តើភ្នំតាម៉ៅគួរអភិវឌ្ឍន៍បែបណា ដើម្បីទាក់ទាញទេសចរបន្ថែមទៀត?

ភ្នំតាម៉ៅ គឺជារមណីយដ្ឋានចម្រុះមានប្រាង្គប្រាសាទ ព្រៃភ្នំ ធម្មជាតិ និងជា​សួនសត្វដ៏ធំក្នុងប្រទេសកម្ពុជា ដែលមានទីតាំងស្ថិតនៅស្រុកបាទី ខេត្តតាកែវ។

អ្នកជំនាញទេសចរណ៍ បានលើកឡើងថា រមណីយដ្ឋានភ្នំតាម៉ៅ គួរតែអភិវឌ្ឍផ្នែកទេសចរណ៍បន្ថែមលើសអ្វីដែលមាន​បច្ចុប្បន្ន ទើបអាចទាក់ទាញភ្ញៀវទេសចរទាំងជាតិ និងអន្តរជាតិ ឱ្យមកកម្សាន្តច្រើន។

សព្វថ្ងៃរមណីយដ្ឋាននេះ ភាគច្រើនមានភ្ញៀវទេសចរជាតិ បែបលក្ខណៈគ្រួសារ ទៅកម្សាន្តមើលប្រាង្គប្រាសាទ និងសត្វព្រៃ  ពោលគឺនៅមានកម្រិតនៅឡើយ។ ​

តំបន់រមណីយដ្ឋានភ្នំតាម៉ៅ គឺជាតំបន់ទេសចរណ៍ធម្មជាតិទាក់ទាញខ្លាំង មានព្រៃភ្នំ មានសត្វរាប់រយប្រភេទ ដែលអាច​ទាក់ទាញចំណាប់អារម្មណ៍ភ្ញៀវទេសចរ។ អ្នកជំនាញទេសចរបានលើកឡើងថា ប្រសិនបើអាជ្ញាធរ​ពាក់ព័ន្ធកែច្នៃតំបន់​នេះបន្ថែម ដូចជា កន្លែងដែលអាចឱ្យភ្ញៀវទេសចរដើរព្រៃ បោះតង់ ជិះកង់កម្សាន្តបានកាន់តែប្រសើរ ដោយសារតំ​បន់នេះ មានសក្កានុពល អ្នកទេសចរចំណាយអស់តិច ព្រោះនៅមិនឆ្ងាយពីរាជធានីភ្នំពេញ ពោលគឺមាន​ចម្ងាយប្រមាណតែជាង ៤០គីឡូម៉ែត្រប៉ុណ្ណោះ។

លោក ហូរ វណ្ឌី ប្រធានក្រុមប្រឹក្សាភិបាលសមាគមទេសចរណ៍កម្ពុជា បានលើកឡើងថាតំបន់ទេសចរណ៍ភ្នំតាម៉ៅ នៅជិតរាជធានីភ្នំពេញ ងាយស្រួលសម្រាប់ភ្ញៀវទេសចរជាតិ និងអន្តរជាតិទៅកម្សាន្ត មិនចំណាយពេលច្រើន ក្នុងការធ្វើដំណើរ។ លោកថា រមណីយដ្ឋានភ្នំតាម៉ៅ ជាតំបន់ប្រទាក់ក្រឡាគ្នាដ៏សំខាន់ ដែលមានទាំងព្រៃភ្នំ ប្រាសាទ និងសត្វព្រៃ ដែលធាតុផ្សំទាំងនេះ គួរតែត្រូវបានទាក់ទាញភ្ញៀវទេសចរខ្លាំង។

លោកថ្លែងទៀតថា«ប្រសិនបើអាជ្ញាធរ គ្រាន់តែរៀបចំតំបន់នេះ ត្រឹមតែឱ្យសត្វរស់រាន តែគ្មានចំណូលជាប្រចាំ យូរៗសត្វក៏បាត់បង់សុខភាព និងអាចឈានទៅបាត់បង់ទាំងអស់ ព្រោះធ្លាក់ចុះការផ្គត់ផ្គង់»។ លោក វណ្ឌី បញ្ចេញជាទស្សនៈថា ចង់ឱ្យតំបន់ណាមួយអភិវឌ្ឍបានយូរអង្វែង គឺត្រូវតែមាននិរន្តរភាពនៃចំណូល។

អ្នកជំនាញទេសចរណ៍រូបនេះ បានសង្កត់ធ្ងន់ថា ការអភិវឌ្ឍកែច្នៃតំបន់នេះឱ្យទាក់ទាញ នឹងស្រូបចំណូលបានច្រើន ដោយមិនចាំបាច់ពឹងដង្ហើមគេដក ពោលគឺរស់បានដោយខ្លួនឯង និងអាចចិញ្ចឹមពលរដ្ឋក្នុងតំបន់ ឱ្យមានការងារធ្វើដោយ​មិនចាំបាច់ចំណាកស្រុក។

រមណីយដ្ឋានភ្នំតាម៉ៅ មានទីតាំងស្ថិតនៅភូមិត្រពាំងសាប ឃុំត្រពាំងសាប ស្រុកបាទី ខេត្តតាកែវ មានចំងាយជាង ៤០ គីឡូម៉ែត្រ តាមផ្លូវជាតិលេខ ២ពីរាជធានីភ្នំពេញ។ ភ្នំតាម៉ៅ មានផ្ទៃដី ១២០០ ហិចតា ដែលគេឱ្យឈ្មោះថា ជាតំបន់​ផ្ទៃដីការពារព្រៃឈើ៕