ខេត្តព្រះសីហនុ ចាប់ផ្តើមសង់អគាររដ្ឋបាលសាលាខេត្តថ្មី រចនាបថសំបូរព្រៃគុក

រដ្ឋបាលខេត្តព្រះសីហនុចាប់ផ្តើមពិធីក្រុងពាលី បញ្ចុះបឋមសិលា សាងសង់អគាររដ្ឋបាលសាលាខេត្តព្រះសីហនុថ្មី នៅលើទីតាំងចាស់ មានផ្ទៃក្រឡាសរុប ៤៤ ០០០ ម៉ែត្រការ៉េ គ្រោងសាងសង់ដោយប្រើរយៈពេល ១៨ខែ។

ពិធីក្រុងពាលី បញ្ចុះបឋមសិលា សាងសង់នេះ ប្រព្រឹត្តិទៅនៅថ្ងៃទី០៧ ខែមីនា ឆ្នាំ២០២២ ដោយមានការចូលរួមពីលោក សូរ ជុងហួរ ប្រធានក្រុមប្រឹក្សាខេត្តព្រះសីហនុ និងលោក គួច ចំរើន អភិបាល នៃគណៈអភិ បាលខេត្តព្រះសីហនុ។

លោក គួច ចំរើន ធ្លាប់បានមានប្រសាសន៍ថា រដ្ឋបាលខេត្តព្រះសីហនុនឹងមានអគារសាលាខេត្តកម្ពស់ ៤ ជាន់ សាងសង់តាមរចនាបទសំបូរព្រៃគុកដ៏ថ្មីស្រឡាង ដោយប្រើពេលសាងសង់រយៈពេល ១៨ខែ។

លោកអភិបាលខេត្ត បានបន្តថា អគារសាលាខេត្តនេះមានផ្ទៃក្រឡាសរុប ៤៤ ០៩៣ ម៉ែត្រការ៉េ ហើយចំពោះស្ថាបត្យកម្ម នៃអគារ គឺយកតាមរចនាបទសំបូរព្រៃគុក ដែលជាអគារមានលក្ខណៈខ្មែរទំនើបស៊ីវីល័យ។

លោកអភិបាលខេត្តបានមានប្រសាសន៍បន្តទៀតថា ការសាងសង់អគារថ្មីនេះ បានទទួលការឯកភាពពីសម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងមានការគាំទ្រពីលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់៕

អត្ថបទ៖ សំអឿន