មន្ត្រីជំនាញ​ប្រាប់ឱ្យ​អ្នកនេសាទ​ចូលរួម​អភិរក្ស​ត្រីប៉ាស៊ីអ៊ីជាប្រភេទ​ត្រី​ងាយ​រងគ្រោះ​ និង​ជិត​ផុត​ពូជ

ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តស្ទឹងត្រែង លោក ទុំ នីរ៉ូ បានអំពាវនាវឲ្យអ្នកនេសាទចូលរួមអភិរក្សត្រីប៉ាស៊ីអ៊ីជាប្រភេទត្រីកម្រងាយរងគ្រោះ និងជិតផុតពូជ ឱ្យសម្បូរឡើងវិញ។

ក្នុងបទសម្ភាសន៍ជាមួយអ្នកសារព័ត៌មាន លោកទុំ នីរ៉ូ មានប្រសាសន៍បញ្ជាក់ថា ត្រីប៉ាស៊ីអ៊ីនៅខេត្តស្ទឹងត្រែង មានចរាចរណ៍ចុះឡើងពីររដូវកាល ត្រូវបានគេមើលឃើញថា មានការថយចុះគួរឲ្យព្រួយបារម្ភ ហើយមានកត្តាជាច្រើន ពាក់ព័ន្ធនឹងកត្តាធម្មជាតិ របបទឹកក្នុងរយៈពេលប៉ុន្មានឆ្នាំចុងក្រោយនេះមានការប្រែប្រួលជាច្រើន ទាក់ទងនឹងកត្តាមនុស្សធ្វើឲ្យអ្នកនេសាទកើនឡើងតាមចាប់យកនូវប្រភេទត្រីដ៏កម្រនេះ។

លោកប្រធានមន្ទីរកសិកម្មបានបញ្ជាក់បន្ថែមថា ប្រភេទត្រីប៉ាស៊ីអ៊ីនេះ ធ្វើឲ្យមានការល្បីខ្ទរនៅទូទាំងប្រទេស ធ្វើឱ្យមានតម្លៃកើនឡើងខ្ពស់ តម្លៃប៉ុន្មានក៏ដោយក៏គេចង់ទិញភ្លករសជាតិ នេះជាការដាក់សម្ពាធខ្លាំងទៅលើត្រីប៉ាស៊ីអ៊ីនៅខេត្តស្ទឹងត្រែង។

លោកប្រធានមន្ទីរបន្តថា ក្នុងរយៈពេលមួយឆ្នាំពីរឆ្នាំចុងក្រោយនេះ យើងសង្កេតឃើញថា វត្តមានរបស់វាមានតិចមែនទែន យើងពិនិត្យមើលទៅការធ្វើចរាចរណ៍ឆ្លងដែន។

ព្រោះត្រីប៉ាស៊ីអ៊ីនេះ រស់នៅឡាវផង និងនៅកម្ពុជាផងការធ្វើចរាចរណ៍ឆ្លងដែនបម្លាស់ទីរបស់វាមានឧបសគ្គជាច្រើននៅផ្នែកខាងលើៗ អញ្ចឹងវាពុំសូវមានវត្តមានច្រើនប៉ុន្មានទេនៅទឹកដីខ្មែរយើងហ្នឹង។

លោកបញ្ជាក់បន្ថែមថា វាមានពីរររដូវកាលក្នុងចុងខែ ៥ខែ ៦ និងខែ៧ វត្តមានវាជាកូនតូចៗចំទង់ៗទេ អញ្ចឹងអ្នកនេសាទចាប់បានកម្រចាប់ធំណាស់ ខែ ៦ និងខែ ៧ហ្នឹង។ដោយឡែកខែ១១ខែ ១២ និងខែ១ខែ២អីនេះ វត្តមានរបស់វាធំៗមានអាជំទង់ មានអាមួយគីឡូពីរគីឡូជាដើម។ ជាដំណាក់កាលដែលវាធំធាត់ហើយនឹងក្នុងខែ១១-១២អីហ្នឹង ហើយក៏ឋិតនៅក្នុងរយៈពេលទឹកវាស្រក ត្រីវាចុះមកស៊ីចំណី ពពួកស្លែ នៅបាតទន្លេជាដើម។

លោកបន្តថា ត្រីប៉ាស៊ីអ៊ីគ្មានតម្លៃជាក់លាក់ទេ តម្លៃសឹងឋិតថេរនៅលើមាត់អ្នកលក់បើឃើញថាត្រីប៉ាស៊ីអ៊ី មានទំហំធំទៅគាត់លក់ ១៥ម៉ឺន ទៅ ២០ម៉ឺនទៅឬក៏ ៣០ ម៉ឺនអីទៅ ទៅតាមតម្រូវការអតិថិជន ដែលគេកម្មង់ឬគេទៅទិញ ហើយបើមានតម្រូវការខ្លាំង 40 ម៉ឺនអីជាដើម។

រីឯតម្លៃជាក់លាក់ អត់មានតម្លៃជាក់លាក់ទេ តម្លៃនេះយើងទទួលស្គាល់ថាមិនមែនជាតម្លៃសម្រាប់ពលរដ្ឋទូទៅទេ ព្រោះមួយគីឡូ ២០ម៉ឺន ៣០ម៉ឺន៤០ម៉ឺននេះ អ្នកដែលធនធានតិចតួចមិនអាចមានលទ្ធភាពទិញទេ សម្រាប់ក្រុមគ្រួសារដែលមានធនធានសំបូរហូរហៀរទើបគាត់មានលទ្ធភាពទិញ។ 

ចុងក្រោយលោកប្រធានមន្ទីរកសិកម្មរុក្ខាប្រមាញ់និងនេសាទខេត្តស្ទឹងត្រែងសូមអំពាវនាវនិងអង្វរដោយទទូចជាពិសេសពុកម៉ែប្រជាពលរដ្ឋ ជាពិសេសអ្នកនេសាទខ្លួនឯងតែម្ដង សុំមេត្តាកុំប្រើឧបករណ៍នេសាទដោយខុសច្បាប់។

ទន្ទឹមនឹងនិងនេះ សូមចូលរួមជាមួយនិងមន្ត្រីខណ្ឌរដ្ឋបាលជលផល ក្នុងការថែរក្សាការពារ នូវធនធានជលផលដ៏កម្រររបស់យើង នាពេលបច្ចុប្បន្ននេះ ធ្វើម៉េចឲ្យវាមានវត្តមានបន្តទៅទៀតដើម្បីកូនចៅយើងជំនាន់ក្រោយ៕

អត្ថបទ៖ ងិន លីម