កម្ទេច​​ធូលី​ហ៊ុយធ្លាក់ពេញ​កំណាត់​​ផ្លូវ ៦០ ម៉ែត្រ

ភ្នំពេញ៖ កំណាត់ផ្លូវ៦០ម៉ែត្រដែលតភ្ជាប់ពីផ្លូវព្រះមុនីវង្ស (រង្វង់មូលក្បាលថ្នល់) ស្ថិតក្នុងសង្កាត់ចាក់អង្រែលើខណ្ឌមានជ័យ រហូតដល់ផ្លូវជាតិលេខ២ព្រំប្រទល់ក្រុងតាខ្មៅខេត្តកណ្តាល គេសង្កេតឃើញកម្ទេច​ខ្សាច់ជ្រុះលើផ្លូវហុយទ្រុបទ្រល់ បើទោះជាអាជ្ញាធរខិតខំដាក់កម្លាំងកើបនិងលៀងសំអាតរាល់ថ្ងៃក៏ដោយ។

លោក សុន កឿង ដែលបានបើកបម៉ូតូតាមបណ្តោយផ្លូវ៦០ម៉ែត្រនេះបាននិយាយថា ផ្លូវ៦០ម៉ែត្រមានទំហ៊ុំធំល្អស្អាតណាស់ពីមុនមក ប៉ុន្តែពេលនេះសម្បូទៅដោយកំទេចដីខ្សាច់ដែលរថយន្តដឹកខ្សាច់សើមធ្វើឲ្យជ្រុះ។ ចំពោះដីខ្សាច់ជ្រុះលើកំណាត់ផ្លូវនេះ គឺបង្កឲ្យអ្នកធ្វើដំណើតាមម៉ូតូមានការលំបាក ដោយសារដីហុយចូលភ្នែកនិងងាយជួបគ្រោះថ្នាក់ខ្លាំងណាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកចៅសង្កាត់ចាក់អង្រែក្រោមបានបញ្ជាក់ថា នៅតាមបណ្តោយផ្លូវ៦០ម៉ែត្រនេះគឺជាតំបន់អភិវឌ្ឍន៍ដ៏សំខាន់។ ដូច្នេះគឺត្រូវប្រើប្រាស់ដីចាក់លុបនិងបំរើការនៅការដ្ឋានដែលកំពុងសាងសង់នោះ។

លោក ជា សុខៃ ចៅសង្កាត់ចាក់អង្រែក្រោមបានឲ្យកម្ពុជាថ្មីដឹងថា តាមពិតគឺមានកម្ទេច​ខ្សាច់សើមជ្រុះតាមផ្លូវ៦០ម៉ែត្រនេះប្រាកដមែន។ ប៉ុន្តែអាជ្ញាធរខណ្ឌមានជ័យបានដាក់កម្លាំងកើបនិងលាង​សំអាតរាល់ថ្ងៃ មិនដែលខកខានឡើយ។

អ្វីដែលជាសំណូមពរដល់ម្ចាស់រថយន្តដឹកដី សូមមេត្តាដាក់គំរបនិងទ្រាប់កៅស៊ូនៅត្រង់បាតក្រោមទ្រុងរថយន្ត ដែលមានប្រហោងដើម្បីទប់ស្កាត់កុំឲ្យខ្សាច់សើមហូរជ្រុះតាមផ្លូវខ្លាំងណាស់។ បើពុំស្តាប់តាមការណែនាំអាជ្ញាធរនឹង​ចុះអនុវត្ត​ការ​ឃាត់ទុកជាការព្រមានជាពុំខាន។

អត្ថបទ៖ នរា