Connect with us

ព័ត៌មានជាតិ

ខេត្ត​ព្រះសីហនុចាប់ផ្តើម​​ពិន័យ​អ្នក​​ចោល​​សំរាម​ខុសពេល និងក្រុមហ៊ុនដឹកសំរាម​យឺតយ៉ាវ

បានផុស

នៅ

ខេត្តព្រះសីហនុចាប់ផ្តើមអនុវត្ត​ការផាកពិន័យដល់ប្រជាពលរដ្ឋ ដែល​បញ្ចេញសំរាមខុសពេលវេលា ដែលបានកំណត់នៅក្នុងប័ណ្ណព័ត៌មានចាប់ពី ២ម៉ឺនរៀលដល់៤០ម៉ឺនរៀលទៅតាមច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកក្រុមហ៊ុនប្រមូលសំរាមវិញ ក៏ទទួលការផាកពិន័យផងដែរប្រសិនបើ មិនបានទៅប្រមូល និងដឹកជញ្ជូនសំរាមតាមពេលវេលា ដែលបានកំណត់ក្នុងប័ណ្ណព័ត៌មាន។

ការអនុវត្តការផាកពិន័យនេះក្រោយអាជ្ញាធរខេត្តព្រះសីហនុបានថ្លែងក្នុងពិធីបើកយុទ្ធនាការបិទផ្សព្វផ្សាយប័ណ្ណព័ត៌មានពីពេលវេលាបញ្ចេញសំរាម និងប្រមូល ដឹកជញ្ជូនសំរាម នៅតាមដងផ្លូវចំនួន ៤៧ខ្សែ ក្នុងក្រុងព្រះសីហនុកាលពីថ្ងៃទី​២៣តុលា។

លោក អ៊ី សុខឡេង អភិបាល នៃគណៈអភិបាលក្រុងព្រះសីហនុបានលើកឡើងថា នាពេលកន្លងមករដ្ឋបាលក្រុងព្រះសីហនុ និងក្រុមហ៊ុនប្រមូល និងដឹកជញ្ជូនសំរាម (KSWM)បានប្រជុំពិភាក្សាជាច្រើនលើក ដើម្បីឱ្យក្រុមហ៊ុនរៀបចំបង្កើតប័ណ្ណព័ត៌មានផ្សព្វផ្សាយពីពេលវេលាបញ្ចេញ ប្រមូល និងដឹកជញ្ជូនសំរាមនៅក្នុងក្រុងព្រះសីហនុ ដើម្បីឱ្យប្រជាពលរដ្ឋត្រូវបញ្ចេញសំរាម និងពេលវេលាដែលក្រុមហ៊ុន ត្រូវទៅប្រមូល និងដឹកជញ្ជូនសំរាមនៅក្នុងក្រុងព្រះសីហនុសម្រាប់​លើកទី១ ចំនួន៤៧ខ្សែផ្លូវដែលជាខ្សែផ្លូវអាទិភាព។

ក្នុងនោះផ្លូវចំនួន ២៧ខ្សែមានប័ណ្ណសម្គាល់ពណ៌ក្រហម ប្រជាពលរដ្ឋត្រូវបញ្ចេញសំរាមចាប់ពីម៉ោង ៧យប់ ដល់ម៉ោង៣ភ្លឺ ហើយក្រុមហ៊ុនត្រូវទៅប្រមូល និងដឹកជញ្ជូនសំរាមចាប់ពីម៉ោង ៣ភ្លឺ ដល់ម៉ោង ៨ព្រឹក។ រីឯផ្លូវចំនួន២០ខ្សែទៀតមានប័ណ្ណសម្គាល់ពណ៌ខៀវ គឺប្រជាពលរដ្ឋត្រូវបញ្ចេញសំរាមចាប់ពីម៉ោង ៧យប់ ដល់ម៉ោង៣ភ្លឺ ហើយក្រុមហ៊ុនត្រូវទៅប្រមូល និងដឹកជញ្ជូនសំរាមចាប់ពីម៉ោង ៣ភ្លឺ ដល់ម៉ោង១០ព្រឹក។

