ព័ត៌មានជាតិ

ពលរដ្ឋជាច្រើនគ្រួសាររស់នៅស្រុកកូនមុំកំពុងព្រួយបារម្ភអំពីបញ្ហាអសន្តិសុខកើតមាននៅក្នុងមូលដ្ឋានភូមិ-ឃុំរបស់គាត់

បានផុស

២ years មុន

នៅ

ថ្ងៃសុក្រ ២៩ កក្កដា ២០២២

ដោយ

រតនគិរី ៖ ប្រជាពលរដ្ឋជាច្រើនគ្រួសារបច្ចុប្បន្នរស់នៅភូមិពីរ ឃុំស្រែអង្រង ស្រុកកូនមុំ ខេត្តរតនគិរី បានសំដែងការព្រួយបារម្ភអំពីបញ្ហាសន្តិសុខសុវត្ថិភាពដែលកំពុងកើតមានឡើងជាបន្តបន្ទាប់រយះពេលថ្មីៗកន្លងមក ស្ថិតនៅភូមិ-ឃុំ របស់ពួកគាត់រួមមាន ១.ករណី ចោរលួចស្រូវ ទាំងថ្ងៃ ២.ករណី ចោរលួចគាស់ផ្ទះ និង៣.ករណី ប្លន់ឆក់យកខ្សែ.កទាំងព្រឹកព្រលឹមជាដើម។ល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្តែងជនរងគ្រោះទាំងបីគ្រួសារស្ថិតនៅភូមិពីរ ឃុំស្រែអង្ក្រងខាងលើបានជួបធ្វើបទសម្ភាសន៍ផ្តល់ព័ត៌មាន ជាមួយក្រុមអ្នកសារព័ត៌មានប្រចាំខេត្តរតនគិរីយើងជាច្រើនអង្គភាពកាលពីរសៀលថ្ងៃទី២៤ ខែកក្កដាកន្លងទៅថ្មីៗនេះ ពួកគាត់បានលើកឡើងសំដែងការហួសចិត្តដូចៗគ្នាយ៉ាងដូច្នេះថា ទី១-លោកយាយ យឹម រ៉នអាយុជាងហុកសិបឆ្នាំ រស់នៅតែពីរនាក់លោកតាត្រូវជាស្វាមីអាយុជាងចិត្រសិបឆ្នាំ ដែលមានកូនតូចលក់ម្ហូបអាហារពេលព្រឹកតាមដងផ្លូវជាតិលេខ៧៨ ទល់មុខផ្លូវក្រាលក្រួសក្រហមចូលទៅភូមិស្រែអង្គ្រង បានរៀបរាប់ថា កន្លងមកនេះ មិនចាំថ្ងៃ គ្រាន់តែដឹងថា ចំថ្ងៃសិល្ប១៥កើត ចូលព្រះវស្សា វេលាម៉ោងជិត៥ទៀបភ្លឺស្រាងៗខណៈលោកតាក្រោកពី ងងឹត ទៅវត្តសុំសិល្បបាត់ នៅតែលោកយាយដាំស្លរបរគុយទាវលក់ព្រលឹមឡើង។

ដោយតូបលោកយាយពុំមានទ្វារនាំងបាំងអ្វីផងនោះ នៅចំហល្ហល្ហាវ ជាឱកាសល្អរបស់ក្រុមចោរតែម្តង ជិះម៉ូតូតាមថ្នល់ជាតិឆ្វែលចុះឆ្វែលឡើង។ ខណៈពេលនោះស្រាប់តែម៉ូតូមួយគ្រឿងនោះឈប់ង៉ក់នៅពីមុខតូប លេចជនមិនស្គាល់អត្តសញ្ញាណ អាយុប្រហែលជាងសាមសិបឆ្នាំ មុខគូសធ្យូងនៅតែរង្វង់ភ្នែកទាំងគូរចំនួន២នាក់ ហើយពួកវាបានសួរលោកយាយថា យាយបបរ គុយទាវឆ្អិននៅ? លោកយាយបានឆ្លើយតបថា មិនទាន់ឆ្អិនទេប្រហែលម៉ោង៦ជាងបានឆ្អិន។

