ព័ត៌មានជាតិ

គ.ជ.ប នឹងរៀបចំការបោះឆ្នោតសាកល្បងតាមប្រព័ន្ធបច្ចេកវិទ្យាព័ត៌មាននៅឆ្នាំ២០២១

បានផុស

៦ years មុន

នៅ

ថ្ងៃព្រហស្បតិ៍ ២៦ វិច្ឆិកា ២០២០

ដោយ

ការលើកឡើងរបស់ គ.ជ.ប បានធ្វើឡើងនៅក្នុងជំនួបលើកទី១ រវាងលោកស្រី ហារូកូ កាម៉ី (Haruko Kamei) ជាមួយលោក ស៊ិក ប៊ុនហុក ប្រធាន គ.ជ.ប នាថ្ងៃទី២៦ ខែវិច្ឆិកា ឆ្នាំ២០២០នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងជំនួបនោះ លោក ស៊ិក ប៊ុនហុក បានប្រាប់ប្រធានថ្មីនៃអង្គការ JICA ថា គ.ជ.ប នឹងរៀបចំការបោះឆ្នោតសាក ល្បងនៅឆ្នាំ២០២១ តាមប្រព័ន្ធបច្ចេកវិទ្យាព័ត៌មាន។

ជាមួយនឹងការលើកឡើងខាងលើនេះ លោក ស៊ិក ប៊ុនហុក បានស្នើសុំឲ្យមានកិច្ចសហការជាបន្តទៅទៀត ដោយស្នើសុំភាគីជប៉ុន បន្តជួយសម្ភារ បរិក្ខារ ដែលរួមមានកុំព្យូទ័រយួរដៃ២ពាន់គ្រឿង និង Power Bank ២ពាន់គ្រឿង ដើម្បីបម្រើឲ្យការបោះឆ្នោតសាកល្បងតាមប្រព័ន្ធបច្ចេកវិទ្យាព័ត៌មាន នៅឆ្នាំ២០២១។

បើតាមប្រធាន គ.ជ.ប រូបនោះគម្រោងសាកល្បងតាមប្រព័ន្ធបច្ចេកវិទ្យាព័ត៌មានរួមមាន ការចុះឈ្មោះគណបក្សនយោ បាយ និងបញ្ជីបេក្ខជន តាមប្រព័ន្ធអនឡាញ (Online), ការបូកសរុបលទ្ធផលនៃការបោះឆ្នោតតាមប្រព័ន្ធអនឡាញ (Online), ការបញ្ជូន និងការទទួល លទ្ធផលបោះឆ្នោតបឋម និងការស្រង់ឈ្មោះបេក្ខជនជាប់ឆ្នោតជាដើម។

លោក ស៊ិក ប៊ុនហុក អះអាងថា ប្រសិនបើការបោះឆ្នោតសាកល្បងក្នុងឆ្នាំ២០២១ ទទួលជោគជ័យ នោះការរៀបចំការបោះឆ្នោតនៅឆ្នាំ២០២២ និងឆ្នាំ២០២៣ ដោយប្រើប្រព័ន្ធបច្ចេកវិទ្យាទំនើប ក៏ទទួលបានជោគជ័យដែរ ហើយធ្វើឲ្យគ្រប់ភាគីទទួលយកលទ្ធផលនៃការបោះឆ្នោតដែលរៀបចំដោយ គ.ជ.ប។ លោកថា ការបោះឆ្នោត គឺជាស្នូលនៃលទ្ធិប្រជាធិបតេយ្យ ដូច្នេះបើយើងរៀបចំការបោះឆ្នោតបានល្អ នោះលទ្ធិប្រជាធិបតេយ្យកាន់តែល្អ និងរឹងមាំនៅកម្ពុជា។

លោកបានស្នើសុំជំនាញការ ៣រូប លើផ្នែកច្បាប់ បច្ចេកទេស និងផ្នែកបណ្ដុះបណ្ដាល និងអប់រំអ្នកបោះឆ្នោតផងដែរ។

ជាការឆ្លើយតប លោកស្រី ហារូកូ កាម៉ី (Haruko Kamei) នាយិកាអង្គការ JICA បានថ្លែងថា អង្គការ JICA បានទទួលរួចហើយកាលពីខែសីហា ឆ្នាំ២០២០ ដែល គ.ជ.ប បានដាក់តាមរយៈក្រុមប្រឹក្សាអភិវឌ្ឍន៍កម្ពុជា (CDC)។ ដោយសារអង្គការ JICA ជាអង្គការអនុវត្តជំនួយឥតសំណងរបស់ប្រទេសជប៉ុន ដូចនេះលោកស្រីនៅតែបន្តការអនុវត្តតាមគោលការណ៍របស់រដ្ឋាភិបាលជប៉ុន ក៏ដូចជាការងាររបស់ស្ថានទូតជប៉ុនប្រចាំកម្ពុជាផងដែរ។

សម្រាប់សំណើនេះ លោកស្រីពុំទាន់បានទទួលព័ត៌មានលម្អិតនៅឡើយទេ ពីព្រោះត្រូវរង់ចាំការសម្រេចពីរដ្ឋាភិបាលជប៉ុន ហើយលោកស្រីនឹងផ្ដល់ព័ត៌មានជាបន្តបន្ទាប់ដល់ គ.ជ.ប ប្រសិនបើទទួលបានចម្លើយវិជ្ជមាននៃសំណើនោះ បន្ទាប់មក លោកស្រីស្នើសុំឲ្យមានជំនួបក្នុងក្របខ័ណ្ឌបច្ចេកទេស ដើម្បីពិនិត្យ មើលសំណើនេះ ពីព្រោះថា កន្លងមកជប៉ុនបានជួយរួចហើយពាក់ព័ន្ធនឹងការងារមួយចំនួនដូចជា ការចុះឈ្មោះបោះឆ្នោត ដូច្នេះត្រូវពិនិត្យមើលឡើងវិញនូវអ្វីដែលត្រូវជួយជាបន្តទៀតតាមលក្ខណៈបច្ចេកទេស៕
ដោយ ៖ កោះកែវ