លោកអភិបាលខេត្តបានបន្តទៀតថា ក្នុងករណីដែលប្រជាពលរដ្ឋបញ្ចេញសំរាមខុសពេលវេលា ដែលបានកំណត់នៅក្នុងប័ណ្ណព័ត៌មានទាំងពីរពណ៌នេះ នឹងត្រូវផាកពិន័យជាប្រាក់ចាប់ពី ២ម៉ឺនរៀលដល់៤០ម៉ឺនរៀលយោងតាមអនុក្រឹត្យ​លេខ១១៣។ ដោយឡែកក្នុងករណីដែលក្រុមហ៊ុន មិនបានទៅប្រមូល និងដឹកជញ្ជូនសំរាមតាមពេលវេលា ដែលបានកំណត់ក្នុងប័ណ្ណព័ត៌មានទាំង ពីរពណ៌នេះ ក្រុមហ៊ុននឹងត្រូវទទួលការពិន័យដូចមានចែងក្នុងកិច្ចសន្យារបស់រដ្ឋបាលក្រុងព្រះសីហនុ។

លោក គួច ចំរើន អភិបាល នៃគណៈអភិបាលខេត្តព្រះសីហនុបានមានប្រសាសន៍ថា យុទ្ធនាការបិទផ្សព្វផ្សាយប័ណ្ណព័ត៌មានបញ្ចេញសំរាម និងប្រមូល ដឹកជញ្ជូនសំរាម នៅតាមខ្សែផ្លូវ ៤៧ខ្សែ ក្នុងក្រុងព្រះសីហនុគឺដើម្បីបញ្ចប់សំរាមនៅក្នុងក្រុងព្រះសីហនុ ដោយសារកន្លងមកសំរាមមានការកកស្ទះនៅក្រុងព្រះសីហនុ អ្នកប ញ្ចេញសំរាមមានចំនួនច្រើន និងការប្រមូលមិនទាន់ទាន់ឆ្លើយតបខណៈបច្ចុប្បន្នការកកស្ទះសំរាមនៅសល់តែតំបន់ទំនប់រលកប៉ុណ្ណោះ ដោយសារការបញ្ចេញសំរាមមានទាំងនៅលើគោក និងសំរាមមកពីតំបន់កោះ។ 

លោកអភិបាលខេត្ត បានបន្តថា រដ្ឋបាលក្រុងព្រះសីហនុ បានធ្វើការអប់រំ ផ្សព្វផ្សាយដល់ប្រជាពលរដ្ឋជាបន្តបន្ទាប់ និងបានជម្រុញឱ្យក្រុមហ៊ុនប្រមូលសំរាម និងដឹកជញ្ជូនសំរាម ត្រូវជ្រើសរើសបុគ្គលិក រថយន្តដឹកជញ្ជូនសំរាម និងឧបករណ៍បំពាក់បន្ថែមទៅតាមតម្រូវការជាក់ស្តែង។

លោកអភិបាលខេត្តបានបន្តទៀតថា« ថ្ងៃនេះយើងធ្វើសកម្មភាពចុះបិទផ្សព្វផ្សាយប័ណ្ណព័ត៌មាននៅតាមខ្នងផ្ទះប្រជាពលរដ្ឋ និងទីតាំងអាជីវកម្ម-សេវាកម្ម ដែលស្ថិតនៅលើដងផ្លូវទាំង ៤៧ខ្សែ ក្នុងក្រុងព្រះសីហនុ ដើម្បីឱ្យអ្នកបង្កើតសំរាម បញ្ចេញសំរាមតាមពេលវេលាកំណត់ ចាប់ពីម៉ោង ៧:០០យប់ ដល់ម៉ោង ៣ភ្លឺ ហើយក្រុមហ៊ុនធ្វើការប្រមូលសំរាម និងដឹកជញ្ជូនសំរាម ចាប់ពីម៉ោង ៣ភ្លឺ នឹងបញ្ចប់នៅម៉ោង ១០:០០ ព្រឹក»។

