រសៀលស្អែកនេះ សម្តេច ហ៊ុន សែន នឹងជួបសំណេះសំណាលជាមួយប្រតិភូនាវាកងទ័ពជើងទឹកជប៉ុននៅផែសមុទ្ររាម

នៅថ្ងៃចន្ទនេះ ប្រតិភូនាវាកងទ័ពជើងទឹកជប៉ុន នឹងមកដល់ប្រទេសកម្ពុជា ដើម្បីបំពេញទស្សនកិច្ចផ្លូវការ។ វត្តមាន​កងទ័ព​ស្វ័យការពារ​ជប៉ុន​នាពេលនេះ គឺដើម្បីចូលរួម​អបអរសាទរ​ខួប៣០​ ឆ្នាំ ដែលកងទ័ព​ស្វ័យការពារ​ជប៉ុន​បាន​បញ្ជូន​កម្លាំងចេញទៅក្រៅប្រទេសក្នុងប្រតិបត្តិ​ការរក្សាសន្តិភាព​អង្គការសហប្រជាជាតិ​នៅ​កម្ពជា ហើយក្នុងឱកាសស្នាក់នៅកម្ពុជា កងទ័ពស្វ័យការពារជប៉ុន ក៏នឹងទស្សនកិច្ចនៅកំពង់ផែរាមផងដែរ។

លោក ឈុំ សុជាតិ អ្នកនាំ ពាក្យក្រសួងការពារជាតិកម្ពុជា បានប្រាប់«កម្ពុជាថ្មី»ថា នៅក្នុងដំណើរទស្សនកិច្ចរបស់ប្រតិភូនាវាកងទ័ពជើងទឹកជប៉ុន នៅកំពង់ផែសមុទ្ររាមនេះ សម្តេចអគ្គមហាសេនបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា នឹងទទួលជួបសំណេះសំណាលជាមួយពួកគេនៅរសៀលថ្ងៃអង្គារ ស្អែកនេះ។

សូមជម្រាបថា នាវាស្វ័យការពារជប៉ុនចំនួនពីរគ្រឿងប្រចាំតំបន់ឥណ្ឌូ-ប៉ាស៊ីហ្វិក គ្រោងនឹងចូលចតនៅកំពង់ផែស្វយ័ត ក្រុងព្រះសីហនុ រយៈពេលចាប់ពីថ្ងៃទី១៤-១៧ ខែមីនា ដើម្បីសម្តែងការគួរសម និងបំពេញទស្សនកិច្ចជាមិត្តភាពនៅកម្ពុជា និងជាការរំលឹកអបអរសាទខួបលើកទី៣០ នៃកិច្ចសហប្រតិបត្តិការរក្សាសន្តិភាពនៅក្នុងប្រទេសកម្ពុជា។

នាវាស្វ័យការពារជប៉ុនទាំងពីរគ្រឿងមាន គឺនាវាទី១ ឈ្មោះ URAGA – 463ជាប្រភេទនាវាប្រឆាំងមីនមាន បណ្ដោយ ១៤១ ម៉ែត្រ ទទឹង ២២ ម៉ែត្រ ជម្រៅទឹក ៥,៤ ម៉ែត្រ មានទម្ងន់ផ្ទុក ៥.៦៥០ តោន និងមាននាវិកចំនួន ១២៦ នាក់ ។ នាវាទី២ ឈ្មោះ HIRADO – 305 មានបណ្ដោយ ៦៧ ម៉ែត្រ ទទឹង ១១ ម៉ែត្រជម្រៅទឹក ២,៧ ម៉ែត្រ មានទម្ងន់ផ្ទុក ៦៩០ តោន និងមាននាវិក ចំនួន ៥៤ នាក់។ នាវាទាំងពីរគ្រឿងនេះ ដឹកនាំបញ្ជារួម ដោយលោក Noguchi Yasushi មេបញ្ជាការកងពលធំទី១ បោសសំអាតមីន ប្រចាំតំបន់ឥណ្ឌូ-ប៉ាស៊ីហ្វិក។ ក្នុងពេលបំពេញទស្សនកិច្ចនៅកម្ពុជា ប្រតិភូនាវាស្វ័យការពារជប៉ុន នឹងជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាផងដែរ។

សម្តេច​ពិជ័យ​សេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រី​ក្រសួងការពារជាតិ ធ្លាប់បានប្រាប់អ្នកសារព័ត៌មានថា កងទ័ព​ស្វ័យការពារ​ជប៉ុន នឹង​ចូល​សំចត​នៅ​កំពង់ផែ​ស្វយ័ត ក្រុងព្រះសីហនុ​រយៈពេល​បួន​ថ្ងៃ ចាប់ពី​ថ្ងៃទី​១៤-១៧ ខែមីនា ឆ្នាំ​២០២២ ខខាងមុខនេះ ហើយក្នុងឱកាសស្នាក់នៅកម្ពុជា កងទ័ព​ស្វ័យការពារ​ជប៉ុន​ ក៏​នឹង​ទៅ​មើល​កំពង់ផែ​រាម​ផងដែរ​។​ សម្តេចបន្តថា វត្តមាន​កងទ័ព​ស្វ័យការពារ​ជប៉ុន​នាពេលនេះ គឺដើម្បីចូលរួម​រម្លឹក​ខួបអបអរសាទរ​ខួប៣០​ឆ្នាំ ដែល​កងទ័ព​ស្វ័យការពារ​ជប៉ុន​បាន​បញ្ជូន​កម្លាំង​ចេញទៅ​ក្រៅប្រទេស ក្នុងប្រតិបត្តិ​ការរក្សាសន្តិភាព​អង្គការសហប្រជាជាតិ​នៅ​កម្ពុជា។​

បើតាមសម្តេច​ពិជ័យ​សេនា​ ទៀ បាញ់ ដំណើរទស្សនកិច្ចរបស់ប្រតិភូកងនាវាជើងទឹកជប៉ុន នៅផែសមុទ្ររាមនេះ វា​មិនមែនជា​រឿងសម្ងាត់​ទេ​ ពីព្រោះតាំងពីដើមមក​ កម្ពុជា​មាន​ផែ​ដ៏​តូច​មួយនេះដែលមានទឹក​រាក់ ហើយកន្លងមកមិនដែលមាននាវាចូលចត​ទេ ដោយសារមិនអាចចូលចតបាន តែលើកនេះ ដោយសារ​នាវាកង​ស្វ័យការពារ​ជប៉ុន ជាប្រភេទ​នាវាទឹក​រាក់ ហើយ​មាន​លក្ខណៈសម្បត្តិ​អាច​ចូលទៅ​ផែ​រាម​បាន ទើបកម្ពុជាអនុញ្ញាត។ សម្តេច​ពិជ័យ​សេនា​ ទៀ បាញ់ បញ្ជាក់ថា ដោយសារតែភាពតូចចង្អៀតនេះហើយ ទើបកម្ពុជាធ្វើ​ទំនើបកម្មឲ្យទូលាយ ហើយវា​ចាំបាច់់ ដែលត្រូវពង្រីកកំពង់ផែរាមនេះ៕

ដោយ ៖ កោះកែវ