ព័ត៌មានជាតិ
កសិករ កំពុងស្ទាក់ស្ទើរក្នុងការចិញ្ចឹមជ្រូក ដោយរង់ចាំយន្តការដេញថ្លៃរបស់ក្រសួង
ប្រធានសមាគមអ្នកចិញ្ចឹមសត្វកម្ពុជា លោក ស្រ៊ុន ពៅ បានឲ្យដឹងថា ក្រុមហ៊ុន និងកសិករ កំពុងស្ទាក់ស្ទើរក្នុងការទិញកូនជ្រូកយកមកចិញ្ចឹមជាថ្មី ដោយរង់ចាំយន្តការដេញថ្លៃជ្រូករស់នាំចូលរបស់ក្រសួងចេញជាផ្លូវការ។
លោក ស្រ៊ុន ពៅ បានថ្លែងដូច្នេះថា« ដោយសារមិនទាន់ច្បាស់លាស់អំពីយន្តការនៃការដេញថ្លៃជ្រូករស់នាំចូល ដែលក្រសួងគ្រោងដាក់ចេញ សព្វថ្ងៃកសិករ មិនទាន់ហ៊ានសម្រុកចិញ្ចឹមបន្ថែមទៀត នៅឡើយ»។
ប្រធានសមាគមបន្តទៀតថា « រដ្ឋាភិបាល មិនសម្លាប់កសិករខ្លួនឯងទេ.. យើងមិនទាន់ដឹងថា គោលការណ៍ដេញថ្លៃនេះរបៀបម៉េច យើងអត់ទាន់សន្និដ្ឋានបាននៅឡើយ។ ជួនកាលយន្តការនេះល្អដល់វិស័យចិញ្ចឹមសត្វក៏ថាបាន យើងអត់អាចនិយាយបានដោយសារមិនទាន់អនុវត្ត»។
នាពេលថ្មីៗនេះ ក្រសួងសេដ្ឋកិច្ច និងហិរញ្ញវត្ថុ បានស្នើក្រសួងកសិកម្មឱ្យរៀបចំយន្តការដេញថ្លៃនាំចូលជ្រូករស់ប្រកបដោយភាពប្រកួតប្រជែង ដើម្បីរក្សាស្ថិរភាពថ្លៃនៅលើទីផ្សារក្នុងកម្រិតមួយសមរម្យនៅពេលមានកង្វះការផ្គត់ផ្គង់ជ្រូកនៅក្នុងស្រុក។
លិខិតរបស់ក្រសួងសេដ្ឋកិច្ច និងហិរញ្ញវត្ថុដែលផ្ញើជូនរដ្ឋមន្ត្រីក្រសួងកសិកម្ម កាលពីថ្ងៃទី ៨ ខែកុម្ភៈ បានបញ្ជាក់ថា ដោយសារតែតម្លៃសាច់ជ្រូកមានការឡើងថ្លៃជាបន្តបន្ទាប់រហូតដល់តម្លៃពី ២៥ ០០០-២៦ ០០០ រៀលក្នុង ១ គីឡូក្រាម ក្នុងឆ្នាំ ២០២១ ដែលអាចធ្វើឱ្យប៉ះពាល់ដល់ការរស់នៅរបស់ប្រជាពលរដ្ឋ ដូច្នេះការរៀបចំយន្តការដេញថ្លៃជ្រូករស់ ដើម្បីធានាឱ្យបានការនាំចូលជ្រូករស់ស្ថិតក្នុងតម្លៃមួយប្រកបដោយភាពប្រកួតប្រជែង រក្សាស្ថិរភាពថ្លៃជ្រូករស់ និងថ្លៃលក់សាច់ជ្រូកនៅលើទីផ្សារក្នុងកម្រិតមួយសមរម្យ។ ប៉ុន្តែយន្តការនេះត្រូវប្រើប្រាស់នៅពេលដែលមានកង្វះការផ្គត់ផ្គង់ក្នុងស្រុកតែប៉ុណ្ណោះ ពោលគឺពុំត្រូវបានយកមកអនុវត្តជាប្រចាំឡើយ ដើម្បីកុំឱ្យប៉ះពាល់ដល់ផលប្រយោជន៍អ្នកចិញ្ចឹមជ្រូកនៅក្នុងស្រុក។
ជាការឆ្លើយតប លោក ស៊្រុន ពៅ បានលើកឡើងថា សព្វថ្ងៃការផ្គត់ផ្គង់តម្រូវការទីផ្សារក្នុងស្រុកគ្រប់គ្រាន់ហើយ មិនគួរនាំចូលពីខាងក្រៅទេ។ «ជាក់ស្តែងយើងបានផ្អាកនាំចូលរយៈពេល ៦ខែហើយ ឃើញថា ជ្រូកក្នុងស្រុកអត់មានខ្វះទីផ្សារ ហើយសល់ថែមទៀត»។
បើតាមលោក ស្រ៊ុន ពៅ រាល់ថ្ងៃថ្លៃដើមផលិតរបស់អ្នកចិញ្ចឹមចំណាយអស់ ១២ ០០០រៀល ចំពោះការលក់ចេញបានតែ ១១ ០០០រៀលប៉ុណ្ណោះ ក្នុងមួយគីឡូក្រាមជ្រូករស់ ដែលតម្លៃលក់ចេញនេះ មិនដល់ថ្លៃដើម ធ្វើកសិករខាតបង់ ដែលនេះជាកត្តាប្រឈមចំពោះអ្នកចិញ្ចឹម។
ការចិញ្ចឹមដែលអាចឲ្យកសិករ និងក្រុមហ៊ុនទទួលបានប្រាក់ចំណេញ គឺតម្លៃចន្លោះពី ១២,០០០រៀល ទៅ ១៣.០០០រៀល ក្នុងមួយគីឡូក្រាម។ នេះជាការបញ្ជាក់របស់លោក ស្រ៊ុន ពៅ។
កម្ពុជាថ្មី បានទាក់ទងអ្នកនាំពាក្យក្រសួងសេដ្ឋកិច្ច លោក មាស សុខសេនសាន ដើម្បីសុំការអត្ថាធិប្បាយជុំវិញយន្តការដេញថ្លៃជ្រូកនេះ លោកប្រាប់ថា កំពុងជាប់ប្រជុំ។
សូមបញ្ជាក់ថា បច្ចុប្បន្ននេះតម្រូវការសាច់ជ្រូកនៅលើទីផ្សារកម្ពុជា មានប្រមាណ ៨ ពាន់ក្បាល ក្នុង ១ថ្ងៃ ដែលផ្គត់ផ្គង់ដោយជ្រូកក្នុងស្រុកទាំងស្រុង៕
អត្ថបទ៖ ទួន សុផល
-
កីឡា៥ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សេដ្ឋកិច្ច១ សប្តាហ៍ ago
តាសក់ផ្អែម ៥ តោន របស់ កសិករម្នាក់ លក់ចេញអស់ ក្រោយសហគមន៍កសិកម្មជួយរកទីផ្សារ
-
ព័ត៌មានអន្ដរជាតិ១ សប្តាហ៍ ago
នាឡិកា ៦ គ្រឿងរបស់កូនពៅសេដ្ឋី ឥណ្ឌា ដែលខំសន្សំទុក មានមួយមេ Facebook ទាក់ចិត្តខ្លាំង
-
សន្តិសុខសង្គម៦ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ៧ ថ្ងៃ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៤ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