លោកអភិបាលខេត្តបានបញ្ជាក់ថា « យើងនឹងបន្តពិនិត្យ និងកែប្រែប័ណ្ណព័ត៌មានបញ្ចេញសំរាម និងប្រមូល ដឹកជញ្ជូនសំរាមជំហានទី២ សម្រាប់ប្រជាពលរដ្ឋ ក្នុងក្រុងព្រះសីហនុបន្តទៀត ដោយតម្រូវឱ្យបញ្ចេញសំរាមពីម៉ោង៧យប់ ដល់ម៉ោង ១២យប់ ហើយក្រុមហ៊ុនចាប់ផ្ដើមប្រមូលពីម៉ោង ១២យប់ ដល់ម៉ោង ៦:០០ព្រឹក»។

លោក អភិបាលខេត្ត បានបន្ថែមទៀតថា យុទ្ធនាការថ្ងៃនេះ និងឈានទៅធ្វើការផាកពិន័យ ប្រសិនបើបងប្អូនប្រជាពលរដ្ឋ អ្នកបង្កើតសំរាមមិនបានចូលរួមសហការជាមួយរដ្ឋបាលក្រុងព្រះសីហនុ និងក្រុមហ៊ុនប្រមូល និងដឹកជញ្ជូនសំរាម។ ទន្ទឹមនោះយើងក៏ត្រូវធ្វើការអប់រំផ្សព្វផ្សាយដល់អ្នកបង្កើតសំរាមឱ្យបានទូលំទូលាយ នូវព័ត៌មាន និងខ្លឹមសារនៃការផាកពិន័យដើម្បីទីក្រុងរបស់យើងស្អាត មានបរិស្ថានល្អ ប្រកបដោយផាសុខភាព និងសុខុមាលភាព។

លោកអភិបាលខេត្តបានបញ្ជាក់ទៀតថាខេត្តព្រះសីហនុ ត្រូវបានរាជរដ្ឋាភិបាលកំណត់ជា “តំបន់សេដ្ឋកិច្ចពិសេសគំរូពហុបំណង” ដែលមានសក្តានុពលឆ្នេរខ្សាច់សស្អាត ជាតារារះនាទិស “នារតី” ហើយភាពស្អាតនេះ គឺជាការទាក់ទាញអ្នកទេសចរ និងអ្នកវិនិយោគមកកាន់ខេត្តរបស់យើង និងផ្តល់ការងារជូនប្រជាពលរដ្ឋ បង្កើនជីវភាពកាន់តែល្អប្រសើរ ដូច្នេះយើងត្រូវតែធានាភាពស្អាតសម្រាប់ក្រុង ខេត្តរបស់យើងទាំងអស់គ្នា៕

អត្ថបទ៖ សំអឿន

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

កីឡា៩ ម៉ោង មុន

កីឡាការិនី​ព្រះខ័ន​រាជ​ស្វាយរៀង ៧​នាក់ ជាប់​ឈ្មោះ U18 នារី​កម្ពុជា ធ្វើតេស្ត​ដំណាក់កាល​ទី​១ ត្រៀម​ប្រកួត​ពាន​យុវនារី​អាស៊ាន

ព័ត៌មានជាតិ៩ ម៉ោង មុន

ទស្សនកិច្ច​៤​ថ្ងៃ ឧបនាយករដ្ឋមន្ត្រី ប្រាក់ សុខុន ស្ទាបស្ទង់​សភាពការណ៍​នៅ​មី​យ៉ាន់​ម៉ា​បាន​កាន់តែច្រើន

ព័ត៌មានជាតិ៩ ម៉ោង មុន

ប្រេសិត​ពិសេស​របស់​ប្រធាន​អាស៊ាន ជួប​អ្នកការទូត​តំណាង​ប្រទេស​ចំនួន​៤ ប្រចាំ​នៅ​មី​យ៉ាន់​ម៉ា

ព័ត៌មានជាតិ១០ ម៉ោង មុន

លោក លី ធុជ ៖ គណបក្ស​ប្រជាជន​កម្ពុជា​ឈ្នះ សន្តិភាព​ឈ្នះ និង​ការអភិវឌ្ឍ​ឈ្នះ

ជីវិតកម្សាន្ដ១០ ម៉ោង មុន

Maroon 5 ប្រកាសមកប្រគំតន្ត្រីនៅ អាស៊ី

Sokha Hotels

ព័ត៌មានពេញនិយម