ខេត្តកោះកុង ពីតំបន់គ្មានមនុស្សរស់នៅរហូតក្លាយជាទីអភិវឌ្ឍន៍ដ៏ទាក់ទាញ

សម្តេចពិជ័យសេនា ទៀ បាញ់ អនុប្រធានគណបក្សប្រជាជនកម្ពុជា និងជាប្រធានក្រុមការងារថ្នាក់កណ្តាលចុះជួយមូលដ្ឋានខេត្តកោះកុង បានរំលឹកថា ខេត្តកោះកុងពីមុនមក គឺគ្មានមនុស្សរស់នៅច្រើននោះទេ តែឥឡូវបានប្រែក្លាយជាទីអភិវឌ្ឍន៍ដ៏គួរឱ្យទាក់ទាញបំផុត នេះក៏ព្រោះសុខសន្តិភាព។

បណ្តាស្រុកឃុំភូមិក្នុងខេត្តកោះកុង អតីកាលគឺមិនមានមនុស្សនោះឡើយ ពោលគឺជាតំបន់ប្រកបដោយគ្រោះថ្នាក់ដោយសារតែភ្លើងសង្រ្គាម មិនខុសពីខេត្តផ្សេងទៀតក្នុងប្រទេសកម្ពុជា។ នេះជាការរំលឹកអនុស្សាវរីយ៍ជូរចត់របស់សម្តេចពិជ័យសេនា ទៀ បាញ់។

សម្តេចពិជ័យសេនា ក្នុងពិធីសម្ពោធដាក់ឱ្យប្រើប្រាស់អគារទីស្នាក់ការគណបក្សប្រជាជនកម្ពុជា ឃុំទួលគគីរ ស្រុកមណ្ឌលសីមា នៅថ្ងៃទី២០ ខែកុម្ភៈ ឆ្នាំ២០២២ បានរៀបរាប់បន្តថា ខេត្តកោះកុង ស្ទើរតែត្រូវបានកាត់ផ្តាច់ពីរាជធានីភ្នំពេញ ព្រមទាំងបណ្តាខេត្តផ្សេងៗ ព្រោះតែការធ្វើដំណើរតាមផ្លូវទឹកប្រកបដោយភាពគ្រោះថ្នាក់ និងហ៊ុមព័ទ្ធទៅដោយព្រៃឈើជាច្រើនគ្មានផ្លូវគោកធ្វើចរាចរណ៍នោះទេ ចាប់ពីស្រុកស្រែអំបិលរហូតមកដល់ក្រុងខេមរភូមិន្ទ។

សម្តេចពិជ័យសេនា ទៀ បាញ់ កត់សម្គាល់ថា ជាក់ស្តែង តាំងពីមានផ្លូវជាតិលេខ៤៨មក អ្វីៗដែលធ្វើឱ្យខេត្តកោះកុងទទួលនូវភាពប្រសើរទាំងអត្រាចំនួនប្រជាពលរដ្ឋរស់នៅប្រកបអាជីវកម្ម ប្រព័ន្ធផ្លូវថ្នល់ងាយស្រួលធ្វើដំណើរដឹកជញ្ចូនទំនិញពាណិជ្ជកម្ម ក៏ដូចជាការអភិវឌ្ឍន៍ឥតឈប់ គឺបានមកពីសុខសន្តិភាពគោលនយោបាយឈ្នះៗរបស់សម្តេចតេជោ ប្រមុខរាជរដ្ឋាភិបាកម្ពុជាសព្វថ្ងៃ ទើបលទ្ធភាពបង្ហាញសក្តានុពលដ៏ទាក់ទាញទៅកាន់ពិភពលោក។

ទន្ទឹមនេះ សម្តេចរំលេចថា បច្ចុប្បន្នគម្រោងផែនការអភិវឌ្ឍន៍ហេដ្ឋារចនាសម្ព័ន្ធក្នុងខេត្តកោះកុង ជាពិសេសស្រុកកោះកុងបាន និងកំពុងដំណើរការអភិវឌ្ឍន៍បោះជំហានទៅមុខយ៉ាងរលូននោះគឺតំបន់រៀបរយ និងតំបន់វិស្សមកាលឃុំជ្រោយប្រស់ចាប់ភូមិតាកាន ឃុំទួលគគីរទៅកាន់ឃុំព្រែកខ្សាច់ ស្រុកគិរីសាគរ រួមមាន៖ ការតភ្ជាប់ផ្លូវថ្នល់ ស្ពាន ទីលំហែកម្សាន្តទេសចរណ៍ធម្មជាតិ និងមណ្ឌលអភិរក្សប្រវត្ថិសាស្រ្តជាដើម។

ប៉ុន្តែទោះយ៉ាងណា សម្តេចទទួលស្គាល់ពីបញ្ហាប្រឈមមួយចំនួនដែលមិនទាន់បានដោះស្រាយបាន ដូច្នេះសម្តេចទាមទារឱ្យអាជ្ញាធរ និងក្រុមការងារជួយខេត្ត ក្រុងស្រុក ព្រមទាំងមន្ទីរអង្គភាពជំនាញ ត្រូវយកចិត្តទុកដាក់រួមគ្នាដោះស្រាយថែមទៀត ដើម្បីលើកម្ពស់កិច្ចអភិវឌ្ឍន៍ប្រកបដោយចីរភាពទៅថ្ងៃអនាគត។

សម្តេចពិជ័យសេនា ទៀ បាញ់ បានកោតសរសើរកិច្ចប្រឹងប្រែងរបស់ថ្នាក់ដឹកនាំ រដ្ឋបាលខេត្តកោះកុង ក្រុងស្រុក និងមន្ទីរជំនាញពាក់ព័ន្ធដែលយកចិត្តទុកដាក់ខ្ពស់លើដំណើរការដោះស្រាយប្រឈម និងការអភិវឌ្ឍន៍នានាក្នុងមូលដ្ឋានខេត្ត ដើម្បីឆ្លើយតបនឹងគោលនយោបាយដាក់ចេញដោយសម្តេចតេជោ ហ៊ុន សែន នាយករដ្ឋមន្រ្តី៕

អត្ថបទ៖ សិរីវឌ្ឍនៈ