សម្តេចតេជោ ហ៊ុន សែន៖​ ការទទួលបាន​ពហុកីឡាដ្ឋានជាតិមរតកតេជោ​ នាពេលនេះ​ មិន​មែនជាការចៃដន្យទេ​

សម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅរសៀលថ្ងៃទី ១២ ខែកញ្ញា ថាការទទួលបានពហុកីឡាដ្ឋានជាតិ ដែលមានតម្លៃប្រមាណ១៥០លានដុល្លារនាពេលនេះ វាមិនមែនជាការចៃដន្យទេ ហើយសម្ដេចក៏មិនដែលសង្ឃឹមថា មានសមិទ្ធផលបែបនេះនោះទេ។

សម្តេចតេជោ ហ៊ុន សែន មានក្តីរីករាយដែលបានចូលរួមប្រគល់ និងទទួលពហុកីឡាដ្ឋានជាតិមរតកតេជោជាមួយលោក វ៉ាង យី ទីប្រឹក្សារដ្ឋ និងជារដ្ឋមន្ត្រីក្រសួងការបរទេស នៃសាធារណរដ្ឋប្រជាមានិតចិននាពេលនេះ ហើយឆ្លងតាមសុន្ទរកថា របស់លោក វ៉ាង យី សមិទ្ធិផលនេះ បានកើតឡើងពីការខិតខំប្រឹងប្រែង នៃប្រទេសទាំងពីរ។

សម្ដេចក៏ធ្លាប់សុំការអភ័យទោសពីមិត្តអាស៊ានទាំងអស់ ក្នុងការរៀបចំកីឡាស៊ីហ្គេម ប៉ុន្តែនៅពេលធ្វើទំនាក់ទំនងជាមួយសាធារណរដ្ឋប្រជាមានិតចិន ជាពិសេសជាមួយឯកឧត្តមប្រធានាធិបតី នៃសាធារណៈប្រជាមានិតចិនស៊ីជិនពីង កម្ពុជាបានទទួលនៅពហុកីឡាដ្ឋានដ៏ធំស្កឹមស្កៃនេះ ហើយឈានទៅទទួលយកនូវបេក្ខភាពរៀបចំស៊ីហ្គេមនៅឆ្នាំ២០២៣ ហើយពិធីសម្ភោធនិងធ្វើឡើងនៅពេលក្រោយ ហើយសម្តេចសង្ឃឹមថានៅពេលនោះ នឹងដាក់មនុស្សបានច្រើនជាងនេះ គឺដើម្បីឱ្យប្រជាពលរដ្ឋបានឃើញនូវផ្លែផ្កា នៃកិច្ចសហប្រតិបត្តិការរវាងកម្ពុជានិងចិន។ 

សម្តេចបន្តថា យើងមានមោទនភាព ហើយវាជាមោទនភាពរបស់ជាតិខ្មែរទាំងមូលដែលសមិទ្ធផលទាំងនេះ នឹងផ្ដល់ឲ្យយុវជន ជាពិសេសកុមាររបស់យើង នាពេលអនាគត។

សម្ដេចចាំបានថា នៅពេលបើកការដ្ឋានសាងសង់ពហុកីឡាដ្ឋានជាតិនេះ គឺចំថ្ងៃខួបកំណើតរបស់សម្ដេចតែម្ដង ដោយធ្វើការជប់លៀងនៅទីនេះ ហើយទទួលទានបាយជាមួយគ្នាជាមួយកីឡាករនៅទីនេះផងដែរ៕

អត្ថបទៈ កោះកែវ