្ដល់ថវិកាចំនួនកន្លះលានដុល្លារ ស្មើនិងប្រមាណ២០០០ លានរៀល ដល់រដ្ឋបាលជលផលដើម្បីជួយដល់ប្រជាពលរដ្ឋនៅក្នុងខេត្តចំនួន១0 សម្រាប់ការចិញ្ចឹមត្រីអណ្តែងក្នុងតង់ និង ការចិញ្ចឹមអន្ទង់ ។

លោក អេង ជាសាន បានឲ្យដឹងថា មកដល់ពេលនេះរដ្ឋបាលជលផលបានផ្ដល់ឲ្យប្រជាពលរដ្ឋចិញ្ចឹមត្រីអណ្ដែងនៅក្នុងតង់ និងចិញ្ចឹមកង្កែប បានប្រមាណជាង ១ ពាន់គ្រួសារ ថែមទាំងពង្រីកទៅកាន់ខេត្តចំនួន៥ ទៀតនៅជុំវិញបឹងទន្លេសាប ៕

អត្ថបទ ៖ ណារី

Related Topics:រដ្ឋបាលជលផល