រោងចក្រសហគ្រាស មានកម្មករចាប់ពី១០០នាក់ឡើងទៅត្រូវ​មក​ចុះបញ្ជិកា នៅក្រសួងសង្គមកិច្ច

ភ្នំពេញ៖ ក្រសួងសង្គមកិច្ច អតីតយុទ្ធជន និងយុវនីតិសម្បទាតម្រូវឱ្យនិយោជក ឬម្ចាស់សហគ្រាស គ្រឹះស្ថានឯកជន ទាំងអស់ដែលមានកម្មករ និយោជិតចាប់ពី១០០នាក់ឡើងទៅ ត្រូវមានកាតព្វកិច្ចមកចុះបញ្ជិកានៅក្រសួងឬមន្ទីរសង្គមកិច្ច អតីតយុទ្ធជន និងយុវនីតិសម្បទា រាជធានី-ខេត្ត។

យោងតាមសេចក្តីជូនដំណឹងស្តីពីការចុះបញ្ជិកាអនុវត្តកាតាព្វកិច្ចរបស់វិស័យឯកជន លើច្បាប់ស្ដីពីកិច្ចការពារ និងលើកកម្ពស់សិទ្ធិជនពិការដែលទើបទទួលបាននៅថ្ងៃនេះបានឱ្យដឹងថា ការតម្រូវឱ្យនិយោជក ឬម្ចាស់សហគ្រាស គ្រឹះស្ថានឯកជន ទាំងអស់ដែលមានកម្មករ និយោជិតចាប់ពី១០០នាក់ឡើងទៅ ត្រូវមានកាតព្វកិច្ចមកចុះបញ្ជិកានេះ ដើម្បីឆ្លើយតបក្នុងការអនុវត្តច្បាប់ ស្តីពីកិច្ចការពារ និងលើកកម្ពស់សិទ្ធិជនពិការនិងអនុក្រឹត្យស្តីពីការកំណត់អត្រា និងបែបបទនៃការជ្រើសរើសជនពិការចូលបម្រើការងារ។

សហគ្រាស គ្រឹះស្ថានឯកជន ដែលកំពុងដំណើរការ ត្រូវមកចុះបញ្ជិកាចាប់ពីថ្ងៃជូនដំណឹងនេះតទៅរហូតដល់ដំណាច់ខែកញ្ញា ឆ្នាំ២០២១។ ចំពោះសហគ្រាស គ្រឹះស្ថានឯកជន ដែលបើកដំណើរការថ្មី ត្រូវមកចុះបញ្ជីកាក្នុងរយៈពេលយ៉ាងយូរ ៣០(សាមសិប)ថ្ងៃបន្ទាប់ពីកាលបរិច្ឆេទនៃការចាប់ផ្ដើមបើកសហគ្រាស គ្រឹះស្ថានរបស់ខ្លួនជាស្ថាពរ។

ក្រសួងបានព្រមានថា ក្នុងករណីម្ចាស់សហគ្រាស គ្រឹះស្ថានឯកជនទាំងឡាយណា ពុំបានបំពេញកាតព្វកិច្ចតាមអនុក្រឹត្យ និងច្បាប់ ក្រសួងសង្គមកិច្ច អតីតយុទ្ធជន និងយុវនីតិសម្បទា នឹងចាត់វិធានការដាក់កំហិត ផាកពិន័យតាមមាត្រា៥៤ នៃច្បាប់ ស្តីពីកិច្ចការពារ និងលើកកម្ពស់សិទ្ធិជនពិការ និងកសាងសំណុំរឿងបញ្ជូនទៅតុលាការ។

យ៉ាងណាក៏ដក៏ដោយ ក្រសួងមានសេចក្តីជឿជាក់ថា និយោជក ឬម្ចាស់សហគ្រាស គ្រឹះស្ថានឯកជនទាំង អស់នឹងអនុវត្តតាមសេចក្តីជូនដំណឹងនេះប្រកបដោយប្រសិទ្ធភាពខ្ពស់ ដើម្បីផ្ដល់ឱកាសការងារដល់ជនមានពិការភាព ដែលជា ការចូលរួមលើកកម្ពស់ជីវភាពរស់នៅ ជាពិសេសក្នុងអំឡុងពេលរងផលប៉ះពាល់យ៉ាងធ្ងន់ធ្ងរដោយសារការរីករាលដាលនៃជម្ងឺ កូវីដ-១៩។

គួរបញ្ជាក់ថា យោងតាមអនុក្រឹត្យលេខ១០៨ អនក្រ.បក ចុះថ្ងៃទី៣០ ខែសីហា ឆ្នាំ២០១០ ស្តីពីការកំណត់អត្រា និងបែបបទនៃការជ្រើសរើសជនពិការចូលបម្រើការងារនៅត្រង់មាត្រាទី៦បានចែងថានីតិបុគ្គលដែលមានកម្មករនិយោជិតចាប់ពី១០០ នាក់ឡើងទៅត្រូវមានជនពិការដែលមានលក្ខណៈសម្បត្តិនិងសមត្ថភាពបំពេញនូវមុខងារតួនាទីនិងការទទួលខុសត្រូវក្នុងមុខតំណែងតាមប្រភេទការងារដូចកំណត់តាមមាត្រា១១នៃអនុក្រឹត្យនេះក្នុងអត្រា ១ភាគរយនៃចំនួនកម្មករនិយោជិតសរុប៕

អត្ថបទ៖ សំអឿន