នាយករដ្ឋមន្ត្រី ហាមមិនឲ្យអ្នកជំងឺកូវីដ-១៩ ប្រភេទបំប្លែងខ្លួនអូមីក្រុង ព្យាបាលនៅផ្ទះដាច់ខាត

សម្ដេចតេជោនាយករដ្ឋមន្ត្រី បានដាក់ចេញបទបញ្ជា មិនឲ្យអ្នកជំងឺកូវីដ-១៩ ប្រភេទបំប្លែងខ្លួនអូមីក្រុង ព្យាបាលនៅផ្ទះដាច់ខាត ដើម្បីទប់ស្កាត់ការរាតត្បាត នៅក្នុងសហគមន៍ នៃប្រទេសកម្ពុជា។

សម្ដេចតេជោ ហ៊ុន សែន នៅក្នុងពិធីប្រគល់ប្រាក់រង្វាន់ជូនកីឡាការិនី អ៊ុក ស្រីមុំ បន្ទាប់ពីដណ្តើមបានមេដាយមាសពិភពលោកពីការប្រកួតប៉េតង់ នៅទីក្រុងសាន់តាស៊ូសាណា នាព្រឹកថ្ងៃទី ៥ ខែមករា ឆ្នាំ ២០២២នេះ បានថ្លែងថា សម្រាប់អ្នកជំងឺកូវីដ-១៩ ប្រភេទបំប្លែងខ្លួនថ្មីអូមីក្រុង មិនអនុញ្ញាតឲ្យព្យា​បាល​​នៅផ្ទះឡើយ ពោលគឺត្រូវទៅព្យាបាល នៅមជ្ឈមណ្ឌលព្យាបាលជំងឺកូវីដ-១៩ ដែលរៀបចំដោយក្រសួងសុខាភិបាល និងអាជ្ញាធរ។

បើតាមការសម្ដេចតេជោ ហ៊ុន សែន ការធ្វើយ៉ាងដូច្នេះ គឺដើម្បីទប់ស្កាត់ការរាតត្បាត នៃមេរោគបំប្លែងខ្លួនថ្មីមួយនេះ ចូលទៅក្នុងសហគមន៍។ សូមជម្រាបថា គិតមកដល់ពេលនេះ ប្រទេសកម្ពុជា បានរកឃើញអ្នកវិជ្ជមាន មេរោគបំប្លែងខ្លួនថ្មីអូមីក្រុងចំនួន ៩៤ករណី តែអ្នកជំងឺមួយចំនួន ត្រូវបានព្យាបាលឲ្យជាសះស្បើយរួចហើយ៕

អត្ថបទ៖ ឃួន សុភ័ក្រ