ផ្តន្ទាទោស​ជនជាតិចិន៩ នាក់​ឱ្យជាប់ពន្ធនាគារមួយជីវិត​ពីបទជួញដូរគ្រឿងញៀន​ជាង ៣០០ គីឡូ

ចៅក្រមសាលាដំបូងរាជធានីភ្នំពេញនៅរសៀលថ្ងៃ ទី២១ ខែកក្កដា ឆ្នាំ២០២២នេះ​ បានប្រកាស​សាលក្រមផ្តន្ទាទោស លើជនជាតិចិន៩ នាក់ ដាក់គុកម្នាក់ៗអស់មួយជីវិត និងតម្រូវឲ្យបង់ប្រាក់​ចូលថវិការរដ្ឋតាមច្បាប់ពាក់ពន្ធករណីជួញដូរគ្រឿងញៀនដោយខុសច្បាប់ប្រមាណ៣៥០ គីឡូក្រាម។

សាលក្រមបានទុកសិទ្ធិឲ្យប្តឹងឧទ្ធរណ៍ បើសិនជនជាប់ចោទមិនសុខចិត្ត​ចំពោះការ​កាត់​ក្តីនេះ។ អ្នកទាំង ៩ នាក់ជាប់​ចោទពីបទរក្សាទុក និង​ជួញ​ដូរដោយខុសច្បាប់នូវសារធាតុញៀន និងបទសម្អាតប្រាក់។

កាលពីថ្ងៃទី២៤ ខែធ្នូ ឆ្នាំ២០២១ សមត្ថកិច្ចជំនាញនៃមន្ទីរប្រឆាំងគ្រឿងញៀនបានដំណើរការស្រាវបង្ក្រាប ដោយមានកិច្ចសហប្រតិបត្តិការជាមួយសមត្ថកិច្ចចិន។

កិច្ចប្រតិបត្តិការនេះបានធ្វើឡើងចំនួន២គោលដៅផ្សេងគ្នា គឺនៅចំណុចវីឡាភ្លោះលេខ២១ ផ្លូវលេខ R03 ស្តាផ្លាទីនឹម បុរីប៉េងហូតបឹងស្នោ សង្កាត់និរោធ ខណ្ឌច្បារអំពៅ និងនៅចំណុចភោជនីយដ្ឋាន​អីយិនម៉ាថូវ សង្កាត់បឹងព្រលឹត ខណ្ឌ៧ មករា រាជធានីភ្នំពេញ បានធ្វើការឃាត់ខ្លួន​ជនសង្ស័យ​សរុប៩ នាក់។

ជនត្រូវចោទមាន៖

១.ឈ្មោះ HUANG RUI MING ភេទប្រុស អាយុ៥៨ឆ្នាំ (មេក្លោង)។

២.ឈ្មោះ LI YI NAN ភេទប្រុស អាយុ៣៨ ឆ្នាំ

៣.ឈ្មោះ SUN LIANG ភេទប្រុស អាយុ៤២ឆ្នាំ

៤.ឈ្មោះ SUN HAI TAO ភេទប្រុស អាយុ៤១ ឆ្នាំ

៥.ឈ្មោះ LIU WEI CHENG ភេទប្រុស អាយុ៥២ ឆ្នាំ

៦.ឈ្មោះ CHEN ZHI QUAN ភេទប្រុស អាយុ៦៦ ឆ្នាំ

៧.ឈ្មោះ WANG LEI ភេទប្រុស អាយុ៣៩ ឆ្នាំ

៨.ឈ្មោះ WANG YUE ភេទប្រុស អាយុ៣៩ ឆ្នាំ

៩.ឈ្មោះ ZHU XIAO FEI ភេទប្រុស អាយុ៣៩ ឆ្នាំ។

ក្នុងនោះសមត្ថកិច្ចក៏បានធ្វើការដកហូតវត្ថុតាង គ្រឿងញៀនប្រភេទមេតំហ្វេតាមីន​(ICE)​សរុបរួម​ទម្ងន់ ៣៤៧ គីឡូក្រាម ៤២៧,៩៩ ក្រាម (លាក់ក្នុងបំពង់ដែក ៣៦៧ដើម និង ៦១ កញ្ចប់ធំ) ជញ្ជីង​ថ្លឹងគ្រឿងញៀន ២គ្រឿង និងសម្ភារវេចខ្ចប់មួយចំនួនទៀត។

-ដកហូតរថយន្ត១ គ្រឿង ម៉ាក TOYOTA ALPHARD ពាក់ស្លាក់លេខ ភ្នំពេញ 2BE-2973 ។

-ម៉ូតូ១ គ្រឿងម៉ាក HONDA PCX ពណ៌ខ្មៅ ស្លាកលេខ ភ្នំពេញ 1FE-5946។

-ទូរស័ព្ទដៃ ចំនួន១០ គ្រឿង និង.ប្រាក់៣០០ ដុល្លារអាមេរិក៕

អត្ថបទ៖ មករា