ព័ត៌មានជាតិ

រដ្ឋបាលខណ្ឌឫស្សីកែវ បាញ់ទឹកលាងសម្អាតផ្លូវ រៀបចំអនាម័យ បរិស្ថាន និងសុវត្ថិភាពសាធារណៈ នៅមុខផ្សារឫស្សីកែវថ្មី

បានផុស

៤ ខែ មុន

នៅ

ថ្ងៃសុក្រ ៦ កុម្ភៈ ២០២៦

ដោយ

ដោយអនុវត្តតាមការណែនាំ និងទិសដៅដឹកនាំរបស់ លោក ជិន ប៊ុនធឿន អភិបាលខណ្ឌឫស្សីកែវ កាលពីរសៀលថ្ងៃទី ០៥ ខែកុម្ភៈ ឆ្នាំ ២០២៦ រដ្ឋបាលខណ្ឌឫស្សីកែវ បានរៀបចំសកម្មភាពអនាម័យ បរិស្ថាន សណ្ដាប់ធ្នាប់សាធារណៈ និងបាញ់ទឹកលាងសម្អាតផ្លូវ ដើម្បីលើកកម្ពស់សោភ័ណភាព អនាម័យ និងសុវត្ថិភាពសាធារណៈក្នុងមូលដ្ឋាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនេះ ដឹកនាំដោយ លោក គន់ សោភា ប្រធានការិយាល័យសាធារណការ ដឹកជញ្ជូន អនាម័យ បរិស្ថាន និងសណ្ដាប់ធ្នាប់សាធារណៈ ដោយមានការចូលរួមពីមន្ត្រីការិយាល័យពាក់ព័ន្ធ អាជ្ញាធរសង្កាត់ទួលសង្កែទី ០១ ព្រមទាំងយុវជន ស ស យ ក សង្កាត់ ជាច្រើននាក់ ផងដែរ។

ទីតាំងអនុវត្តសកម្មភាព ស្ថិតនៅលើផ្លូវលេខ ១០៥ ត្រង់ចំណុចមុខផ្សារឫស្សីកែវថ្មី ភូមិបាក់ទូក សង្កាត់ទួលសង្កែទី ០១ ខណ្ឌឫស្សីកែវ រាជធានីភ្នំពេញ ដែលជាតំបន់មានចរាចរណ៍មមាញឹក និងសកម្មភាពពាណិជ្ជកម្មច្រើន ដោយតម្រូវឲ្យមានការថែរក្សាអនាម័យ និងសណ្ដាប់ធ្នាប់ជាប្រចាំ។

លោក គន់ សោភា បានបញ្ជាក់ថា សកម្មភាពអនាម័យ និងរៀបសណ្ដាប់ធ្នាប់នេះ គឺជាការអនុវត្តជាក់ស្ដែងតាមការណែនាំរបស់លោកអភិបាលខណ្ឌឫស្សីកែវ ក្នុងគោលបំណងបង្កើនសោភ័ណភាពទីក្រុង កាត់បន្ថយសំរាម បញ្ហាបរិស្ថាន និងធានាសណ្ដាប់ធ្នាប់សាធារណៈឲ្យបានល្អប្រសើរ ស្របតាមគោលការណ៍ “ទីក្រុងស្អាត បរិស្ថានល្អ និងមានសុវត្ថិភាព”។

លោកក៏បានអំពាវនាវដល់ប្រជាពលរដ្ឋ អាជីវករ និងអ្នកប្រើប្រាស់ផ្លូវ សូមចូលរួមថែរក្សាអនាម័យ បរិស្ថាន មិនបោះសំរាមផ្ដេសផ្ដាស និងគោរពសណ្ដាប់ធ្នាប់សាធារណៈ ដើម្បីរួមចំណែកបង្កើតមូលដ្ឋានស្អាតមានរបៀបរៀបរយ៕

អត្ថបទ ៖ សំណាង