ព័ត៌មានជាតិ

ឯកអគ្គរដ្ឋទូតរុស្សី សន្យា នឹងជួយកៀរគរអ្នកវិនិយោគរុស្សីឲ្យមកបណ្តាក់ទុននៅកម្ពុជាកាន់តែច្រើន

បានផុស

៦ years មុន

នៅ

ថ្ងៃអង្គារ ២៧ តុលា ២០២០

ដោយ

លោក អាណាតូលី បូរ៉ូវីក ឯកអគ្គរដ្ឋទូតសហព័ន្ធរុស្សីប្រចាំកម្ពុជា បានមានប្រសាសន៍ថា ក្នុងអាណត្តិរបស់លោក លោកនឹងជួយកៀរគរអ្នកវិនិយោគរុស្សីឲ្យមកបណ្តាក់ទុននៅកម្ពុជាឲ្យបានកាន់តែច្រើនថែមទៀត ខណៈបច្ចុប្បន្ន មានក្រុមហ៊ុនរុស្សីតិចតួចប៉ុណ្ណោះកំពុងរកស៊ីនៅប្រទេសកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងប្រាប់ក្រុមអ្នកសារព័ត៌មានកាលពីពេលថ្មីៗនេះ លោកទូត បានបន្តថា «សព្វថ្ងៃនេះមិនសូវមានក្រុមហ៊ុនរុស្សីច្រើនទេដែលមកវិនិយោគនៅកម្ពុជា។ យើងនឹងកៀរគរអ្នកវិនិយោគ និងក្រុមហ៊ុនរុស្សីមកបណ្តាក់ទុននៅកម្ពុជាកាន់តែច្រើនថែមទៀត។ យើងកំពុងប្រឹងប្រែងផ្សព្វផ្សាយពីសក្ដានុពល ពីប្រទេសកម្ពុជា ដើម្បីទាញចំណាប់អារម្មណ៍របស់អ្នកវិនិយោគ និងក្រុមហ៊ុនធំៗរុស្សី»។

លោកបានបន្ថែមទៀតថា ចំពោះអាណត្តិរបស់លោកនឹងយកចិត្តទុកដាក់ចំពោះវិស័យសេដ្ឋកិច្ច និងវិនិយោគ។ យើងមានគម្រោងខ្លះៗ កំពុងរៀបចំទំនាក់ទំនងរវាងភាគីរុស្សី និងកម្ពុជា។

លើសពីនេះទៀត លោកឯកអគ្គរដ្ឋទូត បានបញ្ជាក់ទៀតថា ក្រៅពីនេះ នៅក្នុងអាណត្តិរបស់លោក គឺបន្តពង្រឹង និងពង្រីកទំនាក់ទំនងរុស្សីកម្ពុជាលើគ្រប់វិស័យដូចជា កិច្ចពិភាក្សានយោបាយ កិច្ចសហប្រតិបត្តិការពាណិជ្ជកម្ម សេដ្ឋកិច្ចវប្បធម៌ និងការអប់រំ។

លោកទូត បានឲ្យដឹងទៀតថា «ខ្ញុំមកកម្ពុជាក្នុងឋានៈជាឯកអគ្គរដ្ឋទូតសហព័ន្ធរុស្សី ដើម្បីរឹតចំណងមិត្តភាព និងសហប្រតិបត្តិការរវាងប្រទេសយើងទាំងពីរឲ្យបានល្អប្រសើរ និងមានផលប្រយោជន៍ទៅវិញទៅមក។ សហព័ន្ធរុស្សី និងកម្ពុជា មានចំណងមិត្តភាព និងប្រពៃណីយ៉ាងយូរអង្វែង»៕

អត្ថបទ ៖ សំអឿន

Related Topics:

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា