​មន្ត្រី​ស្នើ​ឱ្យ​អ្នកសារ​ព័ត៌មាន​ចេញផ្សាយ​អត្ថបទ​ឆ្លុះបញ្ចាំង​ពីការពិត​ចៀសវាង​បង្កមហន្តរាយ​ដល់ប្រជាជន

​មន្ត្រីជាន់ខ្ពស់​ក្រសួងព័ត៌មាន​បានទទូចឱ្យ​អ្នកសារព័ត៌មាន​សរសេរ​អត្ថបទ​ឱ្យឆ្លុះបញ្ចាំង​ពីការពិត​ ចៀសវាង​បង្កវិនាសកម្ម​ មហន្តរាយ​​ដល់ប្រជាតិ​។

​លោក ផុស សុវណ្ណ ប្រតិភូរាជរដ្ឋាភិបាល ទទួលបន្ទុកអគ្គនាយក នៃអគ្គនាយកដ្ឋានព័ត៌មាន និង​សោតទស្សន៍ មានប្រសាសន៍ឱ្យដឹង នៅក្នុងវគ្គបណ្ដុះបណ្ដាល តួនាទីរបស់អ្នកសារព័ត៌មាន ក្រោម​ប្រធានបទ ទន្លេតែមួយ អនគតតែមួយ នៅថ្ងៃទី ២៩ ខែមីនា ឆ្នាំ ២០២២ នេះថា បណ្ដា​ប្រទេស​ដែលមានកិច្ចសហប្រតិបត្តិការទន្លេមេគង្គឡានឆាង កំពុងរស់នៅតាមបណ្ដោយទន្លេមេគង្គ ហើយ​ប្រជាជនកំពុងប្រើប្រាស់ទន្លេមេគង្គរួមគ្នា ដើម្បីបានផលប្រយោជន៍ កសិកម្ម សេដ្ឋកិច្ច និងនយោ​បាយ​ផ្សេងៗ។

​លោកថា តួនាទីព័ត៌មាន​ ក៏មានសារសំខាន់ដែរ​ ក្នុងការផ្សព្វផ្សាយ ​បញ្ជ្រាប​ការយល់ដឹង​ ប្រសិនបើ​អ្នកសាព័ត៌មាន​ផ្សព្វផ្សាយ​ប្រកបដោយវិជ្ជជីវៈ​ ត្រឹមត្រូវ​តាមគោលការណ៍ច្បាប់​ និងសភាព​ដើមពិត​ពីព័ត៌មាន ជូនដល់ប្រជាពលរដ្ឋ ធ្វើឱ្យប្រជាពលរដ្ឋមានព័ត៌មានគ្រប់ជ្រុងជ្រោយសម្រាប់ធ្វើការវិភាគ និងសម្រេចចិត្ត ដើម្បីជ្រើសរើសលើការវិនិយោគ ឬធ្វើអ្វីមួយ តាមគោលដៅរួម។ ប៉ុន្តែបើព័ត៌មាន ទៅជាព័ត៌មានបំភ្លើស បំពុល អញ្ចឹងព័ត៌មាននោះធ្វើឱ្យលិចលង់ និងការម្រេចចិត្តមិនត្រឹមត្រូវ។

​លោក ផុស សុវណ្ណថ្លែងថា៖ ” ថ្ងៃនេះ ទាំងសិក្ខាកាមនៅទីនេះ ក៏ដូចជាសិក្ខាកាម​ដែលចូល​រួមតាមអនឡាញ គួតែពិនិត្យមើលលើមាតិការព័ត៌មាន ឬក៏សរសេរអត្ថបទព័ត៌មាន ដែលវាឆ្លុះ​បញ្ចាំង​ការពិតសម្រាប់ជាចំណេះដឹង ចំណេះធ្វើមានខ្លឹមសារ តែបើមិនដូច្នេះទេព័ត៌មានមិនពិត វានឹងបង្ក​មហន្តរាយ​ទៅដល់ប្រជាពលរដ្ឋ​”។

លោក កឹម គុណវឌ្ឍន៍ រដ្ឋលេខាធិការក្រសួងព័ត៌មានថ្លែងថា៖ អ្នកសាព័ត៌មាន​ត្រូវមានសមត្ថភាពក្នុងការរាយការណ៍ និងផ្សព្វផ្សាយព័ត៌មានពិតត្រឹមត្រូវ កន្លងមកកិច្ចសហប្រតិបត្តិការ ប្រព័ន្ធផ្សព្វផ្សាយក្នុងចំណោមប្រទេសជាសមាជិកឡាន​ឆាងមេគង្គនៅមានកម្រិត ការពង្រឹងកិច្ចស​ហប្រតិបត្តិ​ការក្នុងចំណោមអ្នកសារព័ត៌មាន អាចពង្រឹកគុណភាពនៃភាពសំបូរបែបនៃព័ត៌មាន ប្រសិទ្ធ​ភាពការងារ និងចំណេញពេលវេលា”។

លោកថ្លែងជំរុញឱ្យអ្នកសាព័ត៌មាន ឬអង្គភាព​ព័ត៌មាន ត្រូវចាត់វិធានការ ដើម្បីពង្រឹងគុណភាពព័ត៌មាន ផលិតមានតិការដែលគួឱ្យទាក់ទាញ មាន​ភាព​ពាក់ព័ន្ធការពិត បម្រើផលប្រយោជន៍សាធារណៈ ដោយមានការលុបបំបាត់ដំណឹងក្លែងក្លាយ និងព័ត៌មានមិនពិត៕

អត្ថបទ៖ ឡេង ដេត