​ក្រសួង​បរិស្ថាន​ធ្លាប់ផ្ដល់ពូជសត្វ​ចិញ្ចឹមជិត​២ ពាន់ក្បាល​ដល់ប្រជាសហគមន៍​មូលដ្ឋាន​

លោក នេត្រ ភក្ត្រា រដ្ឋលេខាធិការ និងជាអ្នកនាំពាក្យក្រសួងបរិស្ថានបានឱ្យដឹងថា កន្លងមកក្រុម​ការងារសិក្សា និងវាយតម្លៃសម្រាប់ការអនុវត្តគម្រោងកិច្ចសហការនៃការផ្តល់ពូជសត្វ នៃក្រសួង​បរិស្ថាន ធ្លាប់បានធ្វើការសិក្សាលទ្ធភាពក្នុងការផ្តល់ជាពូជសត្វ គោ ក្របី ពពែ ជ្រូក ជ្រូកព្រៃ ចៀម សរុបប្រមាណជិត ២ ពាន់ក្បាល (១ ៨០២) ប្រគល់ជូនបងប្អូនប្រជាសហគមន៍មូលដ្ឋាន ដៃគូ​សហ​ការ​ចិញ្ជឹម​តាមកសិដ្ឋាន និង​បងប្អូនប្រជាពលរដ្ឋ​ដែលមានឆន្ទៈខ្ពស់​មានចិត្តចង់ចិញ្ចឹម​ជា​លក្ខណៈ​គ្រួសារ និងកសិដ្ឋានដោយ​ឈរលើគោលការណ៍នៃលក្ខខន្តិក​ ជាមួយក្រសួងបរិស្ថានដោយទុក​រយៈពេលសមស្របណាមួយដើម្បីប្រគល់សងត្រលប់មកក្រសួងបរិស្ថានវិញ ផ្អែកលើគោលការណ៍​និរន្តរភាពនៃគម្រោង។

គិតចាប់ពីដើមឆ្នាំ២០២១ រហូតដល់ត្រីមាសទី១ ឆ្នាំ២០២២នេះ ក្រសួង​បរិស្ថានធ្លាប់បានផ្តល់ពូជ​សត្វទៅតាមគោលដៅស្នើសុំមួយចំនួនលើប្រភេទសត្វដូចជា៖

ក្របី ២៥៨ ក្បាល គោ ៤០២ ក្បាល គោបា ៦ ក្បាល គោមេពូជ ៣០ ក្បាល ចៀម ៥៤២ ក្បាល ជ្រូក ៨០ ក្បាល ជ្រូកព្រៃ ១០០ ក្បាល បាចៀម ១ ក្បាល និងពពែ ៣៨៣ ក្បាល៕