ព័ត៌មានជាតិ

តុលាការកាត់ទោសអ្នកជំនួញចិនបើកកន្លែងសេពគ្រឿងញៀន

បានផុស

២ years មុន

នៅ

ថ្ងៃចន្ទ ២៥ មេសា ២០២២

ដោយ

ចៅក្រមសាលាដំបូងរាជធានីភ្នំពេញ លោកស្រី យិច ឈាណាវី នៅព្រឹកថ្ងៃទី ២៥ ខែមេសា ឆ្នាំ២០២២នេះ បានបើកសវនាការកាត់ទោសបុរសជនជាតិចិនម្នាក់ដែលជាប់ពាក់ព័ន្ធជំនួញគ្រឿងញៀនខុសច្បាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បុរសជនជាប់ចោទដែលតុលាការកម្ពុជាកាត់ទោសឈ្មោះ Chen xin zhuang អាយុ៣៣ឆ្នាំ មានស្រុកកំណើតនៅប្រទេសចិន ជាម្ចាស់ខុនដូជួលមួយកន្លែងស្ថិតនៅផ្លូវលេខ ៩៥ សង្កាត់បឹងកេងកង២ ខណ្ឌបឹងកេងកង រាជធានីភ្នំពេញ។

លោក Chen xin zhuang ត្រូវបានតុលាការសម្រេចចោទប្រកាន់ពីបទ «ជួញដូរ បទសម្រួលឱ្យប្រើប្រាស់ដោយខុសច្បាប់នូវសារធាតុញៀន បទរក្សាទុកកាន់កាប់អាវុធគ្មានច្បាប់អនុញាត បទបំពានវិធានការរដ្ឋបាលដើម្បីការពារការឆ្លងជំងឺកូវីដ១៩»។

ជនជាប់ចោទបានបដិសេធចំពោះការរកឃើញគ្រឿងញៀន និងកាំភ្លើងនៅក្នុងខុនដូ ប៉ុន្តែទទួលស្គាល់ការបំពានបំរាមវិធានការរដ្ឋបាល។

លោក Chen xin zhuang បានសារភាពថា ខ្លួនបានជួលខុនដូមួយកន្លែងចំនួន៣ ជាន់ គឺជាន់ទី ៧ ទី ៨ និងទី ៩ដើម្បីបើកខារ៉ាអូខេ ក្នុងនោះនៅជាន់ទី៧ បើកកន្លែងទទួលភ្ញៀវផឹកតែនៅជាន់ទី៨ និងបើកកន្លែងវាយកូនហ្គោលនៅជាន់ទី៩ ក្នុងតម្លៃ១ខែ ១៣ ០០០ដុល្លារ។ លុះដល់ថ្ងៃទី ១៨ ខែឧសភា ឆ្នាំ២០២១ ក៏ត្រូវបានសមត្ថកិច្ចកម្ពុជាចុះទៅចាប់ខ្លួនខណៈកំពង់រៀបចំខួបកំណើតឱ្យមិត្តភ័ក្រនៅជាន់ទី៧។

នៅក្នុងសវនាការជនជាប់ចោទបានសារភាពថា ខ្លួនបានទៅទិញគ្រឿងញៀននៅខាងក្រោយវាំងដើម្បីទុកប្រើប្រាស់ខ្លួនឯង និងបានទិញកាំភ្លើងខ្លីមួយដើមពីបុរសម្នាក់ក្នុងតម្លៃ ៥០០ដុល្លារ មកទុកក្នុងទូរដែក ប៉ុន្តែសូមបដិសេធចំពោះគ្រឿងញៀនមួយចំនួនទៀតដែលសមត្ថកិច្ចរកឃើញនៅក្នុងខុនដូរនោះ ព្រោះខ្លួនគេបានជួលបន្ទប់ខារ៉ាអូខេឱ្យអ្នកផ្សេងធ្វើអាជីវកម្ម។

កញ្ញា សុង ឆវ័ន្ត ជាតំណាងអយ្យការបានបញ្ជាក់ថា ជនជាប់ចោទមិនមានភស្តុតាងផ្ទុយដើម្បីបង្ហាញពីភាពសុច្ចរិតទេ និងស្នើឱ្យក្រុមប្រឹក្សាតុលាការសម្រេចតាមច្បាប់។

លោកស្រីចៅក្រម យិច ឈាណាវី បានកំណត់យកថ្ងៃទី ១១ ឧសភា ឆ្នាំ ២០២២ ខាងមុខដើម្បីប្រកាសសាលក្រម៕

អត្ថបទ៖មករា

Related Topics:កម្ពុជា-ចិន