ច្រកអន្តរជាតិដូង​ចាប់ផ្តើមបិទ​រថយន្តតូច​មិនឲ្យចរាចរ​ឆ្លងកាត់ដោយសារកម្ពស់ទឹកកំពុងកើនឡើង

ច្រកអន្តរជាតិដូងដែលស្ថិតនៅព្រំដែនកម្ពុជា-ថៃ កំពុងត្រូវបានផ្អាកការធ្វើចរាចរ សម្រាប់រថយន្ត ធុនតូចជាបណ្តើរៗហើយ បន្ទាប់ពីទឹកជំនន់កំពុងវាយលុក។ ​

​នៅព្រឹកថ្ងៃទី៣០ ខែកញ្ញា ឆ្នាំ២០២២នេះ ទឹកជំនន់នៅតាមអូរព្រំដែនកម្ពុជា-ថៃ កំពុងចាប់ផ្តើម​ហក់ឡើងជាបណ្តើរៗហើយ បន្ទាប់ពីស្រុកចំនួន៣នៅតាមខ្សែបន្ទាត់ព្រំដែនថៃលិចលង់ផលដំណាំ និងហេដ្ឋារចនាសម្ព័ន្ធ អស់មួយចំនួន នាពេលថ្មីៗនេះរួចមក។

​បើតាមប្រភពមួយចំនួនបាននិយាយថា នៅព្រឹកនេះ គេសង្គេតឃើញថា ទឹកអូរព្រំដែនចាប់ផ្តើម​ហក់ឡើងយ៉ាងលឿនបំផុត បង្កទៅជាលិចផ្លូវឆ្លងកាតច្រកអន្តរជាតិដូង ស្ថិតក្នុងភូមិអូរដាលើ ឃុំបឹងរាំង ស្រុកកំរៀង ខេត្តបាត់ដំបង ដែលទឹកនេះ អាចមានប្រភពមកពីប្រទេសថៃផង និងទឹកភ្លៀងផង។

​រយៈពេលតែប៉ុន្មានម៉ោងប៉ុណ្ណោះ ទឹកចាប់ផ្តើមគំហុកយ៉ាងខ្លាំង ដែលតម្រូវឲ្យសមត្ថកិច្ចផ្អាក​ការធ្វើចរាចរសម្រាប់រថយន្តធុនតូចជាបណ្តោះអាសន្ន ព្រោះខ្លាចមានគ្រោះថ្នាក់ណាមួយជាយថាហេតុ ព្រោះដោយសារតែទឹកមានកំពស់ខ្ពស់ហើយ ដោយរង់ចាំដល់ទឹកស្រក​ទើបអនុញ្ញាតឲ្យ​ធ្វើចរាចរជាធម្មតាឡើងវិញ។ សម្រាប់សន្ទុះទឹកនៅម៉ោង ៩ ព្រឹកនេះ គឺនៅតែបន្តឡើងឥត​ស្រាកស្រាន្ត៕

អត្ថបទ ៖ សោ និយមរ័ត្ន