​នាយករដ្ឋមន្ត្រី​អ៊ីស្រាអែល ចង់រំដោះ​​ខ្លួន​ពីការ​ពឹង​វិស័យ​យោធាអាមេរិក ងាកមក​ផលិតអាវុធដោយខ្លួនឯង

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បាន​ជំរុញ​​ជាថ្មីម្តងទៀតឲ្យប្រទេសរបស់លោកបង្កើនស្វយ័តភាព​ក្នុង​វិស័យ​យោធា និងកាត់បន្ថយការពឹងផ្អែកលើការគាំទ្រពីអាមេរិក។ នេះបើយោងតាមសេចក្តីថ្លែងការណ៍ដែលចេញផ្សាយដោយការិយាល័យ​នាយករដ្ឋមន្ត្រី កាលពីថ្ងៃទី២៣ ខែមិថុនា ឆ្នាំ២០២៦ និង ចុះផ្សាយដោយសារព័ត៌មាន thehindu។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងការថ្លែងទៅកាន់នាយទាហានបំរុងក្នុងវគ្គបណ្តុះបណ្តាលមួយ នៅឯតំបន់ West Bank នាយករដ្ឋមន្ត្រី​អ៊ីស្រាអែល បានបញ្ជាក់ថា «ខ្ញុំវាយតម្លៃខ្ពស់ចំពោះការគាំទ្រដែលយើងទទួលបានពីមិត្តភក្តិអាមេរិក ប៉ុន្តែយើងត្រូវតែរំដោះខ្លួនចេញពីការពឹងផ្អែកនេះ ហើយស្ថាបនាបណ្តាញសព្វាវុធឯករាជ្យផ្ទាល់ខ្លួនរបស់យើងឡើងវិញ»។

ការថ្លែងរបស់លោក ណេតាន់យ៉ាហ៊ូ ធ្វើឡើងកាលពីថ្ងៃទី១៨ ខែមិថុនា ពោលគឺមួយថ្ងៃបន្ទាប់ពីអាមេរិក និងអ៊ីរ៉ង់ បានយល់ព្រមលើកិច្ចព្រមព្រៀងបឋមមួយ ដើម្បីបញ្ចប់សង្គ្រាមនៅមជ្ឈិមបូព៌ា ដែលជាកិច្ចព្រមព្រៀងមួយរងការប្រឆាំងយ៉ាងខ្លាំងក្លាពីសំណាក់អ៊ីស្រាអែល។ លោកបានសង្កត់ធ្ងន់នៅក្នុងកិច្ចប្រជុំនោះថា «ថ្ងៃនេះខ្ញុំសូមនិយាយថា យើងត្រូវការបណ្តាញសព្វាវុធឯករាជ្យផ្ទាល់ខ្លួន។ យើងត្រូវតែផលិតអាវុធដោយខ្លួនឯង»។

កន្លងមក នាយករដ្ឋមន្ត្រីអ៊ីស្រាអែលធ្លាប់បានបង្ហើបពីបំណងចង់បញ្ចប់ការពឹងផ្អែកលើអាមេរិកនេះជាច្រើនដងរួចមកហើយ ដោយកាលពីខែមករា លោកបានប្រាប់ទស្សនាវដ្តី The Economist ថា លោកសង្ឃឹមថានឹងអាចធ្វើវាបានក្នុងរយៈពេលមួយទសវត្សរ៍ ខណៈកាលពីខែឧសភា លោកបានប្រាប់ទូរទស្សន៍អាមេរិក CBS ថា លោកចង់ឲ្យជំនួយនោះធ្លាក់ចុះមកនៅត្រឹម «សូន្យ»។

ទោះបីជាទីក្រុងវ៉ាស៊ីនតោនជាសម្ព័ន្ធមិត្តជិតស្និទ្ធបំផុតរបស់អ៊ីស្រាអែលក៏ដោយ ប៉ុន្តែភាគីទាំងពីរបានរងការរកាំរកូសនឹងគ្នាជុំវិញរបៀបដឹកនាំសង្គ្រាមរបស់អ៊ីស្រាអែល គិតចាប់តាំងពីការវាយប្រហាររបស់ក្រុមហាម៉ាសកាលពីថ្ងៃទី៧ ខែតុលា ឆ្នាំ២០២៣ មក។ លោក ត្រាំ បានរិះគន់លោក ណេតាន់យ៉ាហ៊ូ ជាសាធារណៈក្នុងរយៈពេលប៉ុន្មានសប្តាហ៍ថ្មីៗនេះ ដោយសារតែសង្គ្រាមរបស់អ៊ីស្រាអែលជាមួយក្រុមហេសបូឡានៅលីបង់ បានគំរាមកំហែងដល់កិច្ចចរចាសន្តិភាពរវាងអាមេរិក និងអ៊ីរ៉ង់។

គួររម្លឹកឡើងថា ចាប់តាំងពីការបង្កើតប្រទេសក្នុងឆ្នាំ១៩៤៨ មក អ៊ីស្រាអែលទទួលបានជំនួយសេដ្ឋកិច្ច និងយោធាពីអាមេរិកសរុបជាង ៣០០ ពាន់លានដុល្លារ (គិតតាមអត្រាអតិផរណា) ដែលជាចំនួនច្រើនជាងគេបំផុតបើធៀបនឹងប្រទេសដទៃនៅលើពិភពលោក នេះបើយោងតាមទិន្នន័យពីក្រុមប្រឹក្សាទំនាក់ទំនងបរទេស ។ ក្រោមបក្សសម្ព័ន្ធដែលបានចុះហត្ថលេខាកាលពីឆ្នាំ២០១៦ អ៊ីស្រាអែលទទួលបានជំនួយហិរញ្ញវត្ថុប្រចាំឆ្នាំប្រមាណ ៣.៨ ប៊ីលានដុល្លារសម្រាប់ទិញអាវុធ ដែលស្មើនឹង ១៥ ភាគរយនៃកញ្ចប់ថវិកាការពារជាតិសរុប ហើយកិច្ចព្រមព្រៀងនេះនឹងត្រូវបន្តមានសុពលភាពរហូតដល់ឆ្នាំ២០២៨៕

អត្ថបទ ៖ សាង ស្រីល័ក្ខ

សង្គ្រាម​ពាក្យសម្តី​​រវាង​​អ៊ីរ៉ង់​និង​អាមេរិក ផ្ទុះ​កក្រើក ចំពេល​ដំណើរការ​ចរចា​សន្តិភាព​​​នៅស្វីស​​