ទឹកភ្លៀង​បានស្រក​ទៅវិញ​នៅភូមិទាំង​ ៦ ​បន្ទាប់ពី​អាជ្ញាធរ​ជីកប្រឡាយ​រំដោះទឹក

មកដល់ព្រឹកថ្ងៃទី ២៨ ខែកក្កដានេះ ភូមិទាំង៦ ស្ថិតក្នុងសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញដែលរងការលិចលង់ដោយទឹកភ្លៀងនោះទឹកបានស្រកចុះដូចដើមវិញហើយ។

លោក ជា សុខៃ ចៅសង្កាត់ចាក់អង្រែក្រោមបានឲ្យដឹងថា បន្ទាប់ពីទឹកបានស្រកចុះដូចដើមវិញហើយនោះលោកបាននាំយករថយន្តបូមលូមកដាក់បូមតាមមាត់លូស្ថិតនៅតាមបណ្តាភូមិទាំង ៦ ដើម្បីស្តារសំរាមចេញពីលូឲ្យទឹកបានហូរចូលលូបានលឿនធ្វើយ៉ាងណាមិនឲ្យបងប្អូនប្រជាពលរដ្ឋមានភាពលំបាកក្នុងការស់នៅក្នុងទឹក។

លោកចៅសង្កាត់ក៏បានសុំការយោគយល់ពីបងប្អូនប្រជាពលរដ្ឋដែលរងការលិចលង់ដោយជំនន់ទឹកភ្លៀងកន្លងមកបើទោះជាអាជ្ញាធរខិតខំដុតដៃដុតជើងដើម្បីរកវិធានការរំដោះទឹកចេញមិនឲ្យប្រជាពលរដ្ឋមានផលលំបាកឡើយ។

សូមបញ្ជាក់ថា បន្ទាប់ពីភ្លៀងធ្លាក់ខ្លាំងនៅយប់ថ្ងៃទី ២៥ ខែកក្កដាមកឃើញថា នៅតំបន់ណាក៏រងការលិចលង់ដោយសារទឹកជន់ខ្លាំងហូចូលលូមិនទាន់។

ដោយឡែកភូមិចំនួន ៦ ក្នុងសង្កាត់ចាក់អង្រែក្រោមវិញក៏រងការលិចលង់រហូតដល់អាជ្ញាធរសង្កាត់ចាក់អង្រែក្រោមដាក់គ្រឿងចក្រ២គ្រឿងចុះជីកប្រឡាយចំនួន ២ខ្សែ ជាបន្ទាន់ដើម្បីរំដោះទឹកចូលទៅស្ទឹងជ្រៅ ទើបបានស្រកទឹកអស់មកដល់ថ្ងៃទី ២៨ ខែកក្កានេះ៕

អត្ថបទ៖ នរា