ភ្លើងប្រច័ណ្ឌ ប្ដីអារកសម្លាប់ប្រពន្ធ រួចអារកសម្លាប់ខ្លួនឯងតាមក្រោយ

ករណីឃាតកម្មប្ដីសម្លាប់ប្រពន្ធ រួចសម្លាប់ខ្លួនឯងតាមក្រោយ នៅស្រុកកណ្ដាលស្ទឹង ដែលបង្កការភ្ញាក់​ផ្អើលនៅ​ព្រឹ​ក​​​អង្គារនេះ ត្រូវបាន​សមត្ថ​កិ​ច្ចប្រាប់ជាជំហានដំបូងថា កើតឡើងដោយសារភ្លើងប្រច័ណ្ឌ ហើយបុរសជាប្ដីក៏មាន​ ជំងឺ​ប្រព័ន្ធប្រសាទផងដែរ។

លោកវរសេនីយ៍ទោ ឡេង សុខរុន អធិការនគរបាលស្រុកកណ្ដាលស្ទឹង មានប្រសាសន៍ប្រាប់កម្ពុជាថ្មីព្រឹកថ្ងៃទី២៦ ខែតុលានេះថា តាមការរៀបរាប់របស់សាច់ញាត្តិបានឲ្យដឹងថា បុរសជាប្ដីមានជំងឺប្រព័ន្ធប្រសាទ ហើយក៏មាន​ការ​ប្រច័ណ្ឌប្រពន្ធផងដែរ ទើបឈានដល់ការសម្លាប់ប្រពន្ធ រួចសម្លាប់ខ្លួនឯងតាមក្រោយយ៉ាងដូច្នេះ។ បច្ចុប្បន្នកម្លាំង​ជំនាញកំពុងធ្វើកោសល្យវិច្ច័យ ដើម្បីបញ្ជាក់ករណីនេះហើយ។

បើតាមរបាយការណ៍របស់សមត្ថកិច្ច បានឲ្យដឹងថា ឃាតកម្មប្ដីសម្លាប់ប្រពន្ធ រួចសម្លាប់ខ្លួនឯងតាមក្រោយនេះ បាន​ឡើងនៅវេលាម៉ោង៧ និង២០នាទី ព្រឹកថ្ងៃទី២៦ ខែតុលា ២០២១ នៅចំណុចផ្ទះជនរងគ្រោះ ស្ថិតក្នុងភូមិកំពង់ទួល ឃុំអន្លង់រមៀត ស្រុកកណ្ដាលស្ទឹង ខេត្តកណ្តាល។

ជនរងគ្រោះ ជាប្រពន្ធមានឈ្មោះ គឹម ពៅ ភេទស្រី អាយុ ៤០ឆ្នាំ មុខរបរលក់ដូរ នៅក្នុងសាលារៀន មានទីលំនៅ ភូមិ-ឃុំ កើតហេតុខាងលើ (ស្លាប់)។ ចំណែកជនសង្ស័យ ជាប្តីមានឈ្មោះ ពេជ្រ វិចិត្រ អាយុ៤១ឆ្នាំ មុខរបរលក់ប្រហិតតាមរទេះម៉ូតូ រស់នៅ ភូមិ ឃុំ កើតហេតុខាងលើ មានជំងឺផ្លូវចិត្ត (ស្លាប់)។ វត្ថុតាង ដែលរកឃើញមានផ្លែកាំបិតរុំក្រណាត់ពណ៌ខ្មៅ ធ្វើដង សម្រាប់កាត់ក្រណាត់ តុកាត់ក្រណាត់រោងចក្រ។

មុនពេលកើតហេតុ តាមការបំភ្លឺឈ្មោះ គឹម ពេជ្រ ភេទស្រី អាយុ ៤៣ឆ្នាំ នៅភូមិឃុំកើតហេតុ ត្រូវជាបងស្រីជនរងគ្រោះបង្កើតបានឲ្យដឹងថា កន្លងមកជនសង្ស័យ តែងតែមានអាការៈស្រងូតស្រងាត់ ពោលពាក្យមិនល្អ និងភាពរកាំរកូសជាមួយប្រពន្ធ (ប្រច័ណ្ឌ) រហូតដល់ថ្ងៃកើតហេតុ ក្រុមគ្រួសារ និងជនសង្ស័យ បានពិគ្រោះគ្នាថា នឹងទៅពេទ្យរុស្ស៊ីដើម្បីពិនិត្យព្យាបាលជំងឺ ស្រាប់តែបន្តិចក្រោយមក ជនសង្ស័យបានយកកាំបិតអារ ក ជនរងគ្រោះជា ប្រពន្ធរបស់ខ្លួនបណ្ដាលឲ្យស្លាប់ភ្លាមៗ នៅកន្លែងកើតហេតុ។ បន្ទាប់មកជនសង្ស័យ បានអារកខ្លួនឯងបណ្ដាលឲ្យរងរបួសធ្ងន់ពេលបញ្ជូនដល់មន្ទីរពេទ្យបង្អែកស្រុកកណ្ដាលស្ទឹង (ស្លាប់)។ បច្ចុប្បន្នសពជនរងគ្រោះ និងជនសង្ស័យ ត្រូវបានសមត្ថកិច្ច ប្រគល់ឲ្យក្រុមគ្រួសារ ធ្វើបុណ្យតាមប្រពៃណីហើយ៕