រដ្ឋមន្ត្រីសុខាភិបាល៖ គិលានុបដ្ឋាក គឺជាអាយុជីវិតរបស់អ្នកជំងឺគ្រប់រូប

លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលបានមានប្រសាសន៍ថា គិលានុប្បដ្ឋាកគឺជាអាយុជីវិតរបស់អ្នកជំងឺគ្រប់រូបព្រោះថា ប្រសិនបើគិលានុប្បដ្ឋាកមិនមានបទពិសោធន៍មិនមានការទទួលខុសត្រូវ និងមិនមានគុណធម៌ទេវានឹងធ្វើឱ្យអ្នកជំងឺប្រឈមនឹងគ្រោះថ្នាក់ដល់អាយុជីវិត។

ថ្លែងបើកសិក្ខាសាលាលើកទី១របស់មន្ទីរពេទ្យ ព្រះអង្គឌួង ស្តីពីការថែទាំរបស់គិលានុប្បដ្ឋានតាមបែបសម័យថ្មីនៅព្រឹកថ្ងៃទី២០សីហា នេះ នៅសណ្ឋាគារឡឺរ៉ូយ៉ាល់លោករដ្ឋមន្ត្រីបានបន្តថា«គិលានុប្បដ្ឋាកជាជីវិតរបស់អ្នកជំងឺ។ បើគិលានុប្បដ្ឋាកមិនមានបទពិសោធន៍មិនមានការទទួលខុសត្រូវមិនមានគុណធម៌ធ្វើឱ្យអ្នកជំងឺរបស់យើងនឹងត្រូវជួបការលំបាកឬជួបការបាត់បង់ឬមួយរងគ្រោះដោយសារការថែទាំរបស់គិលានុប្បដ្ឋាកនេះជាមិនខាន។ទោះបីជាមានគ្រូពេទ្យពូកែយ៉ាងណាក៏ដោយប្រសិនបើគិលានុប្បដ្ឋាកមិនមានការទទួលខុសត្រូវមិនមានបីពិសោធន៍គឺគិលានុប្បដ្ឋាកគឺអ្នកជំងឺរបស់យើងរងហានិភ័យខ្ពស់»។

លោករដ្ឋមន្ត្រីបានបន្តទៀតថា ដូច្នេះការផ្លាស់ប្តូរបទពិសោធន៍នៅពេលនេះជាយន្តការមួយដ៏សំខាន់ក្នុងការលើកកម្ពស់សមត្ថភាពវិជ្ជាជីវៈគិលានុប្បដ្ឋាកដើម្បីអាយុជីវិតរបស់ប្រជាជនយើង។ លោករដ្ឋមន្ត្រីបានបន្ថែមថា ការថែទាំរបស់គិលានុប្បដ្ឋានតាមបែបសម័យថ្មីនេះពិតជាមាសារសំខាន់ណាស់ក្នុងការដើរឱ្យទាន់ការរីកចំរើនផ្នែកវេជ្ជសាស្ត្ររបស់ពិភពលោកដែលទាមទារឱ្យគិលានុប្បដ្ឋាកត្រូវសិក្សារៀនសូត្រថ្មីៗបន្ថែមដោយការខិតខំប្រឹងប្រែងដោយខ្លួនឯងផងនិងទទួលបានការផ្លាស់ប្តូរបទពិសោធន៍ពីគ្នាទៅវិញទៅមកទាំងផ្ទៃក្នុងនិងអន្តរជាតិ។

លោករដ្ឋមន្ត្រីបានបញ្ជាក់ថា សាធារណរដ្ឋកូរ៉េជាប្រទេសមួយដែលមានការអភិវឌ្ឍវិស័យសុខាភិបាលខ្ពស់នៅក្នុងតំបនយើងនេះ​ហើយការចូលរួមរបស់ភាគីកូរ៉េលើការងារនេះវានឹងជួយលើកម្ពស់សមត្ដភាពរបស់គិលានុប្បដ្ឋាកយើងកាន់តែខ្ពស់បន្ថែមទៀតក្នុងការទាំសុខភាពជូនប្រជាពលរដ្ឋរបស់យើងកាន់តែប្រសើរ។

លោក រ៉ូ យុន ជុន ប្រធានអង្គការKOICAប្រចាំប្រទេសកម្ពុជាបានមានប្រសាសន៍ថា គោលបំណងនៃសិក្ខាសាលាគិ
លានុប្បដ្ឋាកនេះគឺដើម្បីស្វែងយល់ពីមធ្យោបាយពង្រឹងសមត្ថភាពគិលានុប្បដ្ឋាកក្នុងមន្ទីរពេទ្យជាតិទាំង៥នៅក្នុងរាជធានីភ្នំពេញបន្ទាប់ពីការបញ្ចប់នៃជំងឺកូវីដ១៩ដែលសិក្ខាសាលានេះមានការចែករំលែកដោយអ្នកជំនាញគិលានុប្បដ្ឋាកមកពីកូរ៉េ។ លោករំពឹងថា តាមរយៈសិក្ខាសាលានេះវានឹងជួយធ្វើឱ្យប្រសើរឡើងនូវសមត្ថភាពដល់គិលានុប្បដ្ឋាកកម្ពុជាក៏ដូចជារួមចំណែកពង្រឹងសមត្ថភាពផ្នែកវេជ្ជសាស្ត្ររបស់ប្រទេសកម្ពុជាបន្ថែមទៀតផងដែរ។

ចំណែកលោកសាស្ត្រាចារ្យ រង លូ លីឃាង នាយកមន្ទីរពេទ្យព្រះអង្គឌួងបានមានប្រសាសន៍ថា សិក្ខាសាលានេះមានគិលានុប្បដ្ឋាកចូលរួមមកពីមន្ទីរពេទ្យចំនួន៥រួមមានមកពីមន្ទីរពេទ្យអង្គឌួងមន្ទីរពេទ្យមិត្តភាពកម្ពុជាចិនព្រះកុសៈមៈ មន្ទីរពេទ្យកាល់ម៉ែតមន្ទីរពេទ្យមិត្តភាពខ្មែរសូវៀតនិងមន្ទីរពេទ្យកុមារជាតិ។

លោកនាយកមន្ទីរពេទ្យសង្ឃឹមនិងជឿជាក់ថា តាមរយៈសិក្ខាសាលានេះនឹងជួយឱ្យគិលានុប្បដ្ឋាកទទួលបាននូវបច្ចេក​ទេសថ្មីៗ​និងក្រមសីលធម៌កាន់តែប្រសើរក៏ដូចជាធ្វើឱ្យទំនាក់ទំនងរវាងប្រទេសទាំងពីរកម្ពុជាកូរ៉េនិងស្ថាបប័នពាក់ព័ន្ធផ្សេងៗទៀតកាន់តែស្អិតរមួតនិងប្រសើរថែមទៀត៕

អត្ថបទ៖ សំអឿន