អាជ្ញាធរ​បញ្ជាក់​មូលហេតុ​ភូមិ​ជាង ២០០ ទៀត មិនទាន់​មាន​អគ្គិសនី​​ប្រើប្រាស់

ភ្នំពេញ៖ អ្នកនាំពាក្យក្រសួងរ៉ែនិងថាមពលបានឱ្យដឹងថា រហូតមកដល់ពេលនេះមានភូមិចំនួន២១០ភូមិទៀតក្នុងចំណោមភូមិសរុប១៤៨៦៨ភូមិនៅទូទាំងប្រទេស នៅមិនទាន់មានអគ្គិសនីប្រើប្រាស់នៅឡើយទេ។

លោក ហេង គន្ធលាង អ្នកនាំពាក្យក្រសួងរ៉ែនិងថាមពលមានប្រសាសន៍នៅថ្ងៃទី៦កញ្ញានេះថា តាមគោលដៅនៃការអភិវឌ្ឍអគិ្គសនីភាវូបនីយកម្មជនបទរបស់រាជរដ្ឋាភិបាលកម្ពុជា គឺបានសម្រេចជិត៩៩% នៃ ភូមិសរុបទូទាំងប្រទេស ដែលបានភ្ជាប់ពីបណ្តាញជាតិ និងពីប្រភពថាមពលផ្សេងៗដូចជាពន្លឺព្រះអាទិត្យ  ជីវៈម៉ាស់ ជីវឧស្ម័នជាដើម។

លោក បានបន្តថា « យើងនៅសល់តែភូមិចំនួន ២១០ភូមិប៉ុណ្ណោះ ដែលមិនទាន់ភ្ជាប់ជាមួយបណ្តាញជាតិ ដោយសារភូមិទាំងនេះជាភូមិបណ្តែតទឹក ភូមិនៅលើកោះ ភូមិមិនមានផ្លូវធើ្វដំណើរ ភូមិមានផ្លូវពិបាកធ្វើដំណើរ និងភូមិលិចទឹកនៅរដូវវស្សា ប៉ុន្តែទោះជាយ៉ាងណា ប្រជាពលរដ្ឋដែលរស់នៅក្នុងភូមិទាំងនោះក៏មានប្រើប្រព័ន្ធពន្លឺព្រះអាទិត្យតាមផ្ទះ និងប្រភពថាមពលកកើតឡើងវិញផេ្សងទៀតផងដែរ»។

លោកបានបន្តទៀតថា តាមពិតចំនួនជិត ៩៩%នេះ គឺបានសម្រេចគោលនៅ ១០០% នៃភូមិសរុបទូទាំងប្រទស ដែលមានថាមពលអគិ្គសនីប្រើប្រាស់ពីប្រភពថាមពលផ្សេងៗ ដូចជាថាមពលពន្លឺព្រះអាទិត្យ ជីវម៉ាស ថាមពលអាគុយ តាមគោលដៅរបស់រាជរដ្ឋាភិបាលហើយ៕

អត្ថបទ៖ សំអឿន