ព័ត៌មានជាតិ

គិតមកដល់ដើមឆ្នាំ ២០២២ ប្រជាពលរដ្ឋនៅជនបទខេត្តសៀមរាប ៧៦ភាគរយទទួលបានទឹកស្អាតប្រើប្រាស់

បានផុស

៤ years មុន

នៅ

ថ្ងៃចន្ទ ២៨ កុម្ភៈ ២០២២

ដោយ

គិតត្រឹមដើមឆ្នាំ ២០២២ នេះប្រជាពលរដ្ឋរស់នៅតំបន់ជនបទក្នុងខេត្តសៀមរាបប្រមាណ ៧៦ ភាគរយហើយបានទទួលទឹកស្អាតប្រើប្រាស់។ ជាអណ្តូងទឹកស្អាតនិងខ្លះ ទៀតត្រូវតភ្ជាប់បណ្តាញទុយោទឹកសម្រាប់ប្រជាពលរដ្ឋប្រើប្រាស់ ទៅតាមស្ថានភាពភូមិសាស្ត្រជាក់ស្តែងក្នុងឃុំ ស្រុកនីមួយៗ។ នេះបើតាមលោក សឿ សហរិទ្ធ អនុប្រធាន មន្ទីរអភិវឌ្ឍន៍ជនបទខេត្តសៀមរាប។

លោក សឿ សហរិទ្ធ អនុប្រធានមន្ទីរអភិវឌ្ឍន៍ជនបទខេត្តសៀមរាបបានឲ្យដឹងថា សេវាផ្គត់ផ្គង់ទឹកស្អាតនិងអនាម័យជនបទគឺជាតម្រូវការបន្ទាន់បំផុតសម្រាប់ការពារ និង លើកស្ទួយសុខមាលភាពនិងជីវភាពរស់នៅរបស់ប្រជាពលរដ្ឋនៅតាមទីជនបទនិងធ្វើឲ្យប្រសើរឡើងនូវស្ថានភាពសេដ្ឋកិច្ចនៅតំបន់ជនបទ។

លោក សឿ សហរិទ្ធ បន្តថា គិតមកដល់ដើមឆ្នាំ ២០២២ នេះនៅក្នុងខេត្តសៀមរាបការផ្គត់ផ្គង់ទឹកស្អាតសម្រាប់ប្រជាពលរដ្ឋនៅតំបន់ជនបទសម្រេចបានប្រមាណ ៧៦ ភាគរយ ។ សម្រាប់ដំណើរការផ្គត់ផ្គង់ទឹកស្អាតត្រូវអនុវត្តទៅតាមស្ថានភាពជាក់ស្តែងទៅតាមទីតាំងភូមិសាស្ត្រនីមួយៗដោយគោលដៅខ្លះត្រូវផ្តល់ជូនជាអណ្តូងទឹកនិងខ្លះ ទៀតត្រូវតភ្ជាប់បណ្តាញទុយោទឹកសម្រាប់ប្រជាពលរដ្ឋប្រើប្រាស់។

លោក សឿ សហរិទ្ធ បានមានប្រសាសន៍ថា៖«ភាគរយការប្រើប្រាស់ទឹកនិងអនាម័យក្នុងខេត្តសៀមរាបរបស់យើងនិយាយលេខមូលអនាម័យយើងសម្រេចបាន ៧៩ ភាគ រយ និងទឹកស្អាតយើងសម្រេចបាន៧៦ភាគរយ»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបន្តថា វិស័យផ្គត់ផ្គង់ទឹកស្អាតនៅក្នុងខេត្តសៀមរាបមានទៅតាមលក្ខខណ្ឌស្ថានភាពជាក់ស្តែងរបស់មូលដ្ឋាននីមួយៗ ឧទាហរណ៍បើមូលដ្ឋានណាដែលមានប្រភពទឹកក្រោមដីរាក់ៗល្មមបានន័យថា ចាប់ពី២៥ម៉ែត្រទៅដល់១០០ម៉ែត្រយើងមានផ្តល់ជាអណ្តូងខួងជ្រៅជូនប្រជាពលរដ្ឋប្រើប្រាស់,ហើយក៏មានមូលដ្ឋានខ្លះដែលមានស្ថានភាព ទឹកក្រោមដីពិបាកដូចនៅខាងជីក្រែង ខាងសង្វើយ យើងបានផ្តល់ជាបណ្តាញចែកចាយទឹកខ្នាតតូចតាមទុយោ នៅតាមសហគមន៍តាមភូមិនីមួយៗឱ្យគាត់មានបណ្តាញ ទឹកស្អាតប្រើប្រាស់។ តាមប៉ាន់ស្មានទូទាំងខេត្តមានអណ្តូងទឹកស្អាតប្រមាណ៣ម៉ឺនអណ្តូងនិងបណ្តាញចែកចាយទឹកខ្នាតតូចតាមទុយោមាណ២០កន្លែងក្នុងទូទាំងខេត្ត។

លោកអនុប្រធានមន្ទីរអភិវឌ្ឍន៍ជនបទខេត្តសៀមរាបបានឲ្យដឹងទៀតថា ផែនការបន្តសម្រាប់វិស័យផ្គត់ផ្គង់ទឹកស្អាតនិងអនាម័យជនបទមន្ទីរនឹងបន្តកៀរគរដៃគូអភិវឌ្ឍន៍ នានាឱ្យចូលរួមក្នុងការផ្តល់អាទិភាពដល់មូលដ្ឋានមួយចំនួនដែលមានភាពខ្វះខាតប្រភពទឹកប្រើប្រាស់ដើម្បីលើកកម្ពស់អនាម័យជនបទ។ តាមទស្សនវិស័យនិងគោល នយោបាយសម្រាប់ ឆ្នាំ ២០២៥ ការផ្គត់ផ្គង់ទឹកស្អាតនិងអនាម័យជនបទ គឺប្រជាពលរដ្ឋគ្រប់រូបនៅសហគមន៍ជនបទត្រូវមានសេវាផ្គត់ផ្គង់ទឹកស្អាតនិងអនាម័យគ្រប់គ្រាន់ ព្រម ទាំងរស់នៅក្នុងបរិស្ថានដែលមានអនាម័យប្រកបដោយនិរន្តរភាព។

ចំពោះអ្នកទីក្រុងទឹកម៉ាស៊ីនគឺមិនចំឡែកអ្វីទេ។ តែនៅតាមតំបន់ជនបទដែលមិនទាន់មានប្រព័ន្ធទឹកម៉ាស៊ីននេះ ប្រជាជនប្រើប្រាស់ប្រភពទឹកសម្រាប់ជីវភាពរស់នៅប្រចាំថ្ងៃ នោះគឺទឹកអណ្តូងស្នប់នឹងទឹកភ្លៀងគឺជាជម្រើសរបស់គេ។ ដូចនេះហើយប្រភពទឹកត្រូវតែឆ្លើយតបយ៉ាងគ្រប់គ្រាន់ទៅនឹងការរស់នៅរបស់ពួកគេនឹងសំខាន់ជាងនេះគឺមាន អនាម័យល្អ៕

ដោយ ៖ ណារី