កម្ពុជា នឹងទទួលបានវ៉ាក់សាំងជិត៣លានដូសបន្ថែមទៀតនៅចុងឆ្នាំនេះ

កម្ពុជា នឹងទទួលបានវ៉ាក់សាំងបង្ការជំងឺកូវីដ១៩ប្រមាណជិត៣លានដូសបន្ថែមទៀតនៅចុងឆ្នាំ២០២១នេះ ដើម្បីចាក់ជួនដល់ប្រជាពលរដ្ឋ។ នេះបើតាមការគូសបញ្ជាក់ឱ្យដឹងរបស់លោក ស្រីយក់ សម្បត្តិ រដ្ឋលេខាធិការក្រសួងសុខាភិបាលនៅក្នុងឱកាសទៅទទួលវ៉ាក់សាំងអាស្ត្រាហ្សេនេកានៅព្រឹកថ្ងៃទី១០ធ្នូនេះ នៅព្រលានយន្តហោះអន្តរជាតិភ្នំពេញ។

លោកស្រី យក់ សម្បត្តិ បានបន្តថា ក្នុងចំណោមវ៉ាក់សាំងជិត៣លាននដូសនេះ ក្នុងនោះផ្តល់តាមរយៈយន្តការកូវ៉ាក់ប្រមាណជាង៦០ម៉ឺនដូស ហើយប្រមាណ៣០ម៉ឺនដូស នឹងមកដល់នៅថ្ងៃចន្ទដើមសប្តាហ៍ក្រោយ និងជាង៣០ម៉ឺនដូសទៀត នឹងមកដល់នៅសប្តាហ៍ក្រោយបន្ទាប់ទៀត។ លោកស្រី បានបន្តទៀតថា វ៉ាក់សាំង ២លាន៣សែនដូសទៀត ជាជំនួយរបស់រដ្ឋាភិបាលអូស្ត្រាលី នឹងមកដល់កម្ពុជានៅចុងខែធ្នូនេះ ហើយនៅឆ្នាំ២០២២ខាងមុខនេះ នឹងមានវ៉ាក់សាំងដែលផ្តល់តាមរយៈយន្តការកូវ៉ាក់នឹងមកដល់ជាបន្តបន្ទាប់។

ចំណែក លោកស្រី Foroogh Foyouzat តំណាងអង្គការយូនីសេហ្វ ប្រចាំកម្ពុជា ធ្លាប់បានមានប្រសាសន៍ថា មកទល់ពេលនេះ ចំនួនវ៉ាក់សាំងបានដឹកជញ្ជូនមកដល់កម្ពុជាតាមរយៈយន្តការកូវ៉ាក់ គឺមានចំនួនច្រើនជាង ៣លានដូសហើយ។  លោកស្រី បានបន្តថា វ៉ាក់សាំងស៊ីណូវ៉ាក់ ឬអាស្ត្រាហ្សេនេកា ជាជំនួយរបស់យន្តការកូវ៉ាក់ត្រូវបានរំពឹងថា នឹងមកដល់បន្ថែមទៀតប្រមាណ៩០ម៉ឺនដូសនៅចុងឆ្នាំនេះ ដែលធ្វើឱ្យចំនួនវ៉ាក់សាំងកើនឡើងដល់ប្រមាណ៦០ភាគរយនៃចំនួនវ៉ាក់សាំងដែលយន្តការនេះបានសន្យាផ្តល់ឱ្យកម្ពុជាប្រមាណ៦,៦លានដូស៕

អត្ថបទ៖ សំអឿន