ក្រឡានអ្នកស្រុកស្ទឹងត្រង់មានទីផ្សារក្រោយស្ពានស្ទឹងត្រង់-ក្រូចឆ្មារបើកឲ្យឆ្លងកាត់

កំពង់ចាម ៖​ មុខរបរលក់ក្រឡាននៅតាមដងផ្លូវ របស់អ្នកស្រុកស្ទឹងត្រង់ ខេត្តកំពង់ចាម កាន់តែមានភាពល្អប្រសើរ ក្រោយពេលស្ពានស្ទឹងត្រង់-ក្រូចឆ្មារបើកដំណើរការ និងជំងឺកូវីដ-១៩ ធ្លាក់ចុះការឆ្លងរាលដាល។

អាជីវករមួយរូបឈ្មោះ ស្រីលក្ខណ៍  ប្រកបរបរលក់ក្រឡាន នៅភូមិព្រែកកក់  ឃុំព្រែកបាក់  ស្រុកស្ទឹងត្រង់  បានឲ្យភ្នាក់ងារកម្ពុជាថ្មីដឹងថា សព្វថ្ងៃមុខរបររបស់អ្នកស្រី អាចរកចំណូលបានសមរម្យឡើងវិញ ក្រោយជំងឺកូវីដបន្ថយការឆ្លងរាលដាល និងស្ពានស្ទឹងត្រង់-ក្រូចឆ្មារ បានដាក់ឲ្យដំណើររួចមក។ ស្រីលក្ខណ៍ បានបន្តថា ក្រឡានដែលចម្អិនរួចលក់ចេញ ក្នុងមួយថ្ងៃ១០០ក្រឡាន ទៅ២០០ក្រឡាន សម្រាប់ថ្ងៃធម្មតា។   ប៉ុន្តែបើថ្ងៃចុងសប្តាហ៍ ឬថ្ងៃបុណ្យទាន កំណើននៃការលក់កាន់តែបានចំនួនច្រើន។

ដូចគ្នានេះដែរ លោក នី រតនៈ ប្រកបរបរលក់ក្រឡាននៅតំបន់នេះជាយូរឆ្នាំមកហើយ បានលើកឡើងថា ក្រោយវិបត្តិកូវីដបានធូរស្បើយ ការលក់ដូរក៏បានរីកចម្រើនបន្តបន្ទាប់។ លោកបានរំលឹកថា កាលដែលកូវីកំពុងផ្ទុះខ្លាំង ការលក់ដូរក្រឡានបានត្រឹមមួយថ្ងៃពី ៥០ ទៅ ១០០ក្រឡានប៉ុណ្ណោះ។ លើសពីនេះទៀត លោកថា ការតភ្ជាប់ស្ពានស្ទឹងត្រង់-ក្រូចឆ្មារ ក៏ជាផ្នែកមួយជួយឲ្យអ្នកដំណើរឆ្លងកាត់ច្រើន ដែលនាំឲ្យទីផ្សារក្រឡានលក់កាន់តែដាច់ផងដែរ។

បើតាមអាជីវករ ស្រីលក្ខណ៍ ដើម្បីអាចធ្វើជាក្រឡានបានត្រូវមានធាតុផ្សំដូចជា ដើមឬស្សី អង្ករ និងសណ្តែកបាយ។ អ្នកស្រី ប្រាប់ឲ្យដឹងដូច្នេះថា« ដើមឬស្សី គឺទិញពីតំបន់កោះសំរោងមក  ហើយចំពោះការធ្វើ ប្រសិនបើក្រឡាន១០០ដើម  គឺត្រូវការអង្ករ៨កំប៉ុង  និងសណ្តែកបាយ១កំប៉ុង។

សូមបញ្ជាក់ជូនថា  ក្រឡានអ្នកភូមិព្រែកកក់  ឃុំព្រែកបាក់  ស្រុកស្ទឹងត្រង់នេះ  គឺមានរសជាតិឆ្ងាញ់  មិនចាញ់ក្រឡាននៅតំបន់ផ្សេងៗឡើយ។  អ្នកភូមិនៅទីនេះ  ប្រមាណជាង១០គ្រួសារបានប្រកបរបរលក់ក្រឡាននៅមុខផ្ទះ តាមបណ្តោយដងផ្លូវ ឆ្ពោះទៅកាន់ស្ពានស្ទឹងត្រង់-ក្រូចឆ្មារ៕ អត្ថបទ៖ ហុង ម៉េងហៀ