ពួកវាបានបន្តថា បើចឹងពួកខ្ញុំនៅរង់ចាំសិន ប្រហែលម៉ោង៥ភ្លឺរៀងច្បាស់ អាម្នាក់ដែលគូសមុខបានសុំយាយទៅបន្ទប់ទឹកលោកយាយបានឆ្លើយថានៅខាងក្រោយ វាក៏ធ្វើសកម្មភាពទៅលើលោកយាយតែម្តងចាប់ក្រៀកលោកយាយដៃម្ខាងរបស់វាទាញកាំបិតបម្រុងអាករ តែលោកយាយរើបម្រាស់សង្កត់ដៃចុះមកក្រោមហើយស្រែកបញ្ឆោតវា ធ្វើជាហៅ តាដែលកំពុងដេកនោះថា តាជួយខ្ញុំផង ពេលនោះ វាក៏ទម្លាក់កាំបិតចោល ហើយក៏ស្រវាកន្ត្រាក់ខ្សែកផ្លាកទីនចំនួន៥ជី ពីកលោកយាយរត់ឡើងម៉ូតូ ដែលបក្សពួកវាបញ្ឆេះម៉ាស៊ីនចាំជាស្រេចយកទៅបាត់។

នៅពេលនោះដែរលោកយាយក៏បានស្រែកឲ្យគេជួយផងៗប្រហែលជាអ្នកនៅជិតខាងរាយការណ៍ទៅប៉ុស្តិ៍ ទើបប្រមាណ២០នាទីក្រោយទើបឃើញនគរបាលប៉ុស្តិ៍ស្រែអង្គ្រងមកដល់តូបលោកយាយ បានត្រឹមសួរនាំពីលោកយាយតែប៉ុណ្ណោះ។

លោកស្រី ជំទប់ទី១ឃុំស្រែអង្គ្រងបានទទួលស្គាល់ថា ប្រជាពលរដ្ឋខាងលើ ពិតជារងគ្រោះដោយអំពើឆក់ប្លន់ពីក្រុមចោរពិតប្រាកដមែន លោកស្រីក៏ដូចជាប្រជាពលរដ្ឋរស់នៅឃុំស្រែអង្ក្រង ស្រុកកូនមុំ ធ្វើការសំណូមពរដល់អាជ្ញាធរស្រុក ជាពិសេសនោះ មន្ត្រីកងរាជអាវុធហត្ថស្រុកកូនមុំមន្ត្រី អធិការនគរបាលស្រុកនិងប៉ុស្តិ៍រដ្ឋបាលឃុំស្រែអង្ក្រង មេត្តាចុះដើរល្បាតជាប្រចាំផង ដើម្បីឲ្យពួកគាត់មានភាពកក់ក្តៅ និងមានសុវត្ថិភាពផង ជាពិសេសគួរចាត់វិធានការរឹតបន្តឹងនូវគោលនយោបាយ ភូមិ-ឃុំ មានសុវត្ថិភាពដែលរាជរដ្ឋាភិបាលបានដាក់ចេញ តម្រូវឲ្យអាជ្ញាធរគ្រប់ស្ថាប័ន មានសមត្ថកិច្ចក្នុងមូលដ្ឋានពីរាជធានីទីក្រុងរហូតដល់ជនបទ ត្រូវលុបបំបាត់ឲ្យអស់អំពើអបាយមុខ ពាលាអាវ៉ាសែ ល្បែងស៊ីសង ប៌ៀរអាប៉ោង ឆ្នោតឡូតូ ចាក់បាល់ ភ្នាល់ប្រជល់មាន់។

ជាពិសេសករណីសេពគ្រឿងញៀន ជួញដូរនិងចែកចាយសារធាតុញៀនជាដើម។ ល។ ព្រោះថាល្បែងស៊ីសងបានកើតមាននៅតាមមូលដ្ឋានវាជាដើមចម និងជាហេតុនៃ អំពើ លួច ឆក់ ប្លន់នេះតែម្តង៕

ដោយ ៖ វុទ្ធឦសាន