ខេត្តជាយដែន ឧត្ដរមានជ័យ បានត្រៀមដូចម្ដេច សម្រាប់ការប្រឡងបាក់ឌុប ក្នុងបរិបទកូវីដ?

ការប្រឡងសញ្ញាបត្រទុតិយភូមិ ឆ្នាំ ២០២១ នេះ នឹងប្រព្រឹត្តិទៅចាប់ពីថ្ងៃទី ២៧ ខែធ្នូ សប្ដាហ៍ក្រោយនេះ។ ជាខេត្តនៅជាយដែន និងរងឥទ្ធិពលវិបិត្តសាកល នៃជំងឺកូវីដ១៩ ប៉ុន្តែមន្ទីរអប់រំ យុវជន និងកីឡា ខេត្តឧត្ដរមានជ័យ បានត្រៀមរួចជាស្រេចសម្រាប់ការប្រឡងដ៏ធំនេះ។

លោក ប៉ិច រតនា ប្រធានមន្ទីរ​អប់រំ យុវជន និង​កីឡា​ ខេត្តឧត្ដរមានជ័យ មានប្រសាសន៍ប្រាប់ “កម្ពុជាថ្មី” នៅរសៀលថ្ងៃទី ២១ ខែធ្នូ នេះថា មន្ទីរបានរៀបចំមណ្ឌលប្រឡង សញ្ញាបត្រមធ្យមសិក្សា ទុតិយភូមិ នៅសប្ដាហ៍ក្រោយនេះ មានចំនួន ៣ មណ្ឌល ព្រមទាំងបានពិនិត្យ រៀបចំបន្ទប់ប្រឡង ឱ្យត្រូវតាមស្ដង់ដារតាមការណែនាំក្រសួងអប់រំ និងក្រសួងសុខាភិបាលរួចហើយ។

លោក ប៉ិច រតនា មានប្រសាសន៍បន្ថែមថា៖ “តាមការណែនាំរបស់ក្រសួងអប់រំ គឺ តម្រូវឱ្យបេក្ខជនទៅមើលឈ្មោះនៅមណ្ឌលប្រឡង មុនថ្ងៃប្រឡង១ថ្ងៃ។ ហើយ​នៅថ្ងៃចន្ទ ម្សិលមិញ នៅមន្ទីរអប់រំយើង បានបិទផ្សាយបញ្ជីឈ្មោះបេក្ខជន នៅតាមមណ្ឌលប្រឡង និងបង្ហោះនៅ Page របស់មន្ទីរ រួចរាល់ហើយ ដើម្បីឱ្យបេក្ខជនដឹងឈ្មោះខ្លួនឯងប្រឡងនៅមណ្ឌលណា ប៉ុន្តែមិនទាន់បង្ហាញ លេខបន្ទប់ លេខតុ ទេ”។

ប្រធានមន្ទីរ​អប់រំ យុវជន និង​កីឡា​ ខេត្តឧត្ដរមានជ័យ ខាងលើបញ្ជាក់ទៀតថា ចំណែកអាជ្ញាធរខេត្ត បានសហការជាមួយ សហភាពសហព័ន្ធយុវជនកម្ពុជា ធ្វើការផ្សព្វផ្សាយជូនដំណឹងដល់បេក្ខជន និងផ្ដល់ទីកន្លែងស្នាក់នៅដល់បេក្ខជន ដែលរកកន្លែងស្នាក់មិនបាន ព្រមទាំងជួយសម្រួលមិនយកថ្លៃផ្ញើយានជំនិះរបស់បេក្ខជន។

លោក ប៉ិច រតនា បានឱ្យដឹងបន្ថែមថា ឆ្នាំនេះ ខេត្តឧត្ដរមានជ័យ មានប្រសាសន៍ថា ការប្រឡងសញ្ញាបត្រមធ្យមសិក្សា ទុតិយភូមិ សម័យប្រឡង ២៧ ខែធ្នូ ឆ្នាំ២០២១ នៅខេត្តឧត្ដរមានជ័យ មានចំនួន ៦០ បន្ទប់ នៅ ៣ មណ្ឌលប្រឡង គឺ មណ្ឌលប្រឡង វិទ្យាល័យ ហ៊ុន សែន ឧត្តរមានជ័យ សម្រាប់បេក្ខជន ថ្នាក់វិទ្យាសាស្រ្ត ចំណែក មណ្ឌល វិទ្យាល័យ តេជោ សែន សំរោង និងមណ្ឌល បឋមសិក្សា សំរោង សម្រាប់បេក្ខជន ថ្នាក់ វិទ្យាសាស្រ្តសង្គម។ ចំណែកមានបេក្ខជនប្រឡងសញ្ញាបត្រទុតិយភូមិ ជាង ១ ៤០០ នាក់ ដែលជាចំនួនប្រហាក់ប្រហែលនឹងបេក្ខជនឆ្នាំមុន។

លោកបានបញ្ជាក់ថា ក្នុងបរិបទវិបត្តិកូវីដ-១៩ នេះ ដោយមានការបិទសាលាដើម្បីទប់ស្កាត់ការឆ្លងរីករាលដាលនៃជំងឺកូវីដ ចូលសហគមន៍នោះ មន្ទីរអប់រំ ខេត្តឧត្ដរមានជ័យ បានជំរុញ និងរៀបចំការបង្រៀនតាមអនឡាញ និងរៀនលក្ខណៈបណ្ដុំ ដើម្បីពង្រឹងការសិក្សា និងសមត្ថភាពបេក្ខជនក្នុងការត្រៀមប្រឡងសញ្ញាបត្រទុតិយភូមិនៅពេលខាងមុខ។

​ប្រធានមន្ទីរអប់រំ យុវជន និងកីឡា ខេត្តឧត្ដរមានជ័យ ខាងលើបានផ្ដាំផ្ញើ បេក្ខជនទាំងអស់ បន្តខិតខំសិក្សា និងយកចិត្តទុកដាក់ថែទាំសុខភាពឱ្យបានល្អ មានទឹកចិត្តក្លាហាន  ពិសេសបង្ការខ្លួនពីជំងឺកូវីដ មានទឹកចិត្តក្លាហាន ខិតខំប្រឡង និងទទួលបានលទ្ធផលល្អទាំងអស់គ្នា។

សូមបញ្ជាក់ផងដែរថាការប្រឡងឆ្នាំសិក្សា២០២០-២០២១ នេះ នឹងប្រព្រឹត្តទៅរយៈពេល២ថ្ងៃ គឺថ្ងៃទី២៧ និង ២៨ ខែធ្នូ ឆ្នាំ២០២១ លើ ៧ មុខវិជ្ជា ក្នុងនោះភាសាបរទេសជាវិញ្ញាសាស្ម័គ្រ។ ថ្នាក់វិទ្យាសាស្រ្ដ មានវិញ្ញាសា ប្រវត្តិវិទ្យា ជីវវិទ្យា គីមីវិទ្យា ភាសាបរទេស អក្សរសាស្រ្ដខ្មែរ រូបវិទ្យា គណិតវិទ្យា។ ថ្នាក់វិទ្យាសាស្រ្ដសង្គម មានវិញ្ញាសា ផែនដី និងបរិស្ថានវិទ្យា ប្រវត្តិវិទ្យា ភូមិវិទ្យា ភាសាបរទេស គណិតវិទ្យា សីលធម៌ពលរដ្ឋវិជ្ជា អក្សរសាស្រ្ដខ្មែរ៕

អត្ថបទ៖ ច័ន្ទ ​វីរៈ